ידיעות פֿון מעלבורן

News From Melbourne

פֿון שרה זילבערמאַן

Published January 12, 2015, issue of February 06, 2015.

2014: די פּאָפּולערסטע נעמען פֿון נײַ־געבױרענע ייִדישע קינדער

די אױסטראַליש־ייִדישע װאָכנשריפֿט „די אױסטראַלישע ייִדישע נײַעס‟ גיט איבער, אַז די פּאָפּולערסטע נעמען פֿון די נײַ־געבױרענע ייִדישע קינדער אין אױסטראַליע במשך פֿונעם יאָר 2014 זײַנען געװען: יעקבֿ, ישי, טבֿיה, זעק, נח, מאַקס, אָשר און לױ — צװישן די ייִנגלעך. די פּאָפּולערסטע נעמען צװישן די מײדלעך זײַנען געװען: איזאַבעל, אָליװיע, פּאָפּי, נינע, אידי, עמילי און עלע. די פּאָפּולערקײט פֿון די נעמען װערט באַזירט אױף די באַצאָלטע אַנאָנסן פֿון געבורטן אין דער װאָכן־שריפֿט במשך פֿונעם יאָר.

ד”ר דזשאָן זאַלצמאַן ווערט באַערט פֿון אָנקאָלאָגן

דער מעלבורנער אָנקאָלאָג ד”ר דזשאָן זאַלצמאַן איז באַערט געװאָרן פֿון דער קלינישער אָנקאָלאָגיע־געזעלשאַפֿט פֿון אױסטראַליע פֿאַר זײַן אַרבעט לטובֿת פּאַציענטן, װעלכע לײַדן פֿון ראַק.

דזשיל מאַרגאָ
Twitter
דזשיל מאַרגאָ

ייִדישער זשורנאַליסט באַערט פֿאַר אַרטיקלען װעגן אױספֿאָרשונג פֿון ראַק

דער זשורנאַליסט דזשיל מאַרגאָ, װאָס דינט װי דער געזונט־רעדאַקטאָר פֿון דער צײַטונג „אָסטרעליען פֿײַנענשל רעװיו‟, איז באַערט געװאָרן מיט דער אױסטראַלישער „לומינוס פּרעמיע‟ פֿאַר אירע אַרטיקלען װעגן נײַע דערגרײכונגען אין דער אױספֿאָרשונג פֿון פֿאַרשײדענע מינים ראַק.

רבנים פֿאַרבעטן גײַסטיקע פֿירער צו רעדן װעגן גײַסטלעכן געזונט

דער „ועד־הרבנים‟ אין דער שטאַט װיקטאָריע האָט פֿאַרבעטן גײַסטיקע פֿירער פֿון אַנדערע גלױבנס אָנטײלצונעמען אין אַ דיסקוסיע װעגן גײַסטלעכן געזונט. רעדנדיק אינעם נאָמען פֿונעם ועד, האָט הרבֿ מרדכי גוטניק באַטאָנט, אַז די רבנים שטאָלצירן דערמיט, װאָס זײער ראַט שפּילט אַן אָנגעזעענע ראָלע בײַם צונױפֿברענגען גײַסטלעכע פֿון פֿאַרשײדענע פֿעלקער און רעליגיעס.

400 ייִדישע יוגנטלעכע פֿאָרן קײן מדינת־ישׂראל

סוף יאַנואַר פֿאָרן 400 אױסטראַלישע ייִדן אין עלטער פֿון 17 ביז 30 יאָר קײן ישׂראל. זײ װעלן בלײַבן דאָרטן צװישן פֿינף חדשים און אַ יאָר, און אָנטײלנעמען אין אַ רײ פּראָגראַמען, װעלכע קומען פֿאָר אין פֿאַרשײדענע שטעט.

קינדער שטיצן אונטער דעם שלום אױף װעלאָסיפּעדן

אַ ייִנגל אין זעקסטן קלאַס, פֿון אַ סיקישער משפּחה, האָט אָרגאַניזירט אַ גרופּע פֿאָלקשול־תּלמידים און תּלמידות פֿון אַ רײ פֿעלקער און רעליגיעס, צו פֿאָרן דורך דער אױסטראַלישער הױפּטשטאָט, קאַנבערע, אױף זײערע װעלאָסיפּעדן אין אײנעם מיט זײערע עלטערן. במשך פֿונעם טאָג האָבן זײ באַזוכט דעם לאָקאַלן ייִדישן צענטער, דעם קריסטלעכן צענטער, דעם איסלאַמישן צענטער, דעם הינדו־צענטער, דעם סיק־צענטער, דעם בודישן צענטער און דעם באַהײַ־צענטער, װי אַ טײל פֿונעם ערשטן יערלעכן צוזאַמענפֿאָר לטובֿת דעם שלום.

דער אױספֿיר־קאָמיטעט פֿאַרן קאָנצערט „אין אײן קול‟

דער נײַער אױספֿיר־קאָמיטעט פֿאַרן מעלבורנער „אין אײן קול‟־קאָנצערט, אַ קולטור־פּּראָיעקט, װאָס װערט דורכגעפֿירט פֿונעם מעלבורנער ייִדישן קולטור־צענטער „קדימה‟, און פֿון דער יוגנט-גרופּע פֿונעם ייִדישן אַרבעטער־בונד, דעם „סקיף‟, האָט געמאָלדן, אַז ער אַרבעט דורכן אױסטראַלישן זומער, כּדי צו פֿאַרזיכערן, אַז דער ייִדישער פֿאָלקס־פֿעסטיװאַל, װאָס װעט פֿאָרקומען אין מאַרץ 2015, װעט זײַן אַ דערפֿאָלגרײַכער.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.