26 טעראָריסטן באַפֿרײַט

26 Palestinian Prisoners Freed

די באַפֿרײַטע פּאַלעסטינער בײַ דער גרענעץ פֿון ישׂראל מיטן עזה־פּאַס, דעם 14טן אויגוסט
Getty Images
די באַפֿרײַטע פּאַלעסטינער בײַ דער גרענעץ פֿון ישׂראל מיטן עזה־פּאַס, דעם 14טן אויגוסט

Published August 15, 2013, issue of August 30, 2013.

מיטוואָך בײַ נאַכט זײַנען פֿון דער ישׂראל־תּפֿיסה באַפֿרײַט געוואָרן 26 פּאַלעסטינער טעראָריסטן, אַרויסגעלאָזט, ווי אַ זשעסט פֿון גוטן ווילן, מצד דער ישׂראל־רעגירונג. בײַ דער רעזידענץ פֿון דער פּאַלעסטינער אַדמיניסטראַציע „מוקאַטאַ‟ אין ראַמאַלאַ האָבן זיך צונויפֿגענומען אַרום טויזנט אײַנוווינער צו באַגעגענען די 11 באַפֿרײַטע, וועלכע זײַנען איבערגעגעבן געוואָרן דירעקט אין די הענט פֿון דער אַדמיניסטראַציע אויף דעם קאָנטראָל־פּונקט „ביתּוניה‟.

די איבעריקע 15 טעראָריסטן פֿון דער אַלגעמיינער ליסטע זײַנען אָנגעקומען קיין עזה, וואָס געפֿינט זיך אונטערן קאָנטראָל פֿון „כאַמאַס‟, דורכן גרענעץ־פּונקט „ארז‟.

קיין פֿײַערלעכע טרעפֿונג לכּבֿוד די באַפֿרײַטע האָט זיך נישט באַקומען, ערשטנס, צוליב דעם וואָס, קיין ראַמאַלאַ זײַנען זיי אָנגעקומען אַרום 1 אַזייגער בײַ נאַכט, און קיין עזה — מיט אַ שעה שפּעטער; און צווייטנס, האָט די „כאַמאַס‟־אַדמיניסטראַציע פֿאַרווערט פֿײַערלעך אויפֿצונעמען זייערע ברידער, ווי אויך צו פֿאַרשפּרייטן פּלאַקאַטן וועגן דעם. די „כאַמאַסניקעס‟ האַלטן נישט ניט פֿון די פֿאַרהאַנדלונגען, וואָס האָבן זיך אָנגעהויבן צווישן ישׂראל און „פֿאַטאַך‟, און אַוודאי ניט פֿון דער „ברייטהאַרציקייט‟ פֿון די „ציוניסטן‟.

דער הויפּט פֿון דער פּאַלעסטינער אַדמיניסטראַציע, מאַכמוד אַבאַס, האָט דווקא יאָ באַגריסט די באַפֿרײַטע, צוזאַמען מיט די פֿאַרזאַמלטע. „מיר באַגריסן אונדזערע ברידער, וועלכע האָבן פֿאַרלאָזט דעם חושך פֿון תּפֿיסה, צוליב דעם ליכט פֿון פֿרײַהייט. איר זײַט די ערשטע, אָבער עס זײַנען דאָ אויך אַנדערע אונדזערע ברידער, וואָס וועלן גאָר אין גיכן אַרויסגיין אויף דער פֿרײַ. מיר וועלן נישט לעבן רויִק, ביז זיי וועלן אַלע נישט זײַן צוזאַמען מיט אונדז‟, — האָט געזאָגט אַבאַס. די באַפֿרײַטע האָבן באַזוכט יאַסיר אַראַפֿאַטס קבֿר.

אין דער זעלבער צײַט, ווי אַן ענטפֿער אויף דער „ברייטהאַרציקייט‟ פֿון ישׂראל, איז פֿון עזה אַרויסגעשאָסן געוואָרן אַ ראַקעטע, וואָס איז אַראָפּגעפֿאַלן אויף אַן אָפֿענעם שטח פֿונעם רעגיאָנאַנלן נגבֿ־ראַט און קיין היזק נישט געבראַכט.

ווי אַן ענטפֿער, האָט די ישׂראל־אַוויאַציע אַטאַקירט די ראַקעטן־פּונקטן, וואָס האָבן זיך געפֿונען אויף צפֿון פֿון עזה־פּאַס.