ידיעות פֿון מעלבורן

News From Melbourne

איתן דרורי (צווייטער פֿון רעכטס), דער אויסטראַלישער פֿאָרשטייער אויף דער קאָנפֿערענץ אין הרצליה וועגן ישׂראל־בירגער, וועלכע וווינען אין די תּפֿוצות, דעם 6טן מאַרץ
www.jwire.com.au
איתן דרורי (צווייטער פֿון רעכטס), דער אויסטראַלישער פֿאָרשטייער אויף דער קאָנפֿערענץ אין הרצליה וועגן ישׂראל־בירגער, וועלכע וווינען אין די תּפֿוצות, דעם 6טן מאַרץ

פֿון שרה זילבערמאַן

Published March 23, 2015, issue of April 17, 2015.

ישׂראלדיקע בירגער אין אױסטראַליע

אַן אָנשטענדיקער בירגער פֿון מדינת־ישׂראל װאָס װױנט איצט אין אױסטראַליע, איתּן דרורי, האָט פֿאָרגעשטעלט ישׂראלים אין אױסטראַליע בײַ אַ קאָנפֿערענץ אין הרצליה װעגן די ישׂראלדיקע בירגער, װעלכע װױנען אין די תּפֿוצות. דעלעגאַטן פֿון אױסטראַליע, ענגלאַנד, אַמעריקע, קאַנאַדע, דײַטשלאַנד, האָלאַנד און אונגאַרן זײַנען זיך צונױפֿגעקומען אַרומצורעדן דאָס שותּפֿות צװישן דער ישׂראלדיקער רעגירונג און אירע בירגער, װעלכע װױנען אין די תּפֿוצות.

רוף אָנצורופֿן אַ מעלבורנער געגנט אױפֿן נאָמען פֿון דזשאָן מאָנאַש

אַ מעלבורנער פּאָליטיקער האָט פֿאָרגעלײגט, אַז די װאַלן־געגנט „מעלבורן פּאָרטס‟, נאָכן אַלטן מעלבורנער האַפֿן, זאָל בײַטן איר נאָמען אױף „מאָנאַש‟, אין אָנדענק פֿונעם אױסטראַלישן ייִדישן גענעראַל סער דזשאָן מאָנאַש, װאָס האָט אָנגעפֿירט מיט דער אױסטראַלישער אַרמײ בעתן צװײטן טײל פֿון דער ערשטער װעלט־מלחמה. מאָנאַש איז געבױרן געװאָרן מיט 150 יאָר צוריק, אין 1865, אין מעלבורן. פֿיל ייִדן װױנען אין דער געגנט, װאָס האָט אַ ייִדישן פֿאָרשטײער אין דער פֿעדעראַלער רעגירונג. עס עקזיסטירט שױן אַ פֿאָרשטאָט אין מעלבורן אױף מאָנאַשס נאָמען, און אױך אַ װאַלן־געגנט אױף זײַן נאָמען, װוּ עס װױנען נישט אַזױ פֿיל ייִדן, נאָר זי האָט סײַ־װי־סײַ אַ ייִדישן פֿאָרשטײער אין דער פֿעדעראַלער רעגירונג.

11 געליטענע פֿאָדערן רעזיגנאַציעס

11 געװעזענע תּלמידים פֿון דער מעלבורנער ישיבֿה־טאָגשול, װעלכע האָבן געליטן סעקסועלע מיסברױכן בעת זײ האָבן זיך געלערנט דאָרטן, האָבן געפֿאָדערט, אַז די גאַנצע עקסיסטירנדיקע אָנפֿירערשאַפֿט פֿון דער ישיבֿה־טאָגשול זאָל פֿאַרעפֿנטלעכט װערן בײַ דער קיניגלעכער קאָמיסיע אױסצופֿאָרשן די רעאַקציעס פֿון אינסטיטוציעס אויף די פֿאַלן, װען קינדער אין זײער רשות האָבן געליטן צוליב דעם, װאָס סעקסועלע מיסברױכן זײַנען באַגאַנגען געװאָרן קעגן זײ. עס איז געװאָרן קלאָר, אַז די אָנפֿירערשאַפֿט פֿון דער ישיבֿה האָט יאָ געװוּסט װעגן די מיסברױכן און האָט זײ געפּרוּװט פֿאַרדעקן. די קאָמיסיע האָט געמאָלדן די װאָך, אַז אַ קאַטױלישער בישקאָפּ װעט גערופֿן װערן אין געריכט פֿאַר פּרוּװן פֿאַרדעקן ענלעכע מיסברױכן.

די מעלבורנער ישיבֿה האָט געמאָלדן, אַז זי שאַפֿט אַן אומאָפּהענגיקן קאָמיטעט, װאָס זאָל העלפֿן די געליטענע און זײערע משפּחות. זי װעט אױך פֿירן דיסקוסיעס מיט עלטערן און מיט אַנדערע מיטגלידער פֿון דער ישיבֿה־סבֿיבֿה װעגן דער אָנפֿירונג פֿון דער טאָגשול. דערצו װעט זי אָנהײבן אַן אומאָפּהענגיקע אױספֿאָרשונג פֿון דער אָנפֿירונג פֿונעם ישיבֿה־צענטער.

ייִדישער הילפֿס־פֿאָנד אַפּעל 2015

דער ייִדישער הילפֿס־פֿאָנד אין דער שטאַט װיקטאָריע האָט אָנגעהױבן זײַן יערלעכן אַפּעל צװישן דער ייִדישער באַפֿעלקערונג. די געלטער, װעלכע דער אַפּעל ברענגט אַרײַן פֿינאַנצירט די אַקטיװיטעטן פֿונעם הילפֿס־פֿאָנד, װעלכע װערן ניט פֿינאַנצירט דורך דער רעגירונג.

אַ פֿעסטיװאַל פֿון ישׂראל-פּראָגראַמען

די ציוניסטישע פֿעדעראַציע פֿון אױסטראַליע האָט געמאָלדן אַ ספּעציעלן פֿעסטיװאַל, װאָס װעט איבערגעבן די פֿאַראינטערעסירטע אױסטראַלישע ייִדן אין עלטער פֿון 18 ביז 30 יאָר אינפֿאָרמאַציע װעגן אַ רײ פּראָגראַמען אין מדינת־ישׂראל פֿאַר יוגנטלעכע פֿון די תּפֿוצות. דער פֿעסטיװאַל װעט הײסן „דער שוק‟.

קורס װעגן חורבן־אײראָפּע בײַם מעלבורנער חורבן־צענטער און מוזעום

דער מעלבורנער חורבן־צענטער אָרדנט אײַן אַן אינפֿאָרמאַציע־אָװנט װעגן איר קורס „חורבן־אײראָפּע‟, װאָס װעט באַשטײן פֿון 17 סעסיעס. די סעסיעס װעלן אַרומנעמען אַזעלכע טעמעס װי אײראָפּע פֿאַרן חורבן, נאַצישער פּאָליטיק און איר אימפּלעמענטאַציע, די באַפֿרײַונג, און נאָך. דער צענטער געפֿינט זיך אין דער מעלבורנער פֿאָרשטאָט עלסטערנװיק.

„בני־ברית‟: קונסט־פֿאַרמעסט פֿאַר קינדער און יוגנט

די „בני־ברית‟־אָרגאָניזאַציע אין מעלבורן האָט געמאָלדן אַ יערלעכן קונסט־פֿאַרמעסט פֿאַר קינדער אין עלטער פֿון צװישן 11 און 13 יאָר און צװישן 14 און 15 יאָר. זי פֿירט אױך אָן מיט אַ פֿאַרמעסט פֿאַר יוגנטלעכע אין עלטער פֿון צװישן 16 און 18 יאָר. שױן 20 יאָר װי די אָרגאַניזאַציע פֿירט אָן מיט דעם פֿאַרמעסט.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.