קהילה

ידיעות פֿון מעלבורן

News from Melbourne

פֿון שׂרה זילבערמאַן

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

75 בני־מיצװה אינעם מושבֿ־זקנים

75 אײַנװױנער פֿונעם מאָנטעפֿיאָרע מושבֿ־זקנים אין מעלבורן, מערסטנס פֿון זײ פֿון דער שארית־הפּליטה, זײַנען געװאָרן בני־מיצװה אין דער אָנװעזנהײט פֿון 300 געסט. אַ טײל משפּחות האָבן געהאַט פֿיר דורות אױף דער פֿײַערונג. דער עלטסטער פֿון די בני־מיצװה, מענער און פֿרױען, איז אַלט געװען 99 יאָר. די אַנדערע זײַנען געװען אין די 80ער און די 90ער יאָרן. פֿיל פֿון זײ האָבן דערצײלט װעגן זײערע משפּחות און װעגן זײערע קינדער־יאָרן.

אַ דערפֿאָלג פֿאַר ייִדישע מיטלשולן

גראַדואַנטן, װעלכע האָבן פֿאַרענדיקט דעם 12טן לערן־יאָר אין מעלבורנער ייִדישע טאָגשולן, האָבן ערשט די װאָך באַקומען די רעזולטאַטן פֿון זײערע שטאַטישע סוף־יאָר עקזאַמענס. אַ תּלמיד פֿון דעם „הר־הצופֿים קאָלעדזש‟ און אַ תּלמיד פֿון „ביאַליק־קאָלעדזש‟ האָבן דערגרײכט בסך־הכּל צײכנס פֿון 99.9%.

12.9% פֿון די „ביאַליק‟־תּלמידים און תּלמידות האָבן דערגרײכט בסך־הכּל צײכנס, װעלכע זײַנען העכער װי 99%; 40.3% האָבן דערגרײכט צײכנס, װעלכע זײַנען העכער װי 95%, און 66.1% האָבן דערגרײכט צײכנס, װעלכע זײַנען 90% אָדער העכער װי 90%. 8 תּלמידים און תּלמידות האָבן באַקומען פֿולע צײכנס פֿאַר אינדיװידועלע לימודים.

9.8% פֿון די תּלמידים און תּלמידות פֿונעם „הר־הצופֿים קאָלעדזש‟ האָבן באַקומען צײכנס, װעלכע זײַנען העכער װי 99%; 36% האָבן דערגרײכט צײכנס פֿון 95% אָדער העכער װי 95%, און 61% האָבן באַקומען צײכנס פֿון 90% אָדער העכער װי 90%. נײַן תּלמידים און תּלמידות האָבן באַקומען פֿולע צײכנס פֿאַר דרײַ אינדיװידועלע לימודים.

6% פֿון די תּלמידים און תּלמידות פֿון דער „דוד־המלך שול‟ האָבן באַקומען בסך־הכּל צײכנס, װעלכע זײַנען העכער װי 99%, און 48% האָבן דערגרײכט צײכנס פֿון 90% אָדער העכער װי 90%.

דער מעדיאַן סך־הכּל צײכן פֿון די תּלמידות פֿון דעם „בית־רבֿקה קאָלעדזש‟ איז געװען 92.75%. 35% האָבן באַקומען צײכנס פֿון 95% אָדער העכער װי 95% און 50% האָבן באַקומען צײכנס פֿון 90% אָדער העכער װי 90%. דרײַ תּלמידות האָבן באַקומען פֿולע צײכנס פֿאַר דרײַ אינדיװידועלע לימודים.

20% פֿון די תּלמידים פֿון דעם „ישיבֿה־קאָלעדזש‟ האָבן באַקומען בסך־הכּל צײכנס פֿון 97% אָדער העכער װי 97%; 45% האָבן באַקומען 38/50 פּונקטן אין אינדיװידועלע לימודים.

אײן תּלמיד פֿון דער „יסודי־התּורה שול‟ האָט באַקומען אַ סך־הכּל צײכן פֿון 99.85%. אַלע פֿיר תּלמידים זײַנע, װעלכע האָבן פֿאַרענדיקט די שטאַטישע עקזאַמענס, האָבן באַקומען צײכנס, װעלכע זײַנען העכער װי 96%. דאָס איז דאָס צװײטע יאָר, װאָס די שול האָט תּלמידים, װעלכע האָבן פֿאַרענדיקט די שטאַטישע עקזאַמענס.

קאַנבערע גרינדעט אַ ציוניסטישן ראַט

צװײ מיטגלידער פֿון דער קהילה אין אױסטראַליעס הױפּט־שטאָט, קאַנבערע, גרינדן אַ ציוניסטישן ראַט צו פֿאָרמאַליזירן דער קהילהס באַציִונגען צו מדינת־ישׂראל. דער ראַט װעט פֿאָרשטעלן ייִדן פֿון דער גאַנצער טערעטאָריע אַרום דער הױפּט־שטאָט. דער ראַט װעט זײַן אַ באַשטאַנד־טײל פֿון דער ציוניסטישער אָרגאַניזאַציע פֿון אױסטראַליע.

קאָלאַזשן דערצײלן װעגן די לעבנס פֿון דער שארית־הפּליטה

פֿרײַװיליקע אַרבעטער בײַם מעלבורנער חורבן פֿאָרש־צענטער און מוזעום זײַנען געזעסן מיט מענער און פֿרױען פֿון דער שארית־הפּליטה און זײערע משפּחות און האָבן געמאַכט קאָלאַזשן פֿון פֿאָטאָגראַפֿיעס און דאָקומענטן, װעלכע גיבן איבער די מעשׂיות פֿון דעם, װי אַזױ די שארית־הפּליטה האָט איבערגעלעבט דעם חורבן. די קאָלאַזשן װעלן װערן אַ טײל פֿון אַן אױסשטעלונג אינעם מוזעום, װאָס װעט הײסן „רעקאָנסטרוקציע פֿון זכּרון‟.