דײַטשע ייִדן שרעקן זיך פֿאַר די פּליטים

German Jews Fear Refugee Anti-Semitism

אַ גרופּע פּליטים וואַרט צו אַפּליקירן אויף אַזיל, לעבן אַ פּליטים־צענטער אין בערלין
Getty Images
אַ גרופּע פּליטים וואַרט צו אַפּליקירן אויף אַזיל, לעבן אַ פּליטים־צענטער אין בערלין

פֿון „פֿאָרווערטס‟־רעדאַקציע

Published February 04, 2016, issue of February 19, 2016.

ניט געקוקט אויף דעם, וואָס ס׳רובֿ אַנטיסעמיטישע אַטאַקן אין דײַטשלאַנד ווערן דורכגעפֿירט פֿון די, וועלכע זענען דאָרט געבוירן געוואָרן, שרעקן זיך הײַנט אַ סך ייִדן אין דײַשטלאַנד צו אַנטפּלעקן זייער אידענטיטעט ווען זיי אַרבעטן ווי וואָלונטירן אין די פּליטים־צענטערס.

כאָטש ס׳זענען ניטאָ קיין פֿעסטע ציפֿערן וועגן די צאָל אינצידענטן, גיט איבער די ייִדישע קהילה, אַז ס׳זענען שוין פֿאָרגעקומען אַ ריי אַזעלכע פֿאַלן. איין פּליט, למשל, האָט לעצטנס געשפּיגן אויף אַ 33־יעריקער אָפּטייקערין, בעת זי האָט וואָלונטירט אין אַ היים פֿאַר פּליטים, נאָך דעם ווי ער האָט אַנטדעקט, אַז זי איז אַ ייִדישע טאָכטער.

אין אַן אַנדער פֿאַל האָבן צוויי פּליטים, וועלכע האָבן געהאַט געבעטן אַזילרעכט, אַטאַקירט און באַרויבט אַ ייִד מיט אַ יאַרמלקע, אויפֿן אינדזל פֿעמאַרן.

„צווישן די פּליטים זענען דאָ אַ סך מענטשן, וואָס זענען אויפֿגעוואַקסן פֿײַנטלעך געשטימט צו ישׂראל, און דאָס איז אָפֿט גורם אַ שׂינאה צו ייִדן בכלל,‟ האָט איבערגעגעבן יוסף שוסטער, דער פּרעזידענט פֿונעם „צענטראַלן ראָט פֿון דײַטשישע ייִדן‟, בעת אַן אינטערוויו מיט „רויטערס‟ אין אָקטאָבער.

די דײַטשישע קאַנצלערין אַנזשעלע מערקעל האָט לעצטנס באַטאָנט, אַז מע מוז עפּעס טאָן וועגן די אַנטיסעמיטישע שטעלונגען פֿון די נײַ־געקומענע יונגע־לײַט אין דײַטשלאַנד, וואָס שטאַמען פֿון לענדער, וווּ מע האָט פֿײַנט ישׂראל און ייִדן.

לויט די אָפֿיציעלע ציפֿערן פֿון דער דײַטשישער רעגירונג, זענען העכער 90% פֿון די אַטאַקן פֿאַראַיאָרן קעגן ייִדן דורכגעפֿירט געוואָרן פֿון עקסטרעם־רעכטע דײַטשן.

אויסלענדער האָט מען באַשולדיקט אין בלויז 4% פֿון די דאָזיקע אַטאַקן. דעם חודש וועט מען אָנהייבן האַלטן אַ חשבון, וויפֿל פֿון די אָנפֿאַלן אויף ייִדן ווערן דורכגעפֿירט פֿון פּליטים, און וויפֿל פֿון אַנדערע גרופּעס.