„כעזבאָלאַ‟ — אַ פֿרײַנד פֿון פּוטינס רוסלאַנד

Hezbollah - a Friend of Putin's Russia

די זשורנאַליסטקע פֿון דער מאָסקווער צײַטונג דאַריאַ אַסלאַמאָוואַ מיט נאַיִם קאַסעם
Dariya Aslamova
די זשורנאַליסטקע פֿון דער מאָסקווער צײַטונג דאַריאַ אַסלאַמאָוואַ מיט נאַיִם קאַסעם

פֿון גענאַדי עסטרײַך

Published July 05, 2015, issue of July 24, 2015.

ווען איך בין געווען ייִנגער, פֿלעג זיך מיר עפּעס חלומען כּמעט יעדע נאַכט. איצט מאַכט זיך עס זעלטן. און אפֿשר זע איך אַ חלום, אָבער מײַן סקלעראָטישער מוח פֿאַרגעסט אים גלײַך. אָבער דאָ האָב איך זיך פּלוצעם אויפֿגעכאַפּט נאָך אַזאַ קאָשמאַר: רוסלאַנד האָט כּלומרשט (אָדער „חלומיש‟) געמאָלדן, אַז זי דערקלערט אָפֿיציעל אַ מלחמה־צושטאַנד מיט די פֿאַראייניקטע שטאַטן. נאָך איידער איך האָב געעפֿנט די אויגן, איז מיר געקומען דער געדאַנק, אַז איך דאַרף פֿאַרגעסן וועגן מײַן פּלאַן זיך אַרײַנצוכאַפּן אויף עטלעכע טעג קיין פּעטערבורג, וווּ ס׳איז נאָר וואָס אַרויס מײַן בוך.

דאָס איז, פֿאַרשטייט זיך, געווען אַ חלום; פּינקטלעכער — אַ קאָשמאַר, וואָס איז אָנגעווייעט געוואָרן פֿון הערן און לייענען די כּסדרדיקע אַנטי־אַמעריקאַנישע און, בכלל, אַנטי־מערבֿדיקע פּראָפּאַגאַנדע, וועלכע מע פֿאַרשפּרייט איצט זייער אינטענסיוו אין רוסלאַנד. די טעג איז אַרויס אַן אינטערוויו פֿון ניקאָלײַ פּאַטרושעוו, דער סעקרעטאַר פֿונעם ראָט פֿון נאַציאָנאַלער זיכערקייט, אין וועלכן די פֿאַראייניקטע שטאַטן ווערן באַשולדיקט אין אַלע אָנגעווייטיקטע פּראָבלעמען אין דער הײַנטיקער וועלט. ער האָט, בשעת־מעשׂה, זיך פֿאַררופֿן אויף „רוסאָפֿאָבישע‟ אַרויסזאָגונגען פֿון מאַדלען אָלברײַט, וועלכע זי האָט אין דער אמתן קיין מאָל ניט געזאָגט. דערווײַל האָט סערגיי נאַרישקין, דער ספּיקער פֿון דער רוסישער „דומאַ‟, געמאַכט אַ פֿאַרגלײַך צווישן דער אַנומלטיקער זיצונג פֿון G7 און דער „מינכענער אָפּמאַך‟ אין יאָר 1938. ווילדקייטן פֿון אַזאַ סאָרט הערט מען יעדן טאָג.

ס׳איז קלאָר, אַז רוסלאַנד קען מען ניט הײַנט פֿאַררעכענען ווי אַ טייל פֿון דעם, וואָס מע רופֿט די „מערבֿדיקע וועלט‟. אַ גוטן באַווײַז פֿון דעם דאָזיקן פֿאַקט געפֿינען מיר אין דעם אינטערוויו מיט נאַיִם קאַסעם — איינער פֿון די פֿירער פֿון דער שיִיִטישער גרופּירונג „כעזבאָלאַ‟. ער איז דער צווייטער מענטשן אין דער היעראַרכיע פֿון אָט דער אָרגאַניזאַציע. ווי ס׳איז באַוווּסט, ווערט „כעזבאָלאַ‟ קלאַסיפֿיצירט דורך די פֿאַראייניקטע שטאַטן ווי אַ געפֿערלעכע טעראָריסטישע אָרגאַניזאַציע. ישׂראל האָט אַ לאַנגע בלוטיקע געשיכטע פֿון קעמפֿן מיט „כעזבאָלאַ‟, וואָס איז באַזירט, דער עיקר, אין לבֿנון.

דער אינטערוויו מיט קאַסעם האָט זיך באַוויזן אין דער מאָסקווער צײַטונג „קאָמסאָמאָלסקאַיאַ פּראַוודאַ‟, וואָס איז באַקאַנט ווי אַן אויסגאַבע, געטרײַ דער איצטיקער רעגירונג. לייענען מיר אין דעם באַריכט, אַז „אין משך פֿון די לעצטע צען יאָר האָט די פּאָזיציע פֿון רוסלאַנד גענומען צונויפֿפֿאַלן מיט אונדזער פּאָזיציע. רוסלאַנד האָט אָנגעהויבן זיך דערווײַטערן פֿון דעם אַקס פֿון די פֿאַראייניקטע שטאַטן־מערבֿ־ישׂראל‟.

קאַסעם האָט אונטערגעשטראָכן, אַ שטייגער, אַז רוסלאַנד און „כעזבאָלאַ‟ האָבן די זעלביקע מיינונג וועגן דעם מצבֿ אין סיריע; ביידע צדדים האַלטן, אַז באַשאַר אַסאַד מוז בלײַבן דער פֿירער פֿון סיריע. קאַסעם האָט צוגעגעבן, אַז זײַן גרופּירונג באַקומט דעם רוסישן כּלי־זיין צו פֿירן מיליטערישע אָפּעראַציעס אין סיריע. בעת־מעשׂה, האָט ער באַשולדיקט די פֿאַראייניקטע שטאַטן אינעם (כּלומרשט) אונטערהאַלטן די „איסלאַמישע מדינה‟, מיט וועלכער „כעזבאָלאַ‟ פֿירט אַ מלחמה.

קאַסעם האָט אויך גערעדט וועגן דער סכּנה, וואָס לויערט פֿאַר רוסלאַנד מצד די פֿאַראייניקטע שטאַטן: „די פֿאַראייניקטע שטאַטן צעשטעלט אירע ראַקעטעס אַרום רוסלאַנד. פֿריִער האָט זיך געמאַכט דער קריזיס מיט גרוזיע אין יאָר 2008, וואָס איז געווען אינספּירירט פֿון די פֿאַראייניקטע שטאַטן און ישׁראל. דערנאָך איז געקומען דער אוקראַיִנישער קריזיס, אין וועלכן מע זעט בולט די ראָלע פֿון די פֿאַראייניקטע שטאַטן. רוסלאַנד וויל פֿירן אַן אומאָפּהענגיקע פּאָליטיק, בעת די פֿאַראייניקטע שטאַטן צווינגט אַרויף איר ווילן איבער דער גאָרער וועלט, אַפֿילו אויב מע דאַרף חרובֿ מאַכן רוסלאַנד צוליב דערגרייכן דעם דאָזיקן ציל.‟

כאַראַקטעריסטיש, אַז מער אָדער ווייניקער הערט מען די זעלבע ווערטער איצט די גאַנצע צײַט אויף דער רוסישער טעלעוויזיע, און מע לייענט עס אין ס’רובֿ רוסישע צײַטונגען.

דער טעראָריסטישער פֿירער האָט זיך באַרימט, אַז זיי האָבן איצט גרעסערע מיליטערישע מעגלעכקייטן איידער בעת די פֿריִערדיקע קאָנפֿליקטן מיט ישׂראל. „מיר האָבן ראַקעטן, וועלכע קענען מיט אַ גרעסערער פּרעציזקייט טרעפֿן אין ציל. די ישׁראלים טענהן, אַז זייער סיסטעם פֿון פֿאַרטיידיקונג איז 100־פּראָצענט פֿאַרלאָזלעך. אָבער דער ‘אײַזערנער קופּאָל’ קען איבערכאַפּן נאָר אַ געוויסע צאָל ראַקעטן און נאָר, ווען זיי געפֿינען זיך אויף אַ געוויסער דיסטאַנץ. ווען די צאָל ראַקעטן איז גרויס, קען זי עס ניט טאָן. די ישׂראלים קענען ניט אויסניצן זייער נוקלעאַרן וואָפֿן, ווײַל די טעריטאָריע איז קליין, און עס וועט ברענגען שאָדן אויך אין ישׂראל.‟

אָט אַזאַ חבֿר האָט איצט רוסלאַנד. ס’איז דאָך באַוווּסט: זאָג מיר מיט וועמען דו חבֿרסט זיך, וועל איך גלײַך פֿאַרשטיין ווער דו ביסט.