אַ פּסחדיקער „ייִדלײַף־קריזיס‟

A Passover Yidlife Crisis


פֿון דזשאָרדין קוציק

Published April 14, 2016, issue of May 13, 2016.

נאָכן גרויסן דערפֿאָלג פֿון זייער לעצטן קאַפּיטל, אין וועלכן די קאָמיקער חיימי עלמאַן און לייזער באַטאַליאָן זענען געגאַנגען אויף אַ „טאָפּלדיקער ראַנדקע‟ מיט דער קאָמיקערין מים ביאַליק, האָט דאָס קאָמישע פּאָרל געמאַכט אַ שטיקל הפֿסקה פֿון אַרויסלאָזן נײַע עפּיזאָדן פֿון „ייִדלײַף־קריזיס‟ גופֿא, כּדי צו פֿאַרענדיקן די סעריע רײַזע־באַריכטן פֿון תּל־אָבֿיבֿ.

איצט זענען די צוויי היפּוכדיקע ייִדיש־רעדנדיקע העלדן צוריק מיט אַ נײַעם קאַפּיטל געווידמעט סײַ פּסח, סײַ די פֿרומע האָמאָסעקסועלע ייִדן. דער עפּיזאָד, וואָס שיידט זיך אונטער פֿונעם פֿריִערדיקן סײַ צוליב דעם, וואָס ס׳איז מער גרעבלעך (אָבער גאָרניט אין פֿאַרגלײַך מיטן ערשטן „ברית־עפּיזאָד‟), סײַ ווײַל עס דינט נאָך אַ מאָל ווי אַ קריטיק קעגן דער טראַדיציאָנעלער ייִדישער טעאָלאָגיע.

די אַקציע הייבט זיך אָן, אויף אַן אַבסורדישן אופֿן, אין אַ געשעפֿט פֿון סעקס־שפּילעכלעך און עראָטישע קאָסטיומען, וווּ לייזער, וואָס מוז שטענדיק אויפֿהאַלטן די ייִדישע מינהגים, ניט געקוקט אויף אַלע ניט־כּשרע זאַכן וואָס ער טוט, עסט מצה. נאָך דעם וואָס די אַרבעטערין אינעם „סעקס־געשעפֿט‟ מיינט, אַז לייזער און חיימי זענען אַ האָמאָסעקסועל פּאָרל, הייבן זיי אָן צו דעבאַטירן די ייִדישע באַציִונג צו די האָמאָסעקסואַליסטן. חיימי האַלט, אַז די ייִדישע אמונה מוז זיך אַנטוויקלען, כּדי בעסער צו באַהאַנדלען דעם ענין, אָבער לייזער האַלט, אַז די קאַנאַדער געזעלשאַפֿט דאַרף בעסער אויפֿהערן צו זײַן אַזוי אַנטיסעמיטיש. נאָך אַ פּאָר עקלדיקע וויצן וועגן דער BDS־באַוועגונג און וועגן, פֿאַרשטייט זיך, זיך אַליין, טרעפֿן זיך די העלדן צופֿעליק מיט אַ פֿרומען ייִד (געשפּילט פֿונעם מוזיקער דזשאַש דאָלגין, באַקאַנט ווי „די־דזשיי סאָ־קאַלד‟), וואָס וויל, אַז זיי זאָלן לייגן תּפֿילין. חיימי, פֿאַרשטייט זיך, מאַכט זיך כּלא־ידע און לייזער וויל, פֿאַרשטייט זיך, גלײַך אָנטאָן די תּפֿילין. ביידע זענען אָבער געבליבן געפּלעפֿט נאָך דעם, וואָס עס ווערט אַנטפּלעקט אַ סוד וועגן דעם קירובֿ־ייִד.

דער נײַער קאַפּיטל און בפֿרט דער חידוש בײַם סוף איז, לויט מײַן מיינונג, זייער אַ געלונגענער, כאָטש די גרעבלעכע וויצן זענען ניט פֿאַר אַלעמען. אַ שאָד נאָר, וואָס מע הערט אין יעדן עפּיזאָד פֿון דער סעריע וואָס ווייניקער ייִדיש.