אַנקעטע: רעפּובליקאַנער שטיצן ישׂראל צוליב עוואַנגעליסטן

Poll: Evangelicals Fuel Republican Support for Israel

אַן עוואַנגעלישער קריסט פֿון די פֿאַראייניקטע שטאַטן, בעת דעם 60סטן יערלעכן ירושלימער פּאַראַד אויף די גאַסן פֿון ירושלים, דעם 1טן אָקטאָבער 2015
Getty Images
אַן עוואַנגעלישער קריסט פֿון די פֿאַראייניקטע שטאַטן, בעת דעם 60סטן יערלעכן ירושלימער פּאַראַד אויף די גאַסן פֿון ירושלים, דעם 1טן אָקטאָבער 2015

פֿון Forward

Published December 24, 2015, issue of January 08, 2016.

אַ נײַע אַנקעטע האָט לעצטנס געוויזן די הויפּט־סיבה, פֿאַר וואָס די רעפּובליקאַנער פּאַרטיי איז אַזוי געטרײַ ישׂראל: די עוואַנגעלישע קריסטן.

„אַ גרויסע מאַיאָריטעט פֿון די עוואַנגעלישע רעפּובליקאַנער ווילן, אַז די פֿאַראייניקטע שטאַטן זאָל שטיצן ישׂראל,‟ האָט דערקלערט שיבלי טעלהאַמי, אַ גאַסט־לעקטאָר בײַם „צענטער פֿון דער מיטל־מיזרחדיקער פּאָליטיק‟ בײַם „ברוקינגס־אינסטיטוט‟. „אָבער ווען מע שליסט אויס די מיינונגען פֿון די עוואַנגעליקער אין דער פּאַרטיי, איז די שטעלונג פֿון די אַנדערע רעפּובליקאַנער זייער ענלעך צו די וויילער איבערן לאַנד.‟

אין אַן אַרטיקל אין דער „וואַשינגטאָן פּאָסט‟, האָט טעלהאַמי דערקלערט, אַז ווען מע פֿרעגט די רעפּובליקאַנער, ווי וויכטיק איז דעם קאַנדידאַטס פּאָזיציע צו ישׂראל, ענטפֿערן 64% עוואַנגעלישע רעפּובליקאַנער, אַז עס איז זיי „זייער וויכטיק‟. ווען מע פֿרעגט די נישט־עוואַנגעלישע רעפּובליקאַנער, איז עס בלויז 33%, און בײַ אַמעריקאַנער אין אַלגעמיין — 26%.

60% פֿון די עוואַנגעלישע רעפּובליקאַנער האַלטן, אַז די פֿאַראייניקטע שטאַטן זאָל שטימען קעגן אַ מעגלעכער „יו־ען‟־רעזאָלוציע לטובֿת אַ פּאַלעסטינער מדינה. בלויז 38% פֿון די נישט־עוואַנגעלישע רעפּובליקאַנער, און 26% פֿון אַלע באַטייליקטע אין דער שטודיע שטיצן אַזאַ שריט.

„די עוואַנגעליקער זענען טעאָלאָגיש גענייגט צו שטיצן ישׂראל, ווײַל זיי האַלטן, אַז דער ביבל איז גאָטס וואָרט,‟ האָט דערקלערט אַרי מאָרגענשטערן, אַ וואָרטזאָגער פֿאַר די „קריסטן פֿאַראייניקט פֿאַר ישׂראל‟. „אַחוץ דעם, האַלטן די עוואַנגעליקער זייער שטאַרק פֿון די דעמאָקראַטישע ווערטן, וואָס די פֿאַראייניקטע שטאַטן און ישׂראל האָבן בשותּפֿות. די־אָ קאָמבינאַציע איז גורם אַ געטרײַע שטיצע פֿאַר ישׂראל.‟

ווען מע פֿרעגט די רעפּובליקאַנער בכלל, פֿאַר וועלכער נאַציאָנאַלער אָדער אינטערנאַציאָנאַלער פֿיגור האָבן זיי דעם גרעסטן דרך־ארץ, וועלן בערך 12% ענטפֿערן: ביבי נתניהו. אָבער ווען מע פֿרעגט עס די עוואַנגעליקער, גיבן 22% פֿון זיי אָן דעם ישׂראלדיקן פּרעמיער, האָט טעלהאַמי געזאָגט.