ידיעות פֿון מעלבורן

News from Melbourne

פֿון שׂרה זילבערמאַן

Published November 09, 2015, issue of November 27, 2015.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

דזשודי קאַסאַב
דזשודי קאַסאַב

מאָלערין דזשודי קאַסאַב געשטאָרבן אין סידנעי צו 95 יאָר

די באַקאַנטע מאָלערין דזשודי קאַסאַב איז געשטאָרבן אין סידנעי אין עלטער פֿון 95 יאָר. זי האָט געהאַט מער װי 70 פּערזענלעכע אױסשטעלונגען פֿון אירע קונסט־װערק אין לאָנדאָן, פּאַריז און איבער גאַנץ אױסטראַליע. דערצו האָט זי געװוּנען די פּרעסטיזשפֿולע אױסטראַלישע אױסצײכענונג פֿאַר פּאָרטרעטן, די „אַרטשיבאָלד־פּרעמיע‟, סײַ אין 1961, סײַ אין 1968. זי איז באַערט געוואָרן מיט אױסצײכענונגען פֿון דער אױסטראַלישער רעגירונג אין 1969 און װידער אין 1988. קאַסאַב האָט באַקומען אַן ערן־דאָקטאָראַט פֿונעם סידנעיער אוניװערסיטעט אין 1995. זי איז באַערט געװאָרן פֿון דער אונגערישער רעגירונג אין 2011.

קאַסאַבס אמתער נאָמען איז געװען יודיט קאַשאַב, און זי איז געבױרן געװאָרן אין װין אין 1920. זי איז דערצױגן געװאָרן אין אונגערן, זיך געלערנט קונסט — צו ערשט, אין פּראָג, און דערנאָך אין בודאַפּעשט. װען די נאַציס האָבן פֿאַרנומען אונגערן אין 1944, האָט זי געמוזט איבעררײַסן אירע שטודיעס. קאַסאַב האָט איבערגעלעבט דעם חורבן מיט געפֿעלשטע פּאַפּירן. זי איז געקומען קײן אױסטראַליע אין 1951 אין אײנעם מיט איר מאַן און צװײ יונגע זין, און האָט געהאַט איר ערשטע אױסטראַלישע אױסשטעלונג אין 1953.

דער סקולפּטאָר ערװין פֿאַביאַן פֿײַערט זײַנע 100 יאָר מיט אַ נײַער אױסשטעלונג

דער מעלבורנער סקולפּטור ערװין פֿאַביאַן האָט געפֿײַערט זײַנע 100 יאָר מיט אַ נײַער אױסשטעלונג פֿון זײַנע װערק אין אַ מעלבורנער גאַלעריע. ער אַרבעט אין שטאָל, בראָנדז און פּלאַסטיק. פֿאַביאַן אַרבעט נאָך אַלץ ביז זעקס שעה אַ טאָג אין זײַן סטודיאָ, דרײַ מאָל אַ װאָך אין אײנעם מיט זײַן געהילף.

פֿאַביאַן איז געבױרן געװאָרן אין בערלין אין 1915 און האָט זיך געלערנט אין דער דאָרטיקער שול פֿון קונסט און האַנטאַרבעט. ער האָט זיך באַזעצט אין לאָנדאָן אין 1938 און האָט זיך געלערנט אינעם לאָנדאָנער טעכניקום. פֿאַביאַן איז געװען אײנער פֿון די דײַטשע בירגער, װעמען די בריטישע רעגירונג האָט געשיקט קײן אױסטראַליע אין 1940 אױף דער שיף „דונעראַ‟. דאָ איז ער געװען פֿאַרשפּאַרט אין לאַגער פֿאַר דײַטשע בירגער ביז 1945. אַ טײל פֿון זײַנע צײכענונגען פֿון יענער צײַט קען מען זען אויף אַ נײַער אױסשטעלונג אין דער נאַציאָנאַלער קונסט־גאַלעריע אין מעלבורן. פֿאַביאַן האָט זיך װידער באַזעצט אין לאָנדאָן צװישן 1949 און 1965. זינט דעמאָלט װױנט ער אין מעלבורן. זײַן ערשטע אױסשטעלונג איז פֿאַרגעקומען אין סידנעי אין 1965.

ערװין פֿאַביאַן האָט געהאַט פֿיל אױסשטעלונגען אין מעלבורן, אין סידנעי און אין בערלין.

יונגע אַקטיװיסטקע באַשטימט װי אײנע פֿון די פֿיר פֿינאַליסטן

די יונגע טראַנס־מין אַקטיװיסטקע מאַרגאָ פֿינק איז געװען אײנער פֿון די פֿיר פֿינאַליסטן אײדער דער שטאַט װיקטאָריע האָט אױסגעקליבן דעם יונגן װיקטאָריאַנער פֿונעם יאָר 2015. זי אַרבעט מיט מיט דער גרופּע „מינוס־18‟ שוין פֿינף יאָר. די גרופּע העלפֿט צענערלינגען, װעלכע זײַנען אָדער האָמאָסעקסואַליסטן, ביסעקסואַליסטן, אָדער טראַנס־מין. דאָס איז די גרעסטע גרופּע פֿון דעם מין אין אױסטראַליע. פֿינק זאָגט, אַז עס איז געװען אַ גרױסער כּבֿוד בלױז נאָמינירט צו װערן, און אַז זי װעט װײַטער אַרבעטן לטובֿת טראַנס־מין יוגנטלעכע.

כּשרות־פּעטיציע

אַ נײַע פּעטיציע פֿאָדערט, אַז די פֿירמע „גאָלדן סירקל‟ (גאָלדענע ראָד) זאָל װײַטער דערלױבן די משגיחים צו קאָנטראָלירן די פֿאַבריקן, װוּ זי גרײט צו פֿרוכט־זאַפֿטן און פֿרוכטן אין פּושקעס פֿאַרן אױסטראַלישן מאַרק. פּראָדוקטן, װעלכע דאַרפֿן גענוצט װערן פֿאַרן ערשטן יולי 2016 זײַנען נאָך אַלץ כּשר. די פּעטיציע דערמאָנט די טױזנטער משפּחות און אינסטיטוציעס, װעלכע האָבן ביז אַהער געקױפֿט פֿרוכט־פּראָדוקטן בײַ „גאָלדן סירקל‟ צוליב דעם, װאָס זײ זײַנען געװען כּשר ביז אַהער, און װעלן מער נישט קױפֿן די פּראָדוקטן בײַ זײ, אױב זײ װעלן נישט זײַן כּשר אין דער צוקונפֿט. אַ טײל ייִדן האָבן שױן אױפֿגעהערט צו קױפֿן בײַ זײ.

דער פּרעזידענט פֿונעם װעלט־פֿאַראײן פֿאַר פּראָגרעסיװן יודאַיִזם װעט באַזוכן אױסטראַליע

ראַבײַ דניאַל פֿרילענדער, דער פּרעזידענט פֿונעם װעלט־פֿאַראײן פֿאַר פּראָגרעסיװן יודאַיזם, די אינטערנאַציאָנאַלע אָרגאַניזאַציע פֿון ליבעראַלן יודאַיזם, האָט געמאָלדן, אַז ער װעט באַזוכן מעלבורן און סידנעי.