פֿאַרכאַפּטער סאָלדאַט איז לעצטנס געוואָרן אַ חתן

Captured Israeli Soldier Just Got Engaged

הדר גאָלדין
הדר גאָלדין

פֿון גייב פֿרידמאַן (Forward)

Published August 01, 2014, issue of August 29, 2014.

עטלעכע וואָכן איידער מע האָט אים געשיקט אין עזה, איז הדר גאָלדין פֿאַרקנסט געוואָרן. איצט זאָרגן זיך די אינסטאַנצן, אַז אַ גרופּע „כאַמאַס‟־מיליטאַנטן האָבן פֿרײַטיק אין דער פֿרי פֿאַרכאַפּט דעם צה״ל־סאָלדאַט, בלויז עטלעכע שעה נאָך דעם ווי מע האָט געהאַט געמאָלדן אַ פֿײַער־איבעררײַס, גיט איבער Times of Israel.

גאָלדין, אַ 23־יאָריקער ענגלאַנד־געבוירענער מיטגליד פֿון דער „גבֿעתי־בריגאַדע‟, איז אַ ווײַטער קרובֿ פֿונעם שוץ־מיניסטער משה יעלון. צה״ל האָט באַשטעטיקט, אַז צוויי אַנדערע סאָלדאַטן פֿון דער „גבֿעתי־בריגאַדע‟ זענען דערהרגעט געוואָרן אינעם אַטאַק, נאָך דעם ווי אַ זעלבסטמערדער פֿון „כאַמאַס‟ האָט זיך אויפֿגעריסן לעבן אַ גרופּע ישׂראלדיקע סאָלדאַטן, און דערנאָך זענען די אַנדערע מיליטאַנטן אַנטלאָפֿן דורכן טונעל.

גאָלדין און זײַן משפּחה זענען פֿרומע עולים פֿון ענגלאַנד. ער האָט אַ צווילינג, צור, אַ שוועסטער, אילת און אַ ברודער, מנחם. הדר און צור האָבן זיך צוזאַמען געלערנט אין דער פֿאַר־מיליטערישער אַקאַדעמיע „בית־דוד‟ און שפּעטער טרענירט ווי אָפֿיצירן אין איינעם. גאָלדינס טאַטע, שׂימחה, איז אַן אָפֿיציר אין די רעזערוון און איז אַ לערער פֿון ייִדישער געשיכטע אין תּל־אָבֿיבֿער אוניווערסיטעט.

ביידע זיידעס האָבן איבערגעלעבט דעם חורבן און געקעמפֿט אין דער ישׂראלדיקער אומאָפּהענגיקייט־מלחמה אין 1948.

בעת אַן אינטערוויו אין אָקטאָבער 2013 מיט Israel National News, האָבן הדר און צור באַטאָנט זייער ליבשאַפֿט פֿאַר ישׂראל. „יעדער האָט אַ ברירה אין לעבן — האָט הדר דעמאָלט געזאָגט — צו טאָן זאַכן פֿאַר זיך, אָדער צו טאָן גרויסע זאַכן פֿאַרן כּלל.‟