פּראָגראַם וועט ווײַזן ווי אַרײַנצונעמען מענטשן מיט אַ מום

Program To Teach How to Include the Disabled

דזשאַרעט ראַטנער, אַ ייִנגל וואָס לײַדט פֿון אַ זעלטענער קראַנקייט, פּראַוועט זײַן בר־מיצווה דורך חב״ד, אין טשאַפּאַקוואַ, נ״י
Vos iz Neias
דזשאַרעט ראַטנער, אַ ייִנגל וואָס לײַדט פֿון אַ זעלטענער קראַנקייט, פּראַוועט זײַן בר־מיצווה דורך חב״ד, אין טשאַפּאַקוואַ, נ״י

פֿון ייִט״אַ

Published January 16, 2015, issue of February 06, 2015.

די „רודערמאַן משפּחה פֿונדאַציע‟ האָט, בשותּפֿות מיט חב״ד־ליובאַוויטש, לעצטנס אויפֿגעשטעלט אַ פֿאָנד פֿון 1 מיליאָן דאָלער, צו דערמעגלעכן דער ייִדישער קהילה זיך צו באַציִען צו מענטשן מיט אַ מום אויף אַ מער וואַרעמען, סענסיטיוון אופֿן.

די סובסידיע איז די גרעסטע, וואָס די פֿונדאַציע האָט אַ מאָל געשאָנקען אַ רעליגיעזער אָרגאַניזאַציע, האָט די פֿונדאַציע דינסטיק דערקלערט אין אַ פּרעסע־קאָמוניקאַט.

„דער חב״ד האָט שלוחים אין כּמעט יעדער ייִדישער קהילה איבער דער וועלט, רעפּרעזענטירט ער דעריבער איינעם פֿון די שטאַרקסטע, השפּעהדיקסטע קירובֿ־מיטלען בײַ ייִדן,‟ האָט דזשיי רודערמאַן, דער פּרעזידענט פֿון דער „רודערמאַן משפּחה פֿונדאַציע‟ דערקלערט.

די סובסידיע וועט פֿינאַנצירן קורסן, וואָס וועלן ווײַזן די ייִדישע קהילה־פֿירער כּלערליי סטראַטעגיעס, וואָס דערמעגלעכן מענטשן מיט אַ מום, אַלט און יונג, זיך צו פֿילן באַקוועם בײַ די כּלערליי אונטערנעמונגען און פּראָגראַמען אין דער ייִדישער קהילה. מע וועט אויך טרענירן יונגע רבנים און אויפֿפּאַסער פֿון די זומער־לאַגערן ווי אַרײַנצונעמען די אינוואַלידן ווי אייגענע. מע וועט אויספּראָבירן דעם נײַעם צוגאַנג אין 25 באַשטימטע ייִדישע קהילות, האָט די פֿונדאַציע באַטאָנט.

רודערמאַן האָט באַמערקט, אַז דער ליובאַוויטשער רבי, מנחם־0מענדל שניאורסאָן, האָט געלערנט, אַז „יעדער ייִד איז גלײַך און יעדער ייִד איז אַ חשובֿער טייל פֿון אונדזער קהילה, ניט געקוקט אויף זײַנע פֿעיִקייטן‟. רודערמאַן האָט אויך געזאָגט: „אונדזער צוזאַמענאַרבעט מיט חב״ד וועט פֿאַרזיכערן, אַז די ווערטער פֿונעם רבין זאָלן אָנגענומען ווערן בײַ אַלע ייִדן.‟

די דירעקטאָרין פֿון דער פּראָגראַם, ד״ר שׂרה קראַנץ־צימענט, האָט אינעם זעלבן קאָמוניקאַט דערקלערט: „די איניציאַטיוו וועט ענדערן דעם צוגאַנג פֿון ייִדן איבער דער וועלט און דערמעגלעכן צו שאַפֿן אַ סבֿיבֿה, וווּ יעדער וועט זיך פֿילן ווי בײַ זיך אין דער היים.‟