ידיעות פֿון מעלבורן

News From Melbourne

פֿון שׂרה זילבערמאַן

Published September 30, 2015, issue of October 16, 2015.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

דער מיניסטער פֿאַר רעסורסן, ענערגיע און צפֿון־אויסטראַליע דזשאַש פֿרידנבערג ווערט אײַנגעשוואָרן, מאָנטיק, דעם 21סטן סעפּטעמבער, בעת אַ צערעמאָניע אין קאַנבעראַ, אויסטראַליע
Getty Images
דער מיניסטער פֿאַר רעסורסן, ענערגיע און צפֿון־אויסטראַליע דזשאַש פֿרידנבערג ווערט אײַנגעשוואָרן, מאָנטיק, דעם 21סטן סעפּטעמבער, בעת אַ צערעמאָניע אין קאַנבעראַ, אויסטראַליע

מיניסטער פֿאַר רעסורסן, ענערגיע און פֿאַר צפֿון־אױסטראַליע — אַ ייִד

דער קאָנסערװאַטיװער מלוכה־מאַן דזשאָש פֿרײַדענבערג איז צו 44 יאָר באַשטימט געװאָרן װי דער מיניסטער פֿאַר רעסורסן, ענערגיע און צפֿון־אױסטראַליע אין דער נײַער רעגירונג, װאָס װערט אָנגעפֿירט פֿון דער ליבעראַלער פּאַרטײ. פֿרײַדענבערג האָט געטראָגן אַ יאַרמולקע און געהאַלטן אַ חומש בעת דער אײַנשווער־צערעמאָניע. דער חומש איז געװען אַ מתּנה פֿון סער זעלמאַן קאַוען — דער צװײטער ייִד, װאָס האָט געדינט װי אױסטראַליעס גאָװערנאָר־גענעראַל, צװישן 1977 און 1982.

צװײטע געװעזענע תּלמידה גרײט זיך אָנצוקלאָגן „עדת־ישׂראל‟־טאָגשול אין געריכט

אַ צװײטע געװעזענע תּלמידה און לערערין בײַ דער „עדת־ישׂראל‟־טאָגשול אין מעלבורן האָט אָנגעשטעלט אַן אַדװאָקאַט איר צו העלפֿן לאָדן די טאָגשול און איר געװעזענע פֿאַרװאַלטערין, רביצין מלכּה לײפֿער, אין געריכט. די רביצין װערט באַשולדיקט אין באַגײן 74 פֿאַלן פֿון סעקסועלע פֿאַרברעכנס קעגן קינדער. די טאָגשול װערט באַשולדיקט אין נישט אָפּגעבן זיך מיטן װױלזײַן פֿון די קינדער אין איר רשות.

דאָס הױפּט־געריכט פֿון דעם שטאַט װיקטאָריע האָט לעצטנס געמישפּט, אַז רביצין לײפֿער און די „עדת־ישׂראל‟־טאָגשול דאַרפֿן באַצאָלן מער װי אַ מיליאָן אױסטראַלישע דאָלאַרן צו דער ערשטער געװעזענער תּלמידה, װאָס האָט געלאָדן די רביצין און די טאָגשול אין געריכט.

רביצין לײפֿער װױנט נאָך אַלץ אין ישׂראל, װוּ זי פּרובירט אױסמײַדן אַ פּרוּװ פֿון דער אױסטראַלישער רעגירונג זי צוריקצוברענגען קײן מעלבורן, כּדי זי זאָל געמישפּט װערן דאָ אין קרימינעל־געריכט. רביצין לײפֿער װױנט אונטער הױז־אַרעסט. דער ענין דאַרף באַשטעטיקט װערן סוף אָקטאָבער הײַיאָר.

אַ קאָמיטעט פֿון דער „עדת־ישׂראל‟־טאָגשול האָט אָרגאַניזירט, אַז רביצין לײפֿער און איר משפּחה זאָלן פֿאַרלאָזן מעלבורן אַזױ גיך װי די באַשולדיקונגען קעגן איר זײַנען פֿאַרעפֿנטלעכט געװאָרן אין 2008.

דער טאָגשולס פֿינאַנציעלער שטראָף װערט געדעקט דורך איר אַסיגנאַציע. עס איז נאָך נישט קלאָר, צי די טאָגשול װעט מוזן צאָלן די פֿינאַנציעלע שטראָף, װאָס איז פֿאַררעכנט געװאָרן קעגן רביצין לײפֿער, טאָמער בלײַבט זי אין ישׂראל.

די קהילה פֿון דער שטאַט װיקטאָריע האָט אָפֿיציעל אױסגעדריקט די מײנונג, אַז רביצין לײפֿער מוז זיך אומקערן קײן מעלבורן, כּדי געמישפּט צו װערן. די שיל „עדת־ישׂראל‟ און איר טאָגשול זײַנען נישט קײן מיטגלידער פֿון דער קהילה.

פֿאַרברעכער װערט פֿאַרטריבן פֿונעם משפּחה־הױז פֿון מעני װאַקס

מעני װאַקס, דער ערשטער מעלבורנער תּושבֿ זיך מודה צו זײַן, אַז סעקסועלע מיסברױכן זײַנען באַגאַנגען געװאָרן קעגן אים בעת ער איז געװען אַ תּלמיד פֿון דער מעלבורנער ישיבֿה, האָט זיך שױן פֿון לאַנג איבערגעקליבן קײן פֿראַנקרײַך מיט זײַן משפּחה. זײַנע עלטערן האָבן זיך באַזעצט אין ישׂראל און האָבן פֿאַרקױפֿט זײער הױז אין מעלבורן. דער פֿאַרקױף װעט פֿאָרמאַליזירט װערן אין חודש דעצעמבער הײַיאָר, נאָר די װאַקס־משפּחה האָט דערלױבט די צוקונפֿטיקע אײגנטימער פֿונעם הױז אָנצוהײבן װױנען אין איר מיט עטלעכע חדשים פֿריִער. לױט מיסטער װאַקס האָט אַ קרובֿ פֿון די צוקונפֿטיקע אײגנטימער זיך אַרײַנגעצױגן צוזאַמען מיט זײ. ער, משה קעלער, איז פֿאַרמישפּט געװאָרן אין די פֿאַראײניקטע שטאַטן פֿאַר באַגײן סעקסועלע מיסברױכן קעגן קינדער.

מיסטער װאַקס זאָגט, אַז ער האָט זיך ערשט דערװוּסט, אַז קעלער װױנט בײַ אים אין שטוב פֿון ראש־השנה, און אַז ער האָט גלײַך געפֿאָדערט, אַז קעלער זאָל זיך אַרױסציִען פֿון זײַן הױז.

קעלער האָט געדאַװנט פֿאַר ראש־השנה בײַ דער מעלבורנער ישיבֿה. אַז איר צײַטװײַליקער אױספֿיר־קאָמיטעט האָט זיך דערװוּסט װעגן דעם, האָט ער זיך געשטעלט אין פֿאַרבינדונג מיט דער לאָקאַלער פּאָליצײ, װאָס האָט געזאָגט, אַז קעלער איז באַרעכטיקט צו דאַװענען װוּ ער װיל. דער קאָמיטעט האָט סײַ־װי באַשטימט, אַז ער װעט קעלערן נישט דערלױבן אַרײַנצוקומען אין דער ישיבֿה. דער פֿאַרװאַלטער פֿון דער ישיבֿה־טאָגשול האָט גלײַך אַרױסגעשיקט אַ בריװ צו די ישיבֿה־קרײַזן, זאָגנדיק, װאָס די ישיבֿה האָט געטאָן, און באַשטעטיקנדיק, אַז קעלער איז מסכּים געװען מער נישט צו קומען אין דער ישיבֿה. לױט דער װאָכנשריפֿט „די אױסטראַלישע ייִדישע נײַעס”, האָט קעלער פֿאַרלאָזט אױסטראַליע גלײַך נאָך ראש־השנה.

די קיניגלעכע קאָמיסיע פֿאַרעפֿנטלעכט אירע סובמיסיעס

די קיניגלעכע קאָמיסיע װעגן די רעאַקציעס פֿון רעליגיעזע אינסטיטוציעס צו באַשולדיקונגען, אַז סעקסועלע מיסברױכן זײַנען באַגאַנגען געװאָרן קעגן מינדער־יעריקע אין זײער רשות, האָט די װאָך פֿאַרעפֿנטלעכט די סובמיסיעס פֿון אירע אַדװאָקאַטן. די סובמיסיעס טאַדלען אַ רײ חב״ד־רבנים אין מעלבורן און אין סידנעי, װעלכע האָבן דורך טאַט און דורך װאָרט געװיזן, אַז זײ האָבן פּרובירט פֿאַרדעקן אַזעלכע באַשולדיקונגען.