נײַעס פֿון מעלבורן

News From Melbourne

נתן שטשאַראַנסקי מיט זײַן פֿרוי, אַבֿיטל, בעת זייער באַזוך אין מעלבורן און סידניי
נתן שטשאַראַנסקי מיט זײַן פֿרוי, אַבֿיטל, בעת זייער באַזוך אין מעלבורן און סידניי

פֿון שרה זילבערמאַן

Published April 07, 2014, issue of April 25, 2014.

אַ נײַע אויספֿאָרשונג וועגן די לימודים העברעיִש און ייִדישע שטודיעס אין אויסטראַליע

פּראָפֿעסאָרן פֿונעם סידנעיער אוניווערסיטעט און בר-אילן אוניווערסיטעט האָבן פֿאַרעפֿנטלעכט אַ נײַע אויספֿאָרשונג וואָס טאַדלט ווי אַזוי די העברעיִשע שפּראַך און ייִדישע שטודיעס ווערן געלערנט אין די אויסטראַלישע ייִדישע טאָגשולן.

די אויספֿאָרשונג ווײַזט, אַז די פּריאָריטעטן פֿונעם עלטערן דור זײַנען נישט די פּריאָריטעטן פֿונעם הײַנטיקן דור סטודענטן און אַז די קוריקולומס מוזן דערפֿאַר ווערן געענדערט. דאָס באַריכט גיט איבער, אַז 48% פֿון די סטודענטן מיט וועמען זיי האָבן גערעדט פֿאַראינטערעסירן זיך מיט אינפֿאָרמעלע ייִדישע לימודים, אין פֿאַרגלײַך מיט 12%, וועלכע ווילן זיך לערנען וועגן דעם חורבן. די פּראָפֿעסאָרן טענהן, אַז מיר שטייען פֿאַר אַ נײַער תּקופֿה אין ייִדישן לעבן און אַז דאָס פֿאָדערט אַ נײַעם צוגאַנג צום קוריקולום. זיי פֿאָדערן אויך אַז די העברעיִשע שפּראַך זאָל געלערנט ווערן פֿון לאָקאַלע לערערס וועלכע פֿאַרשטייען די לאָקאַלע ייִדישע קולטור בעסער ווי אימפּאָרטירטע ישׂראלדיקע לערערס און צו לערנען דעם עצם פֿון ייִדישע שטודיעס באַנוצנדיק זיך מיט אַלע מאָדערנע קאָמוניקאַציע-מיטלען. זיי האָבן אויך געפֿאָדערט אַ פּלוראַליסטישן צוגאַנג צו ייִדישע שטודיעס, כּדי די סטודענטן זאָלן קענען באַשטימען פֿאַר זיך ווי אַזוי אויסצודריקן זייער ייִדישן באַוווּסטזײַן.

נײַער קורס בײַם מעלבורנער חורבן-צענטער

דער מעלבורנער חורבן פֿאָרש-צענטער און מוזעום האָט געמאָלדן וועגן אַ נײַעם קורס וועגן דעם חורבן, וואָס וועט זיך טרעפֿן זיבעצן מאָל און וואָס וועט געלערנט ווערן פֿון פּראָפֿ’ ביל אַנדערסאָן פֿון „דיקאָן אוניווערסיטעט‟. דער קורס וועט אַרומנעמען די טעמעס — דאָס ייִדישע לעבן אין אייראָפּע פֿאַר דער צווייטער וועלט-מלחמה, נאַצישער פּאָליטיק און ווי אַזוי זיי האָבן זי אײַנגעפֿירט, די באַפֿרײַונג און נאָך. דער קורס הייבט זיך אָן הײַנט בײַ נאַכט.

די ציוניסטישע פֿעדעראַציע פֿון אויסטראַליע דערוויילט אַ נײַעם פּרעזידענט

ד”ר דעני לאַם איז דערוויילט געוואָרן ווי דער פּרעזידענט פֿון דער ציוניסטישער פֿעדעראַציע פֿון אויסטראַליע בײַ איר יערלעכער אַלגעמיינער פֿאַרזאַמלונג. ער דינט אויך אויף דער עקזעקוטיווע פֿון דער „סוכנות‟ און ווי דער פֿאָרזיצער פֿון איר עליה־אָפּטיילונג; אויף דער עקזעקוטיווע פֿון דער אַלוועלטלעכער ציוניסטישער אָרגאָניזאַציע און אויף דער עקזעקוטיווע פֿון דער ירושה-קאָנפֿערענץ. ער האָט פֿריִער געדינט ווי דער פּרעזידענט פֿון דער לאָקאַלער „מיזרחי‟ אָרגאָניזאַציע; פּרעזידענט פֿונעם ציוניסטישן ראַט פֿון וויקטאָריע און פֿונעם עקזעקוטיוו-ראַט פֿון אויסטראַלישן ייִדנטום.

נתן שטשאַראַנסקי לויבט אויסטראַלישן ייִדנטום

נתן שטשאַראַנסקי, דער פֿאָרזיצער פֿון דער „סכנות‟, האָט געלויבט דעם אויסטראַלישן ייִדנטום בעת זײַן וויזיט דאָ אין לאַנד. ער האָט ספּעציעל געלויבט אויסטראַליעס ציוניסטישע יוגנט-גרופּעס. ער האָט באַקומען אַ שטייענדיקע אָוואַציע בײַ דער קאָנפֿערענץ פֿון דער ציוניסטישער אָרגאָניזאַציע פֿון אויסטראַליע.

איין יאָר „משה־הויז‟ אין מעלבורן

דאָס „משה־הויז‟ אין מעלבורן איז געווען דאָס ערשטע „משה־הויז‟ אין אויסטראַליע, ווען עס האָט זיך געעפֿנט אין מאַרץ 2013. עס זײַנען פֿאַראַן כאָטש 60 אַזעלכע הײַזער איבער גאָר דער וועלט, וועמענס ציל איז צו זײַן אַ קאָאָפּעראַטיווע פֿאַר צוקונפֿטיקע ייִדישע אָנפֿירערס. די אײַנוווינער גרייטן צו צווישן זעקס און נײַן אונטערנעמונגען יעדן חודש, כּדי צוצוציִען אַנדערע יונגע ייִדן. די טעמעס זײַנען: לערנען זיך וועגן ייִדישקייט, לערנען זיך וועגן דער ייִדישער קולטור און די יום-טובֿים, תּיקון-עולם און ריין געזעלשאַפֿטלעכע אונטערנעמונגען. דאָס מעלבורנער „משה־הויז‟ האָט אויפֿגענומען אַן ערך צוויי טויזנט געסט בײַ זיבעציק אונטערנעמונגען במשך פֿונעם יאָר. די קאָסטן פֿונעם „משה־הויז‟ ווערן געדעקט פֿון קהלישע פֿאָנדן.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.