ידיעות פֿון מעלבורן

News From Melbourne


פֿון שרה זילבערמאַן

Published May 26, 2015, issue of June 12, 2015.

מעלבורן גרײט זיך צום ערשטן ייִדישן קאָמעדיע־פֿעסטיװאַל

ייִדישע קאָמיקער פֿון אױסטראַליע און אין אױסלאַנד האָבן ביז סוף חודש צײַט אױסצודריקן אַן אינטערעס אָנטײלצונעמען אינעם ערשטן מעלבורנער ייִדישן קאָמעדיע־פֿעסטיװאַל, װאָס װעט פֿאָרקומען אין אָקטאָבער, 2015. דער פֿעסטיװאַל װעט דױערן אײן װאָך. סידנעי האָט שױן אַן ענלעכן פֿעסטיװאַל פֿאָרצושטעלן ייִדישע קאָמיקערס.

פֿײַערונג פֿון 70 יאָר „בני־ברית‟ אין װיקטאָריע

„בני־ברית װיקטאָריע‟ פֿײַערט 70 יאָר נאָך דעם װי זי איז געגרינדעט געװאָרן אין מעלבורן אין 1945. דער הױפּט־רעדנער בײַ דער אונטערנעמונג װעט זײַן דער לאָקאַלער ריכטער האַואַרד נײטען.

די אַנטי־דעפֿאַמאַציע־קאָמיסיע פֿון „בני־ברית אױסטראַליע‟ טאַדלט די פֿירמע „אַמאַזאָן‟

די אַנטי-דעפֿאַמאַציע־קאָמיסיע פֿון „בני־ברית אױסטראַליע‟ האָט געטאַדלט די פֿירמע „אַמאַזאָן‟ פֿאַרן פֿאַרקױפֿן ביכער, װעלכע לײקענען דעם חורבן. לױטן אױסטראַלישן געזעץ טאָר מען נישט לײקענען דעם חורבן פֿון אײראָפּעיִשן ייִדנטום.

„זמריה‟-קאָנצערט אין מעלבורן

דער מעלבורנער רעפֿאָרם־טעמפּל „בית־ישׂראל‟ אָרדנט אײַן אַ „זמריה‟־קאָנצערט פֿון ייִדישער מוזיק סוף חודש. עס װעלן אָנטײלנעמען די מעלבורנער קלעזמער־קאַפּעליע „קלעזמאַניע‟ און אױך ייִדישע מוזיקערס און זינגערס, װעלכע זײַנען אַ טײל פֿונעם טעמפּלס גרױסער סבֿיבֿה.  

אַ רעפֿעראַט װעגן ייִדישן לעבן אינעם שאַנגהײַער געטאָ

סעם מאָשינסקי, װאָס איז אַלײן געװען אַן אײַנװױנער פֿונעם שאַנגהײַער געטאָ, צוזאַמען מיט זײַנע עלטערן, װעט רעדן װעגן דעם געטאָ־לעבן בײַם געזעלשאַפֿטלעכן קלוב בײַם מעלבורנער חורבן־צענטער און מוזעום. 

רעפֿעראַט װעגן אונגאַרישן ייִדנטום

אַ רעפֿעראַט װעגן דער קולטור־ירושה און דעם המשך פֿון אונגאַרישן ייִדנטום  װערט געהאַלטן אין אונגאַריש בײַם ייִדישן חורבן־צענטער און מוזעום אין דער מעלבורנער פֿאָרשטאָט עלסטערנװיק.

ייִדן װעלן אַרױסהעלפֿן אין דער אױספֿאָרשונג פֿון כּשרע עסנס

דער עקזעקוטיװ־ראַט פֿון אױסטראַלישן ייִדנטום װעט אַרױסהעלפֿן אין דער אױספֿאָרשונג פֿון כּשרע עסנס אין אױסטראַליע אונטער דער השגחה פֿון דער אױסטראַלישער רעגירונג. די רעגירונג װעט גלײַכצײַטיק אױספֿאָרשן כאַלאַל־עסנס און אָרגאַנישע עסנס, װעלכע װערן פֿאַרקױפֿט אין אױסטראַליע. די רעגירונג װיל דערגײן צי קונים װײסן גענוג װעגן דעם פּראָצעס פֿון צוגרײטן די עסנס צום פֿאַרקױפֿן און אױך אױף װאָס די צוגרײטער געבן אױס די געלטער, װעלכע זײ נעמען אײַן.

גערער חסידים האָבן געהאַט אַ דעה אין אַ מעלבורנער סקאַנדאַל

דאָס װיקטאָרישע הױפּט־געריכט אין מעלבורן האָט געהערט די װאָך, אַז אַ גרופּע גערער חסידים אין מדינת־ישׂראל האָט געהאַט אַ דעה אינעם סקאַנדאַל בײַ דער מעלבורנער חרדישער טאָגשול „עדת־ישׂראל‟, װוּ אַ געװעזענע מיטאַרבעטערין װערט באַשולדיקט אין האָבן באַגאַנגען סעקסועלע מיסברױכן קעגן אַ גרופּע תּלמידות פֿון דער טאָגשול. רביצין מלכּה לײפֿער האָט געלערנט אין אַ גערער מײדל־שול אין מדינת־ישׂראל אײדער זי איז אָנגעשטעלט געװאָרן צו אַרבעטן בײַ דער „עדת־ישׂראל טאָגשול‟ אינעם יאָר 2000.                                               אַ געװעזענער פּרנס פֿון דער מעלבורנער „עדת־ישׂראל‟־שול האָט געזאָגט אין געריכט, אַז ער האָט נישט געװוּסט פֿאַרװאָס די גערער האָבן געװאָלט, אַז רביצין לײפֿער זאָל פֿאַרלאָזן זײער שול. ער האָט געזאָגט, אַז די מעלבורנער האָבן נאָר געהערט גוטע זאַכן װעגן רביצין לײפֿער פֿון די גערער אײדער זי איז אָנגעשטעלט געװאָרן.

דער ריכטער פֿונעם הױפּט־געריכט האָט געפֿרעגט, פֿאַר װאָס עס שטײט געשריבן אױף לײפֿערס אימיגראַציע אַפּליקאַציע, אַז זי גײט אַרבעטן װי די פֿאַרװאַלטערין פֿון דער „עדת־ישׂראל־קינדערשול‟ אין מעלבורן. דער שולס אַדװאָקאַט זאָגט איצטער, אַז רביצין לײפֿער האָט געדינט װי דער הױפּט פֿון ייִדישע שטודיעס אין דער טאָגשול און נישט װי קײן פֿאַרװאַלטערין. דער ריכטער זאָגט, אַז אַזאַ ענדערונג איז קײן מאָל נישט געמאַכט געװאָרן אין די פּאַפּירן, װעלכע געפֿינען זיך בײַ דעם אימיגראַציע־מיניסטאָריום. דער מישפּט גײט װײַטער אָן.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.