נײַעס פֿון מעלבורן

News From Melbourne

פֿון שרה זילבערמאַן

Published December 09, 2014, issue of January 02, 2015.

דייוויד סאַוטוויק, דזשאַש בורנס געווינען וואַלן אין ראַיאָן מיט אַ סך ייִדישע וויילער

די װעלכע הערן זיך רעגלמעסיק צו צו אונדזער נײַעס פֿון אױסטראַליע װײסן שױן, אַז די קאַנדידאַטן פֿון די צװײ גרעסערע פּאָליטישע פּאַרטײען אין אױסטראַליע, לײבאָר און די ליבעראַלן, אין דער װאַל־געגנט מיט דער גרעסטער ייִדישער באַפֿעלקערונג אין די שטאַטישע װאַלן, װעלכע זײַנען ערשט פֿאָרגעקומען אין דער שטאַט װיקטאָריע, זײַנען געװען ייִדן. מסתּמא װילט איר הערן די רעזולטאַטן פֿון די װאַלן.

דײװיד סאַוטװיק (ליבעראַל) איז געװען דער זיצנדיקער פֿאָרשטײער פֿון דער געגנט קאָלפֿילד אינעם שטאַטישן פּאַרלאַמענט. מע האָט דערװאַרט, אַז ער װעט געװינען די װאַלן פֿאַר זײַן פּאַרטײ און אַזױ איז טאַקע געשען. די לײבאָר פּאַרטײ האָט אָבער געװוּנען די שטאַטישע װאַלן בכלל מיט דער אונטערשטיצונג פֿון כּמעט 2% מער װײלערס װי בײַ די פֿאָריקע װאַלן, װעלכע זײַנען פֿאָרגעקומען מיט דרײַ יאָר צוריק. אין קאָלפֿילד, אָבער, האָט דער לײבאָר קאַנדידאַט דזשאַש בורנס דערװאָרבן 7% מער שטימען װי דער אָרטיקער לײבאָר־קאַנדידאַט האָט באַקומען מיט דרײַ יאָר צוריק. בורנס איז געװען אַזױ צופֿרידן מיט די רעזולטאַטן פֿון די װאַלן אַז ער איז געװאָרן — מיט דער צושטימונג פֿון זײַן חבֿרטע — אַ חתן, גלײַך נאָך דעם װי די װאַל־ערטער האָבן זיך פֿאַרמאַכט.

דער נײַער פּרעזידענט פֿונעם ייִדישן קהילה־ראַט פֿון װיקטאָריע האָט באַדאַנקט דעם געװעזענעם ליבעראַלן פּרעמיער פֿון װיקאָריע און האָט אױסגעדריקט די האָפֿענונג, אַז די ייִדישע קהילה װעט מיטאַרבעטן פּונקט אַזױ גוט מיטן נײַעם לײבאָר פּרעמיער פֿון דער שטאַט. די לײבאָר פּאַרטײ האָט צוגעזאָגט נײַע פֿינאַנציעלע אונטערשטיצונג פֿאַר די ייִדישע טאָגשולן און פֿאַר אַ טײל ייִדישע אינסטיטוציעס אין װיקטאָריע.

כינעזישער פּראָפֿעסאָר פֿון יודאַיסטיק צו גאַסט אין מעלבורן

פּראָפֿעסאָר שו שין
פּראָפֿעסאָר שו שין

דער כינעזישער פּראָפֿעסאָר שו שין פֿונעם אוניװערסיטעט אין נאַנזשינג, כינע, איז געקומען קײן מעלבורן און סידנעי, װוּ ער װעט רעדן אױף דער טעמע ,,פֿאַר װאָס כינעזער פֿאַראינטערעסירן זיך אין ייִדן”. פּראָפֿעסאָר שו שינג האָט זיך צו ערשט באַקענט מיט ייִדן אין 1986, בעת ער האָט געװױנט אַ גאַנצן זמן בײַ אַ ייִדישן אַקאַדעמיקער און זײַן משפּחה אין שיקאַגאָ. ער האָט געגרינדעט קאַטעדרעס פֿון ייִדישע שטודיעס אין 13 כינעזישע אוניװערסיטעטן. אַלע זײַנע גראַדויִר־סטודענטן פֿאַרברענגען צײַט אין מדינת־ישׂראל. פּראָפֿעסאָר שו זאָגט, אַז כינעזער פֿאַראינטערעסירן זיך אין ייִדן און ייִדישע טראַדיציעס װײַל ייִדן האָבן דרך־ארץ פֿאַרן לעבן און פֿאַר אַנדערע מענטשן.

דער בירגער־מײַסטער פֿון סאַלאָניקע מעלדעט װעגן נײַעם דענקמאָל

דער בירגער־מײַסטער פֿון דער גריכישער שטאָט סאַלאָניקע, יאַניס בוטאַריס, װאָס באַזוכט איצט אױסטראַליע, האָט געמאָלדן, אַז זײַן שטאָט װעט אױסגעבן $25,000,000 צו בױען אַ דענקמאָל נאָך די 55,000 לאָקאַלע ייִדן, װעלכע די נאַציס האָבן צוגענומען פֿון דער שטאָט און פֿאַרשיקט קײן אױשװיץ. בוטאַריס האָט אָפֿיציעל זיך אַנטשולדיקט אין נאָװעמבער, װאָס זײַן שטאָט האָט איבערגעגעבן די ייִדן צו די נאַציס.

250 מענטשן זײַנען בײַגעװען אױף אַ ספּעציעלער אונטערנעמונג לכּבֿוד בוטאַריסן אינעם מעלבורנער ייִדישן חורבן־צענטער און מוזעום.

צוזאַמענטרעף פֿון די „דונעראַ בױעס‟

אַכט „דונעראַ בױעס‟ און 70 משפּחה־מיטגלידער זײערע האָבן זיך געטראָפֿן 74 יאָר נאָך דעם װי זײ זײַנען אָנגעקומען אַהער פֿון אײראָפּע אױף דער בריטישער שיף „דונעראַ‟. זײ זײַנען אינטערנירט געװאָרן פֿון דער אױסטראַלישער רעגירונג אין װיקטאָריע און אין ניו־סאַוט װײלס ביז זײ האָבן זיך פֿאַרשריבן צוערשט אין דער בריטישער אַרמײ און דערנאָך אין דער אױסטראַלישער אַרמײ.

אַלע אָנװעזנדיקע האָבן געהערט אַ רעפֿעראַט פֿונעם פֿילממאַכער, װאָס אַרבעט איצט אױף אַ פֿילם װעגן אײנעם פֿון די „בױעס‟ און האָבן אױך געהערט פֿון אַ לאָקאַלן היסטאָריקער װעגן דער מעגלעכקײט, אַז מע װעט פֿאַרגרעסערן דעם „דונעראַ‟־מוזעום אין ניו סאַוט װײלס.

אױסטראַלישע ייִדן פֿײַערן דעם „טאָג פֿאַר מענטשן מיט ספּעציעלע באַדערפֿענישן‟

די ספּאָרט־מאַנשאַפֿטן פֿון „מכּבי‟־אױסטראַליע האָבן אָנטײלגענומען אינעם „אינטערנאַציאָנאַלן טאָג פֿאַר מענטשן מיט ספּעציעלע באַדערפֿענישן‟. די מאַנשאַפֿטן „מכּבי־אױסטראַליע אַלע פֿײקקײטן‟ זײַנען געגרינדעט געװאָרן מיט צען יאָר צוריק.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.