ISIS נעמט אַחריות פֿאַר טעקסאַס־שיסערײַ

ISIS Claims Responsibility for Texas Shooting

פֿון „פֿאָרווערטס‟־רעדאַקציע

Published May 05, 2015, issue of May 29, 2015.

פּאַמעלאַ געלער, וועלכע האָט אָרגאַניזירט די אַנטי־מאָהאַמעד קונסט־אויסשטעלונג, וואָס די טעראָריסטטן האָבן אַטאַקירט
פּאַמעלאַ געלער, וועלכע האָט אָרגאַניזירט די אַנטי־מאָהאַמעד קונסט־אויסשטעלונג, וואָס די טעראָריסטטן האָבן אַטאַקירט

דינסטיק האָט די דזשיהאַד־אָרגאַניזאַציע ISIS דערקלערט, אַז זי טראָגט דאָס אַחריות פֿאַרן אַטאַק מצד צוויי מיליטאַנטן, זונטיק, אויף אַ בנין אין גאַרלאַנד, טעקסאַס, בעת אַן אויסשטעלונג פֿון מאָהאַמעד־קאַרטונס. ס׳איז דאָס ערשטע מאָל, וואָס ISIS זאָגט, אַז זי האָט דורכגעפֿירט אַן אַטאַק אין די פֿאַראייניקטע שטאַטן.

אַ זיכערהייט־וועכטער איז פֿאַרוווּנדיקט געוואָרן אין פֿוס, אָבער קיינער פֿון די באַזוכער פֿון דער אויסשטעלונג איז נישט פֿאַרוווּנדיקט געוואָרן. ביידע מיליטאַנטן, עלטאָן סימפּסאָן און נאַדיר סופֿי — ביידע פֿון פֿיניקס, אַריזאָנע — זענען דערשאָסן געוואָרן אויף טויט. סימפּסאָן איז זינט 2006 געווען פֿאַרדעכטיקט דורך דער „עף־בי־אײַ‟ ווי אַ סימפּאַטיזירער פֿון דזשיהאַד און איז אַרעסטירט געוואָרן אין 2010 פֿאַר פּרוּוון זיך אָנשליסן אין אַ דזשיהאַד־גרופּע אין סאָמאַליע.

די „מאָהאַמעד קונסט־אויסשטעלונג און קאָנקורס‟ איז אָרגאַניזירט געוואָרן פֿון דער „איניציאַטיוו צו פֿאַרטיידיקן די אַמעריקאַנער פֿרײַהייט‟ (AFDI) — אַ קערפּערשאַפֿט אָנגעפֿירט פֿון דער אַנטי־איסלאַם אַקטיוויסטקע פּאַמעלאַ געלער, וועלכע האָט לעצטנס אָנגעקלאָגט דער ניו־יאָרקער טראַנספּאָרטאַציע־אינסטאַנץ, כּדי צו צווינגען די אַגענטור צו דערלויבן אַנטי־מוסולמענישע רעקלאַמעס אויף די אונטערבאַן־סטאַנציעס.

שוין יאָרן לאַנג, וואָס געלערס קריטיקער באַצייכענען זי ווי אַן איסלאַמאָפֿאָבישע עקסטרעמיסטין. אָבער געלער איז הײַנט אַ ממשותדיקער כּוח אין דער אַנטי־איסלאַם באַוועגונג דאָ אין די פֿאַראייניקטע שטאַטן.

ווי עס גיט איבער פּאָל בערגער אינעם Forward, באַקומט די „איניציאַטיוו‟ אַלץ מער און מער פֿאָנדן פֿון אירע פֿינאַנציעלע שטיצער. אין 2013 האָט זי באַקומען כּמעט $960,000, לויט דער לעצטער שטײַער־דעקלעראַציע. דאָס איז אויף $160,000 מער ווי אין 2012, און $19,000 מער ווי אין 2011, ווען די אָרגאַניזאַציע איז געגרינדעט געוואָרן. ווי אַ פּועל־יוצא האָט די „איניציאַטיוו‟ אויסגעגעבן כּמעט $400,000 אין 2013 אין קאַמפּאַניעס קעגן, ווי זי רופֿט עס, דעם „פֿאַרראַט‟ מצד דער פֿעדעראַלער און די שטאַט־רעגירונגען, און מצד דער מעדיאַ „וואָס שייך זײער קאַפּיטולאַציע פֿאַרן גלאָבאַלן דזשיהאַד און דער איסלאַמישער העגעמאָניע… און זייערע באַמיִונגען אַרויפֿצוצווינגען סאָציאַליזם און מאַרקסיזם אויף די אַמעריקאַנער בירגער‟.

אינעם זעלבן יאָר, האָט די אָרגאַניזאַציע צום ערשטן מאָל באַצאָלט געלערן שׂכירות פֿון כּמעט $200,000.

געלער, וואָס איז אַ ייִדישע טאָכטער, האָט נישט געענטפֿערט אויף די פֿראַגעס פֿונעם Forward, וואָס שייך דער אידענטיטעט פֿון די הויפּט־פֿינאַנציעלע שטיצער פֿון דער „איניציאַטיוו‟.

געלער, אַ פֿאַרמעגלעכע געגטע פֿרוי און מאַמע פֿון פֿיר קינדער אין לאָנג־אײַלאַנד, האָט אָנגעהויבן איר אַקטיוויזם אין 2005, דורך אַ בלאָג, Atlas Shrugs — אַ רעאַקציע אויף די אַטאַקן פֿונעם 11טן סעפּטעמבער. דער נאָמען פֿון דער וועבזײַט איז אַ רמז אויף דער קאָנטראָווערסאַלער ליבערטאַריאַנער שרײַבערין, אַן ראַנד, וואָס איר ראָמאַן, Atlas Shrugged, פּובליקירט אין 1957, האָט געוואָרנט וועגן די סכּנות פֿון אַ רעגירונג, וואָס שפּילט אַ צו־אַקטיווע ראָלע אינעם לעבן פֿון אירע בירגער.

געלער האָט אָנגעפֿירט מיט אַ קאַמף קעגן אַן אַראַביש־שפּראַכיקער שול אין ברוקלין און קעגן דעם פֿאָרגעלייגטן איסלאַמישן צענטער Park 51, וואָס מע האָט געזאָלט בויען צוויי גאַסן פֿון „גראַונד זעראָ‟, אין מאַנהעטן.

במשך פֿון די פֿאַרגאַנגענע צען יאָר, האָט איר בלאָג געשילדערט די מערבֿדיקע געזעלשאַפֿט ווי איינע, וואָס האַלט אָט־אָט בײַם אונטערגיין; אַז די יודעאָ־קריסטלעכע ציוויליזאַציע איז אונטער אַ כּסדרדיקן אַטאַק פֿונעם ראַדיקאַלן איסלאַם, און אַז מע וועט אין דער נאָענטער צוקונפֿט אפֿשר אַפֿילו אײַנפֿירן „שאַריאַ‟־געזעצן אין אייראָפּע און אַמעריקע. אין 2013 האָט ענגלאַנד פֿאַרווערט געלער און ראָבערט ספּענסער, אַ מיטגרינדער פֿון דער „איניציאַטיוו‟, אַרײַנצוקומען אין לאַנד, באַצייכענענדיק זיי ווי פֿירער פֿון „אַנטי־מוסולמענישע שׂינאה־אָרגאַניזאַציעס‟.

פֿאַר דער שיסערײַ אין גאַרלאַנד, איז געלערס „איניציאַטיוו‟ געווען צום בעסטן באַקאַנט פֿאַר אירע קאָנטראָווערסאַלע רעקלאַמעס, וואָס מע האָט געקאָנט זען אויף די באַן־סטאַנציעס אין ניו־יאָרק, באָסטאָן און פֿילאַדעלפֿיע, מיט די אויפֿשריפֿטן „די איסלאַמישע שׂינאה קעגן ייִדן געפֿינט זיך אינעם קאָראַן‟ און „אין יעדער מלחמה צווישן דעם ציוויליזירטן מענטש און דעם פּרא־אָדם, זאָלט איר שטיצן דעם ציוויליזירטן. שטיצט ישׂראל. באַזיגט דזשיהאַד‟.

אַ סך שטאָט־אינסטאַנצן האָבן פּראָטעסטירט קעגן די רעקלאַמעס, אָבער מיט דער הילף פֿון אַן אַנטי־איסלאַמישן אַדוואָקאַט, דוד ירושלמי, האָט די „אינציאַטיוו‟ באַוויזן אין געריכט, אַז ס׳איז אַן ענין פֿון וואָרטפֿרײַהייט, האָבן די שטאָטישע טראַנספּאָרטאַציע־אַגענטורן נישט געהאַט קיין ברירה.

געלער איז בכלל אַ שטאַרקע פֿאַרטיידיקערין פֿון וואָרטפֿרײַהייט. מיט צען יאָר צוריק האָט זי פּובליקירט אויף איר בלאָג קאָנטראָווערסאַלע קאַרטונס פֿון מאָהאַמעד, וואָס האָבן זיך פֿריִער באַוויזן אין אַ דענישער צײַטונג, און דערבײַ אַרויסגערופֿן בלוטיקע פּראָטעסטן און טויט־דראָונגען. די אויסשטעלונג אין גאַרלאַנד די וואָך איז געווען, צום טייל, אַ רעאַקציע אויפֿן טעראָריסטישן אַטאַק מצד די מוסולמענישע עקסטרעמיסטן אויף דער סאַטירישער פֿראַנצייזישער צײַטונג „שאַרלי העבדאָ‟, וואָס האָט אויך פּובליקירט בילדער פֿון מאָהאַמעד. די „איניציאַטיוו‟ האָט אויסגעגעבן $10,000 אויף זיכערהייט־מיטלען צו באַשיצן די באַזוכער פֿון דער אויסשטעלונג.

בעת דער אונטערנעמונג האָבן געלער, ספּענסער און גערט ווילדערס, אַ האָלענדישער אַנטי־איסלאַמיסט, וועלכער האָט געהאַלטן אַ רעדע דאָרט, אַפֿילו נישט געוווּסט וועגן דער שיסערײַ וואָס קומט פֿאָר אין דרויסן. די צוויי טעראָריסטן זענען דערשאָסן געוואָרן, איידער זיי האָבן געקאָנט אַרײַנגיין אין בנין.