ידיעות פֿון מאָסקווע

News from Moscow

פֿון אלכּסנדרה פּאָליאַן

Published November 11, 2015, issue of November 27, 2015.

די ידיעות פֿון מאָסקווע, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

וויכטיקע אַקטיוויטעטן פֿון די רבנים

די הויפּט‑רבנים פֿון ביידע רוסלענדישע ייִדישע קהילות האָבן באַזוכט די אונטערנעמונג אינעם מאָסקווער קרעמל, אָרגאַניזירט לכּבֿוד דעם „טאָג פֿון פֿאָלקס‑איינהייט‟. די חגא איז אײַנגעפֿירט געוואָרן אין רוסלאַנד מיט 10 יאָר צוריק אַנשטאָט דעם טאָג פֿון דער אָקטאָבער‑רעוואָלוציע, און ווערט געפּראַוועט אין אָנדענק, ווען עס זענען פֿאַרטריבן געוואָרן די פּוילישע חיילות, וואָס האָבן אָקופּירט דעם מאָסקווער קרעמל אין יאָר 1612. די מלוכה האָט צונויפֿגערופֿן די פֿאַרטרעטער פֿון די וויכטיקסטע רעליגיעס אין רוסלאַנד, נאַציאָנאַלע קהילות און יוגנט‑אָרגאַניזאַציעס.

אַ פּאָר טעג שפּעטער האָבן די רבנים פֿון דער מתנגדישער קהילה אָנטייל גענומען אין דעם צוזאַמענפֿאָר פֿון אייראָפּעיִשער רבנים‑קאָנפֿערענץ, וואָס קומט פֿאָר הײַיאָר אין אַטען. דער הויפּט פֿון דער קאָנפֿערענץ, מאָסקווער רבֿ פּנחס גאָלדשמיט, האָט דערקלערט, אַז דאָס אָרט פֿאַרן צוזאַמענפֿאָר ווערט אַלע מאָל אויסגעקליבן לויט די אַקטועלע געשעענישן: מען אָרגאַניזירט דעם צוזאַמענפֿאָר אין דעם לאַנד, וווּ די רבנים ווילן אַרומרעדן מיט דער רעגירונג די פּראָבלעמען מכּוח אַנטיסעמיטיזם און דער לאַגע פֿון די דאָרטיקע ייִדן. דאָס מאָל ווערט דער צוזאַמענפֿאָר דורכגעפֿירט אין גריכנלאַנד, וווּ ס׳רובֿ תּושבֿים זענען ביז איצט געשטימט אַנטיסעמיטיש. די רבנים וועלן זיך באַגעגענען מיטן פּרעזידענט פֿון גריכנלאַנד, פּראָקאָפּיס פּאַוולאָפּולאָס; מיטן ישׂראלדיקן אַמבאַסאַדאָר אין גריכנלאַנד, און דעם אַמבאַסאַדאָר פֿאַר ייִׅדישע אָנגעלעגנהייטן בײַם אייראָפּעיִשן פֿאַרבאַנד.

דערווײַל האָבן די חב״ד־רבנים אָנטייל גענומען אינעם יערלעכן צוזאַמענפֿאָר פֿון חב״ד‑שליחים, וואָס איז פֿאָרגעקומען אין ניו‑יאָרק.

פּעטערבורג: אינטערנאַציאָנאַלע קאָנפֿערענץ

אין פּעטערבורג קומט פֿאָר אַן אינטערנאַציאָנאַלע קאָנפֿערענץ, „ייִדישע תּפֿוצות אין אייראָפּע און אין דער וועלט: פֿעלד‑ און אַרכיוו‑פֿאָרשונגען‟. די קאָנפֿערענץ ווערט אָרגאַניזירט פֿון דער „קונסטקאַמער‟, וואָס איז גלײַכצײַטיק אַ מוזיי און אינסטיטוט פֿון עטנאָגראַפֿישע פֿאָרשונגען. עטלעכע פּאַנעלן זענען געווידמעט די ייִדן פֿון דער ראָמאַנישער וועלט, פֿון עטיאָפּיע און באַלקאַן. דאָס רובֿ רעפֿעראַטן אָבער זענען געווידמעט דעם מיזרח‑אייראָפּעיִשן ייִדנטום. עס זענען דאָ רעפֿעראַטן וועגן דער געשיכטע פֿון דער ייִדישער קהילה אין סאַנקט‑פּעטערבורג און וועגן עטנאָגראַפֿישע עקספּעדיציעס אין בוקאָווינע, בעסאַראַביע, לאַטגאַליע און ישׂראל.

טולע: פֿעסטיוואַל פֿון נאַציאָנאַלע קולטורן

די ייִדישע קהילה פֿון טולאַ האָט אָנטייל גענומען אינעם פֿעסטיוואַל פֿון נאַציאָנאַלע קולטורן, „דאָס לאַנד אין מיניאַטור‟, וווּ עס האָבן זיך באַטייליקט 12 נאַציאָנאַלע מינדערהייטן. די ייִדישע קהילה האָט פֿאָרגעשטעלט ייִדישע תּשמישי-קדושה, טראַדיציאָנעלע קליידער און ביכער.

טאַמבאָוו: טעאַטער־פֿאָרשטעלונג „קדיש‟

אַ סצענע פֿון דעם ספּעקטאַקל „קדיש‟
אַ סצענע פֿון דעם ספּעקטאַקל „קדיש‟

אַ ידיעה פֿון טאַמבאָוו: דאָרטן אינעם טעאַטער פֿון יונגן צושויער בײַם מלוכישן אוניווערסיטעט האָט מען אויפֿגעפֿירט אַ ספּעקטאַקל מיטן נאָמען „קדיש‟ — אויפֿן סמך פֿון גריגאָרי גאָרינס פּיעסע, וואָס איז אַ באַאַרבעטונג פֿון שלום‑עליכמס „טבֿיה דער מילכיקער‟. אינעם ספּעקטאַקל באַטייליקן זיך אַקטיאָרן פֿון טאַמבאָווער טעאַטערס, ווי אויך סטודענטן פֿונעם אוניווערסיטעט. די הויפּט‑ראָלע שפּילט דער רעזשיסאָר פֿונעם טעאַטער, אָלעג בעליאַיעוו. די אויפֿפֿירונג איז פּאָפּולער ניט נאָר צווישן ייִדן, נאָר אויך בײַם ברייטן עולם.

אירקוצק: אַ נײַע ספֿר־תּורה לכּבֿוד אַלע ייִדן פֿון דער שטאָט

און די לעצטע ידיעה פֿאַר הײַנט קומט פֿון אירקוצק, אַ גרויסע שטאָט אין מיזרח‑רוסלאַנד. די דאָרטיקע ייִדישע קהילה האָט זיך געוואָנדן צו די דאָרטיקע ייִדן מיט אַ פֿאָרלייג צו קלײַבן געלט פֿאַר אַ נײַער ספֿר-תּורה. די ספֿר-תּורה וועט געהערן דער אירקוצקער שיל, און זײַן געווידמעט — אַזוי שטייט געשריבן אין דער ווענדונג — אַלע ייִדן פֿון דער שטאָט. מען פּלאַנירט אַרײַנצוטראָגן די ספֿר‑תּורה אין דער שיל נאָך הײַיאָר, דעם 6טן דעצעמבער.