50,000 דאָלאַר צו געפֿינען די מערדער פֿונעם רבֿ

Miami Jews offer $50,000 Reward in Rabbi Raksin Killing

די לוויה פֿון הרבֿ יוסף ראַסקין (לינקס) דעם 11טן אויגוסט אין ברוקלין
Getty Images
די לוויה פֿון הרבֿ יוסף ראַסקין (לינקס) דעם 11טן אויגוסט אין ברוקלין

פֿון ייִט״אַ

Published August 11, 2014, issue of August 29, 2014.

מאָנטיק, דעם 11טן אויגוסט, האָט מען אין ברוקלים באַערדיקט דעם דערמאָרדעטן רבֿ יוסף ראַסקין. מיט אַ טאָג פֿריִער, איז אין מיאַמי, וווּ ער איז געווען פֿאַרן טויט, פֿאָרגעקומען די לוויה. דער 60־יאָריקער אָרטאָדאָקסישער רבֿ איז דערשאָסן געוואָרן שבת אינדערפֿרי, אויפֿן וועג צו דער ליובאַוויטשער שיל „בית־מחנם‟, דורך צוויי פֿאַרברעכער. זײַן גוף האָט מען אָפּגעפֿירט אינעם עראָפּאָרט. אויף דער לוויה און קבֿורה האָבן זיך פֿאַרזאַמלט הונדערטער מענטשן.

פֿאַראַכטאָגן דאָנערשטיק, איז ראַסקין אָנגעקומען קיין מיאַמי, כּדי צו פֿאַרברענגען דאָרטן אַ וואָך צוזאַמען מיט זײַן טאָכטער און איר משפּחה. דער אומגעקומענער רבֿ האָט פֿאַראָבֿלט זעקס קינדער און זײַן קהילה אין קראַון־הײַטס, דער ברוקלינער וועלט־צענטער פֿון די ליובאַוויטשער חסידים.

די עדות האָבן איבערגעגעבן, אַז די פֿאַרברעכער זענען געווען צוויי אַפֿראָ־אַמעריקאַנער מענער. לויט דער פּאָליציי, איז אויף דער גאַס אויסגעבראָכן אַ שאַרפֿע קריגערײַ צווישן דעם רבֿ און די אָנפֿאַלער, וועלכע האָבן אַרויסגעכאַפּט די פּיסטוילן און עטלעכע מאָל אויסגעשאָסן. די מענטשן, וועלכע האָבן געזען דעם אינצידענט, זאָגן אָבער, אַז ס׳איז נישט געווען קיין עכטע קריגערײַ. מע האָט געבראַכט דעם רבֿ אין אַ ספּעציעלן טראַוומע־שפּיטאָל, וווּ ער איז ניפֿטר געוואָרן.

די פּאָליציי גלייבט נישט, אַז דער מאָרד האָט געהאַט אַ שײַכות צו אַנטיסעמיטיזם. ס׳זעט אויס, אַז די אָנפֿאַלער האָבן געוואָלט באַרויבן דעם רבֿ. די ייִדישע קהילה פֿון מיאַמי האָט פֿאָרגעלייגט אַ פּרײַז פֿון 50,000 דאָלאַר פֿאַר דער אינפֿאָרמאַציע, וואָס קאָן העלפֿן צו געפֿינען די מערדער.

דעם 28סטן יולי, האָט די שיל „תּורה ואמונה‟, וואָס געפֿינט זיך נישט ווײַט פֿונעם ליובאַוויטשער צענטער, געליטן פֿון וואַנדאַליזם. עמעצער האָט אָנגעצייכנט האַקנקרייצן אויף די ווענט און צוגעגעבן דאָס וואָרט „כאַמאַס‟.