ידיעות פֿון מאָסקווע

News from Moscow

פֿון אלכּסנדרה פּאָליאַן

Published December 16, 2015, issue of January 08, 2016.

די ידיעות פֿון מאָסקווע, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

חב״ד אין קרעמל לכּבֿוד חנוכּה

אין רוסלאַנד האָט מען ברייט געפּראַוועט חנוכּה. אַחוץ די יום־טובֿדיקע פּראָגראַמען אין די שילן און ייִדישע אָרגאַניזאַציעס, האָט מען אויך אָרגאַניזירט אַ פֿײַערלעכע אונטערנעמונג אין „מאַסטערסלאַוול‟ — אַזוי הייסט אַ פּאַרק פֿאַר קינדער אינעם מאָסקווער געשעפֿט־צענטער. דער ייִדישער ליאַלקע־טעאַטער „דער פֿיש קיווע‟ האָט פֿאָרגעשטעלט זײַן ספּעקטאַקל, און דער טאַנץ-אַנסאַמבל פֿון ייִׅדישן קולטור־צענטער — זײַן פּראָגראַם. די קינדער האָבן אויך געקענט שפּילן אין דריידל, באַקן לאַטקעס, זינגען לידער און נאַשן סופֿגניות.

לכּבֿוד חנוכּה האָט דער פּרעזידענט פּוטין פֿאַרבעטן אין קרעמל דעם הויפּט־רבֿ פֿון דעם רוסלענדישן חב״ד, הרבֿ בער לאַזאַר און דעם הויפּט פֿון דער פֿעדעראַציע פֿון ייִדישע קהילות אַלכּסנדר באָראָדאַ. פּוטין האָט באַגריסט אַלע ייִדן פֿון רוסלאַנד מיט חנוכּה און אויסגעפֿרעגט די רבנים מכּוח דעם יום־טובֿ און זײַנע מינהגים.

די צוויי רבנים האָבן אויך דורכגעפֿירט אַ פּרעסע־קאָנפֿערענץ בײַ דער מלוכישער מעדיאַ־אַגענץ „ריִאַ־נאָוואָסטי‟. די רייד איז געגאַנגען וועגן דער פּאָזיציע פֿון חב״ד און ייִדישקייט בכלל, וועגן אַ ריי פֿראַגעס (באַקעמפֿן דעם אינטערנאַציאָנאַלן טעראָריזם, דעם מצבֿ אויף מיטל־מיזרח און אין ישׂראל, אַנטיסעמיטיזם), וועגן דער לאַגע פֿון ייִדישע רעליגיעזע אָרגאַניזאַציעס אין רוסלאַנד און די דערגרייכונגען פֿון רוסלענדישן חב״ד (בתוכם עפֿענען נײַע שילן אין פֿאַרשיידענע שטעט, רײַזעס איבער דעם גאַנצן לאַנד מיטן ציל צוצוציִען די רוסישע ייִדן צו דער רעליגיע און טראַדיציע, אויפֿקלערונג־טעטיקייט, פֿאַרלאַג־פּראָיעקטן, דיאַלאָג מיט אַנדערע קאָנפֿעסיעס און מיט דער מלוכה אאַז״וו).

דער „דאָקטוירים־פּראָצעס‟ אין נײַעם מוזיי

אַ טייל פֿון דער מאָסקווער אויסשטעלונג „גולאַג‟־געשיכטע
אַ טייל פֿון דער מאָסקווער אויסשטעלונג „גולאַג‟־געשיכטע

צו די אַנדערע נײַעס… אין מאָסקווע האָט זיך אַנומלט געעפֿנט אַ נײַער בנין פֿון מוזיי פֿון דער „גולאַג‟־געשיכטע. אינעם נײַעם בנין איז איין זאַל געווידמעט דעם דאָקטוירים־פּראָצעס — אַ בפֿירוש אַנטיסעמיטישע אַקציע פֿון סטאַלינס פּאָליטיק. עס ווערן אויסגעשטעלט סאָוועטישע אַנטיסעמיטישע קאַריקאַטורן, דערציילט די געשיכטע פֿונעם פּראָצעס. מע קען אויך זען ווידעאָס פֿון אינטערוויוען מיט די קרובֿים פֿון די קרבנות.

ייִדישער מוזיי: אַן אָוונט פֿונעם מאָסקווער געשעפֿט־קלוב

צוויי ידיעות פֿונעם נײַעם מאָסקווער ייִדישן מוזיי: דעם 15טן דעצעמבער איז דאָרטן פֿאָרגעקומען אַן אָוונט פֿונעם מאָסקווער געשעפֿט־קלוב „שלמה‟. דער קלוב האָט אָרגאַניזירט אַ באַגעגעניש מיט איינעם פֿון די באַקאַנטסטע רוסלענדישע פּאָליטיקער, וואָס געהערן צו דער אָפּאָזיציע, מיט יעווגעני רויזמאַן, דער הויפּט פֿונעם יעקאַטערינבורגער שטאָטישן פּאַרלאַמענט, אַ געשעפֿטסמאַן און אַקטיווער קעמפֿער קעגן נאַרקאָטיקעס.

דער מוזיי האָט אויך אָרגאַניזירט די וואָך אַ באַגעגעניש, געווידמעט דער ייִדישער פֿילאָסאָפֿיע. יואל רגבֿ, דער ירושלימער פֿאָרשער פֿון קבלה האָט געהאַלטן אַ רעפֿעראַט וועגן לוריאַנישער קבלה און מאָדערנע מעטאָדן פֿון איר פֿאָרשונג.

אַ קאָנצערט פֿון קלעזמער־מוזיק פֿאַר עלטערע לײַט

אין דער מאָסקווער אָרגאַניזאַציע „חסד יד עזרא‟, וואָס העלפֿט אַלטע ייִדן, איז פֿאָרגעקומען אַ קאָנצערט פֿון קלעזמער־מוזיק, דורכגעפֿירט פֿון דער יוגנטלעכער אָרגאַניזאַציע „הילל‟. דער קאָנצערט איז אַ טייל פֿון אַ גרעסערער וווילטעטיקער פּראָגראַם „שענק די קונסט‟’.

אַן אָוונט מיט אַ שרײַבערין פֿון ישׂראל

און די לעצטע ידיעה פֿאַר הײַנט… אין דער גרעסטער ביכער־קראָם פֿון מאָסקווע, „ביבליאָ־גלאָבוס‟, איז פֿאָרגעקומען אַ באַגעגעניש מיט דער באַרימטער ישׂראלדיקער שרײַבערין, וואָס שרײַבט אויף רוסיש, דינה רובינאַ. רובינאַ האָט פֿאָרגעשטעלט איר נײַע זאַמלונג דערציילונגען, פֿאָרגעלייענט פֿראַגמענטן, דערציילט וועגן עקראַניזאַציעס פֿון אירע ביכער, געענטפֿערט אויף די פֿראַגעס פֿון דעם עולם און אונטערגעשריבן אירע ביכער.