בלער רופֿט צו קעמפֿן קעגן איסלאַמיזם

Blair: World Must Take a Stand Against Radical Islam

טאָני בלער טרעט אויף דעם 23סטן אַפּריל אינעם לאָנדאָנער צענטער פֿון דער פֿירמע „בלומבערג‟
Getty Images
טאָני בלער טרעט אויף דעם 23סטן אַפּריל אינעם לאָנדאָנער צענטער פֿון דער פֿירמע „בלומבערג‟

Published April 24, 2014, issue of May 09, 2014.

מיטוואָך, דער 23סטן אַפּריל, איז טאָני בלער, דער געוועזענער בריטישער פּרעמיער־מיניסטער, אויפֿגעטראָטן אינעם לאָנדאָנער צענ­טער פֿון דער ניו־יאָרקער פֿינאַנציעלער און מעדיאַ־פֿירמע „בלומבערג‟ מיט אַ רעדע קעגן דעם ראַדיקאַלן איסלאַמיזם.

בלער האָט געמאָלדן, אַז דער גורל פֿון מדינת־ישׂראל בלײַבט „אַבסאָלוט וויכטיק פֿאַרן גורל פֿונעם מיטל־מיזרח און דער גאַנצער וועלט‟, און גערופֿן די וועלט „זיך צו שטעלן קעגן דעם איסלאַמישן פֿונדאַמענטאַליזם, און צו שטיצן די פּרינציפּן פֿון רעליגיעזער פֿרײַהייט און אָפֿענע עקאָנאָמיעס‟. דער פּרעמיער האָט אויך געלויבט דעם אַמעריקאַנער מלוכה־סעקרעטאַר, דזשאָן קערי, פֿאַרן אַרײַנלייגן אַ סך מי אינעם ישׂראל־פּאַלעסטינער שלום־פּראָצעס.

דער בריטישער פֿירער האָט געשילדערט דעם מיטל־מיזרחדיקן קאָנפֿליקט ווי אַ „טיטאַ­נישן קאַמף‟ צווישן די, וואָס ווילן „אָנערקענען די מאָדערנע וועלט אינעם פּאָליטישן, סאָציאַלן און עקאָנאָמישן זין‟, און די, „וואָס ווילן שאַפֿן אַ פּאָליטיק פֿון רעליגיעזן אונטערשייד און עקסקלוסיוויזם‟. בלער האָט געמאָלדן, אַז אין דעם באַשטייט דער חילוק צווישן די פּאַלעסטינער פּאַרטייען, אומאָפּהענגיק פֿון די באַציִונגען מיט ישׂראל.

דער בריטישער פּרעמיער האָט צוגעגעבן, אַז הגם ער רופֿט נישט די מערבֿדיקע וועלט זיך אַרײַנצומישן אינעם מיטל־מיזרח דורך מיליטערישע מיטלען, „מיינט עס נישט, אַז מיר דאַרפֿן בלײַבן שטיל‟. בלער האָט באַטאָנט, אַז די אידעאָלאָגיע פֿונעם ראַדיקאַלן פּאָליטישן איסלאַם „קומט אין סתּירה מיט דער מאָדערנער וועלט‟ און „פֿאַרקריפּלט דעם אָריגינעלן באַדײַט פֿון דער מוסולמענישער רעליגיע‟.

דער פּרעמיער האָט אין זײַן רעדע דער­קלערט, אַז די ראַדיקאַלע איסלאַמיסטישע כּוחות „דעסטאַביליזירן גאַנצע גרופּעס און אַפֿילו לענדער‟ און „רײַסן אונטער די מעגלעכ­קייט פֿון פֿרידלעכער מיטעקזיסטענץ אין דער הײַנטיקער תּקופֿה פֿון גלאָבאַליזאַציע.” מדינת־ישׂראל געפֿינט זיך, לויט זײַן מיינונג, אינעם סאַמע צענטער פֿונעם דאָזיקן „שטורעם‟.