ידיעות פֿון מאָסקווע

News from Moscow

פֿון אַלכּסנדרה פּאָליאַן

Published March 02, 2016, issue of March 18, 2016.

די ידיעות פֿון מאָסקווע, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

Getty Images

אַ דעמאָנסטראַציע צו דערמאָנען באָריס נעמצאָוו

אויף דער פֿאַרגאַנגענער וואָך איז די הויפּט־געשעעניש אי פֿונעם געזעלשאַפֿטלעכן לעבן, אי דעם ייִדישן לעבן אין רוסלאַנד געוואָרן דער יאָרצײַט נאָך באָריס נעמצאָוו — אַ באַקאַנטער רוסלענדישער פּאָליטיקער פֿון ייִדישן אָפּשטאַם, וואָס אין די 1990ער יאָרן האָט מען אים געהאַלטן פֿאַר יעלצינס יורש; און אין דער תּקופֿה פֿון פּוטינען איז ער געוואָרן איינער פֿון די אָפּאָזיציע־אָנפֿירער. פֿאַראַיאָרן, דעם 28סטן פֿעברואַר, איז ער אומגעקומען בעת אַן אַטענטאַט.

די וואָך שבת זענען אין עטלעכע שטעט פֿון רוסלאַנד דורכגעפֿירט געוואָרן דעמאָנסטראַציעס אין אָנדענק פֿון נעמצאָוו. די באַטייליקטע פֿון אַזאַ דעמאָנסטראַציע אין יאַראָסלאַוול, וווּ נעמצאָוו האָט געוווינט, האָבן אויפֿגעהאָנגען אַ שילד אויף זײַן הויז, אויף וועלכן עס שטייט געשריבן: „אין דעם הויז האָט געוווינט באָריס נעמצאָוו, דער בירגער און פּאַטריאָט פֿון רוסלאַנד‟. דער בורגמײַסטער פֿון יאַראָסלאַוול האָט גערופֿן אַראָפּצונעמען דעם שילד, ניט געקוקט אויף דעם, וואָס די דעמאָנסטראַנטן האָבן פֿריִער באַקומען אַ דערלויבעניש פֿון די תּושבֿים פֿונעם הויז.

אַ סעמינאַר פֿאַר געשעפֿטס־לײַט

צו די אַנדערע נײַעס: זונטיק דעם 28סטן פֿעברואַר האָט דער קולטור־צענטער בײַ דער ישׂראלדיקער אַמבאַסאַדע אין מאָסקווע, בשותּפֿות מין דער אַסאָציאַציע פֿון געשעפֿטס־לײַט פֿון ישׂראל, דורכגעפֿירט אַ סעמינאַר אויף דער טעמע, „פּריוואַטע אונטערנעמונגען אין ישׂראל‟. די געשעפֿטס־לײַט אלכּס מגידאָוו און אלי אוריצקי האָבן דערציילט וועגן דער לאַגע פֿון פּריוואַטע אונטערנעמונגען אין ישׂראל, זייערע פּערספּעקטיוון און וועגן דער געזעצגעבונג אין דעם געביט, ווי אויך וועגן זייער אייגענער דערפֿאַרונג.

אַ גאַס אויף מאַרק שאַגאַלס נאָמען

אין מאָסקווע וועט זיך באַווײַזן אַ גאַס אויף מאַרק שאַגאַלס נאָמען. אַזאַ פּלאַן האָט דערקלערט הײַנט דער בורגמײַסטער פֿון מאָסקווע, סערגיי סאָביאַנין. מע פּלאַנירט איבערצובויען די טעריטאָריע פֿון אַ געוועזענער פֿאַבריק, ניט ווײַט פֿונעם שטאָט־צענטער, און אָנצורופֿן די פּראָיעקטירטע ברעג־גאַס אויף שאַגאַלס נאָמען. דער גאַנצער איבערבוי־פּראָיעקט וועט אָנגיין אין משך פֿון אַן ערך 10 יאָר.

„אשכּולות‟: ציקל לעקציעס, „אַ פֿרוי אַ שוועסטער‟

דער פּראָיעקט „אשכּולות‟ הייבט אָן אַ נײַעם ציקל באַגעגענישן — „אַ פֿרוי אַ שוועסטער‟. די רייד גייט וועגן דערציילונגען פֿון „בראשית‟, וואָס זענען פֿאַרבונדן מיט די אָבֿות אַבֿרהם און יצחק, זייערע פֿרויען און קינדער, און די באַציִונגען צווישן זיי. די באַגעגענישן שליסן אײַן קאָמענטאַרן צום תּנכישן טעקסט (אָנגעפֿירט פֿון סעמיטאָלאָג יעקבֿ איידערלקינד) און אַ רעפֿעראַט וועגן דער אָפּשפּיגלונג פֿון דעם אַנאַליזירטן סיפּור־המעשׂה אין דער אייראָפּעיִשער קונסט, געהאַלטן פֿון דילשאַט כאַרמאַן, קונסט־פֿאָרשערין. די ערשטע באַגעגעניש ווערט דורכגעפֿירט מיטוואָך, דעם 2טן מערץ, און איז געווידמען די דרײַ עפּיזאָדן, אין וועלכע אַבֿרהם אָבֿינו און יצחק אָבֿינו שטעלן זייערע פֿרויען פֿאָר ווי זייערע שוועסטער.

אַ באַגעגעניש אין „הלל‟־קלוב וועגן ייִדיש

אין דעם ייִדישן סטודענטישן קלוב „הלל‟ איז מיטוואָך, דעם 2טן מערץ, פֿאָרגעקומען אַ באַגעגעניש, געווידמעט דער ייִדישער שפּראַך. דעם רעפֿעראַט וועגן דער געשיכטע און סאָציאָלינגוויסטיק פֿון ייִדיש האָט געהאַלטן יעקאַטערינאַ קאַראַסיאָוואַ, אַ ייִדיש־קענערין און לערערקע פֿון מאָסקווער מלוכה־אוניווערסיטעט.

אַ פּראָגראַם קעגן אַלקאָהאָל און נאַרקאָטיק

אין ייִדישן קלוב „180 מעטער‟ אין מאָסקווע איז אָרגאַניזירט געוואָרן אַ באַגעגעניש מיטן פּסיכאָלאָג אַלכּסנדר סאַוויצקי און דעם אַקטיאָר מאַקסים פּינסקער. זיי האָבן גערעדט מיט דער ייִדישער יוגנט וועגן דעם שאָדן פֿון אַלקאָהאָל און נאַרקאָטיקעס. דער שמועס — אין גאָר אַ סאָוועטישן סטיל — איז אַ טייל פֿון דער נײַער פּראָגראַם פֿון דעם רוסישן חב״ד, צו פּראָפּאַגאַנדירן דאָס געזונטע לעבן און פֿירן דעם קאַמף קעגן אַלקאָהאָליזם און נאַרקאָמאַניע.

„ביקור־חולים מאָסקווע‟ באַקומט דעם נײַעם כּשרות-צערטיפֿיקאַט

און די לעצטע ידיעה פֿאַר הײַנט: עס איז אַרויסגעגעבן געוואָרן אַ נײַער כּשרות־צערטיפֿיקאַט. באַקומען אים האָט די קיך פֿון דער וווילטעטיקער־אָרגאַניזאַציע „ביקור־חולים מאָסקווע‟, וואָס צעטיילט הייס עסנוואַרג צו די ייִדן, וואָס ליגן אין די שפּיטאָלן און צו זייערע משפּחות, אויב דער קראַנקער האַלט די משפּחה אויס.