אָפּשטעלן עזה־בלאָקאַדע? בשום־אופֿן ניט, זאָגט ישׂראל!

Lifting Gaza Blockade "Out of the Question", say Israeli officials

דער טערקישער פּרעמיער רעשעפּ טאַיִפּ ערדאָגאַן
Getty Images
דער טערקישער פּרעמיער רעשעפּ טאַיִפּ ערדאָגאַן

Published February 13, 2014, issue of February 28, 2014.

ישׂראל וועט נישט אָפּשטעלן איר בלאָקאַדע אויפֿן עזה־פּאַס, האָבן איבערגעגעבן עטלעכע הויך־ראַנגיקע באַאַמטע פֿון פּרעמיער בנימין נתניהוס ביוראָ, אַ טאָג נאָך דעם ווי דער טערקישער פּרעמיער רעשעפּ טאַיִפּ ערדאָגאַן האָט געמאָלדן, אַז ער וועט נישט אונטערשרײַבן קיין אויסגלײַך־אָפּמאַך צווישן טערקײַ און ישׂראל, סײַדן ישׂראל וועט אָפּטשעלן די בלאָקאַדע.

בעת אַ פּרעסע־קאָנפֿערענץ אין אַנקאַראַ דינסטיק, האָט ערדאָגאַן געזאָגט, אַז די פֿאַרהאַנדלונגען מיט ישׂראל זענען שוין אויף אַ וועג, אָבער נישט פֿאַרענדיקט געוואָרן. ער האָט צוגעגעבן, אַז טערקײַ האָט שוין באַקומען אַ פֿאָרמעלע אַנטשולדיקונג פֿון ישׂראל און אַז מע פֿירט ווײַטער די פֿאַרהאַנדלונגען איבער קאָמפּענסאַציע פֿאַר די משפּחות פֿון די אומגעבראַכטע און פֿאַרוווּנדיקטע אויף דער שיף, וואָס האָט געפּרוּווט דורכברעכן די עזה־בלאָקאַדע אין 2010.

ערדאָגאַן האָט אָבער צוגעגעבן, אַז דערווײַל האָט ישׂראל נאָך נישט אָפּגעשטעלט די בלאָקאַדע אין עזה, איינער פֿון די באַדינגונגען, וואָס טערקײַ האָט געשטעלט פֿאַר באַנײַען די דיפּלאָמאַטישע באַציִונגען מיט ישׂראל. „גאָרנישט וועט ניט פּאַסירן, אויב מע שטעלט נישט אָפּ די באַלאַגערונג פֿון עזה,‟ האָט ערדאָגאַן געזאָגט.

רעאַגירנדיק אויף ערדאָגאַנס באַמערקונגען, האָבן די הויך־ראַנגיקע אין נתניהוס רעגירונג געזאָגט, אַז אָפּשטעלן די בלאָקאַדע איבער עזה אָדער אונטערשרײַבן אַ צוזאָג, אַז מע וועט עס טאָן אין דער צוקונפֿט, וועט „בשום־אופֿן נישט געשען‟.

מאָנטיק האָט דער טערקישער אויסערן־מיניסטער אַכמעט גאַוווּטאָגלו דערקלערט פֿאַר אַן אָרטיקער טעלעוויזיע־סטאַנציע, אַז ישׂראל און טערקײַ זענען שוין זייער נאָענט צום נאָרמאַליזירן זייערע באַציִונגען. די פֿאַרגאַנגענע וואָך האָט „האָרץ‟ איבערגעגעבן, אַז ישׂראל איז גרייט צו באַצאָלן 20 מיליאָן דאָלאַר קאָמפּענסאַציע פֿאַר די משפּחות פֿון נײַן מענטשן אומגעבראַכט בעת דער ישׂראלדיקער אָבלאַווע אויף דער טערקישער שיף „מאַווי מאַרמאַראַ‟ אין מײַ 2010, און פֿאַר די פֿאַרוווּנדיקטע אין דעם אינצידענט.

ישׂראל פֿאָדערט, אַז ווי אַ טייל פֿונעם אויסגלײַך, זאָל טערקײַ אָננעמען אַ געזעץ אָפּצושטעלן לעגאַלע אָנקלאָגן קעגן די ישׂראלדיקע סאָלדאַטן, וועלכע האָבן אָנטיילגענומען אין דער אָבלאַווע.