דרײַ רבנים זענען פֿאַרמישפּט געוואָרן אין גט־פֿאַרכאַפּונג

Three Rabbis Convicted of Religious Divorce Kidnapping

פֿון ייִט״אַ

Published April 23, 2015, issue of May 15, 2015.

דזשיי גאָלדשטיין, איינער פֿון די באַשולדיקטע
YouTube
דזשיי גאָלדשטיין, איינער פֿון די באַשולדיקטע

דרײַ רבנים זענען פֿאַרמישפּט געוואָרן דורך אַ פֿעדעראַל געריכט אין טרענטאָן, שטאַט ניו־דזשערזי, פֿאַרן פּלאַנירן צו פֿאַרכאַפּן אַ צאָל ייִדישע מענער, כּדי צו צווינגען זיי צו געבן זייערע פֿרויען אַ גט.

דינסטיק, האָט דאָס געריכט פֿאַרמישפּט געוואָרן די דרײַ רבנים אינעם פּלאַנירן צוזאַמען פֿאַרכאַפּן די מענער, און צוויי פֿון זיי — אויך אינעם פּרוּוון דורכצופֿירן דעם פּלאַן.

נאָך אַ צוויי־חדשימדיקן מישפּט איבערן 69־יאָריקן מענדל עפּשטיין פֿון לייקוווּד, ניו־דזשערזי, דעם 60־יאָריקן דזשיי גאָלדשטיין פֿון ברוקלין, און דעם 39־יאָריקן בנימין שטימלער, אויך פֿון ברוקלין, האָבן די אײַנגעשוווירענע געפֿירט דעבאַטן במשך פֿון דרײַ טעג. די פֿאַרמישפּטע זענען אַ טייל פֿון אַ געהיימער גרופּע, וועלכע האָט אויסגענוצט גוואַלד־מיטלען, אַרײַנגערעכנט קלעפּ, עלעקטרישן שאָק און אַנדערע מינים פּײַניקונגען, כּדי צו צווינגען געוויסע מענער זיך צו גטן. על־פּי־הלכה, מוז די פֿרוי באַקומען פֿון איר מאַן אַ גט דורך אַ בית־דין, כּדי צו האָבן די מעגלעכקייט צו גיין אונטער דער חופּה מיט אַן אַנדער מאַן.

די „עף־בי־אײַ‟ האָט געכאַפּט די פֿאַרברעכערישע גרופּע אין אָקטאָבער 2013. די געהיימע אַגענטן האָבן זיך פֿאַרשטעלט ווי אַ ייִדישע פֿרוי, וועלכע האָט, צוזאַמען מיט איר ברודער, געבעטן די באַנדיטן צו קריגן דעם גט פֿון איר מאַן, וועלכער מע האָט פּלאַנירט, כּלומרשט, צו פֿאַרכאַפּן אויף אַ סקלאַד, וואָס געפֿינט זיך אין דער שטאָט עדיסאָן, שטאַט ניו־דזשערזי. ווען די פֿאַרברעכער זענען אַהין אָנגעקומען, אָנגעטאָן אין מאַסקעס מיט זייער „אויסשטאַטונג‟ — אַ שטאַרקע שטריק, כירורגישע מעסערס און אַ שרויפֿנציִער, האָט די פּאָליציי זיי אַרעסטירט.

די פֿאַרמישפּטונגען זענען פֿאָרגעקומען מיט דרײַ חדשים נאָך דעם, ווי דער 56־יאָריקער רבֿ מאַרטין וואָלמאַרק פֿון מאָנסי, האָט זיך מודה געווען אינעם באַטייליקן זיך אין די געהיימע פּלענער פֿון דער צוואַנג־אָרגאַניזאַציע. דעם 18טן מײַ וועט ער פֿאַרמישפּט ווערן. די נײַעס־אַגענטור „רויטערס‟ האָט איבערגעגעבן, אַז לויט דער פּראָקוראַטור פֿון די פֿאַראייניקטע שטאַטן, קאָן פֿאַר אַזעלכע פֿאַרברעכערישע פּלענער באַקומען אַ לעבנס־לאַנגן תּפֿיסה־טערמין. די דרײַ רבנים וועלן זיך דערוויסן וועגן זייערע שטראַפֿן דעם 15טן יולי.