ידיעות פֿון מאָסקווע

News from Moscow

Courtesy of The Moscow Jewish Film Festival

פֿון אלכּסנדרה פּאָליאַן

Published June 17, 2016, issue of June 25, 2016.

די ידיעות פֿון מאָסקווע, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

נתניהו און פּוטין חתמענען עטלעכע וויכטיקע אָפּמאַכן

עס האָט זיך געענדיקט דער וויזיט פֿון דעם פּרעמיער־מיניסטער פֿון מדינת־ישׂראל, בנימין נתניהו, קיין מאָסקווע. אין ראַמען פֿונעם וויזיט זענען געחתמעט געוואָרן עטלעכע אָפּמאַכן, בתוכם דער אָפּמאַך מכּוח די פּענסיעס וואָס מיר האָבן וועגן זיי שוין דערציילט. די רייד גייט וועגן עלטערע מענטשן וואָס האָבן עטלעכע יאָרצענדליקער געאַרבעט אין סאָוועטן־פֿאַרבאַנד און האָבן עולה געווען אין די 1990ער. זיי האָבן געמוזט זיך אָפּזאָגן פֿון דער רוסלענדישער בירגערשאַפֿט. פֿון 2017 אָן וועלן זיי באַקומען אויך רוסלענדישע פּענסיעס.

עס זענען געחתמעט געוואָרן נאָך עטלעכע אָפּמאַכן וואָס זענען שייך עטלעכע אַנדערע געביטן: ענערגיע, לאַנדווירטשאַפֿט, סאָציאַלע גאַראַנטיעס און שטײַעראַמט.

מאָסקווער פֿעסטיוואַל פֿון ייִדישן קינאָ נעמט אַרײַן דיסקוסיעס וועגן ייִדישע געשטאַלטן אין רוסלענדישן קינאָ

דינסטיק דעם 14טן יוני האָט זיך אין מאָסקווע געעפֿנט דער אינטערנאַציאָנאַלער מאָסקווער פֿעסטיוואַל פֿון ייִדישן קינאָ, וואָס ווערט דאָ דורכגעפֿירט שוין צום צווייטן מאָל. דער ציל פֿונעם פֿעסטיוואַל איז צוצוציִען די אויפֿמערקזאַמקייט פֿונעם ברייטן מאָסקווער עולם צו דער דערשײַנונג פֿון ייִׅדישן קינאָ און בײַצוטראָגן צו דעם דיאַלאָג פֿון קולטורן און רעליגיעס. אינעם זשורי פֿונעם פֿעסטיוואַל זענען רוסלענדישע רעזשיסאָרן און טוער פֿון קינאָ ווי אויך דער צווייטער מענטש אין רוסלענדישן חב״ד — ר׳ אלכּסנדר באָראָדאַ.

די פּראָגראַם פֿונעם פֿעסטיוואַל שליסט אײַן פֿילמען, געמאַכט אין אייראָפּע, ישׂראל, רוסלאַנד, אוקראַיִנע, די פֿאַראייניקטע שטאַטן און קאַנאַדע, בתוכם די באַרימטע „שאולס זון‟ און „די מעשׂה פֿון ליבע און טונקלקייט‟.

עטלעכע פֿילמען ווערן באַגלייט מיט אַ קאָמענטאַר — למשל, אין דער פּראָגראַם איז אײַנגעשלאָסן דער פֿילם „דיבוק: די געשיכטע פֿון אַ וואַנדערדיקער נשמה‟, וואָס דערציילט וועגן דער איצטיקער לאַגע און אידעאָלאָגיע פֿון ברעסלעווער חסידות. נאָכן דעמאָנסטרירן דעם פֿילם האָט אים קאָמענטירט און דערציילט פֿון ר׳ נחמנס אינטעלעקטועלער ירושה דער הויפּט פֿונעם פֿאָרשונגס־צענטער בײַם נײַעם מאָסקווער ייִדישן מוזיי — ד״ר אורי הערשאָוויטש.

אויסערן פֿאַרמעסט האָט מען געוויזן אַ ריי רוסלענדישע פֿילמען. זיי וועט געווידמעט ווערן אַ דיסקוסיע פֿון דרײַ קינאָ־קענער — סוועטלאַנאַ פּאַכאָמאָוואַ, יורי טאַבאַק און אירינאַ מאַק, וואָס וועלן אַרומרעדן די ייִׅדישע געשטאַלטן אין רוסלענדישן קינאָ.

אין ראַמען פֿון דעם פֿעסטיוואַל ווערן אָרגאַניזירט אויך עטלעכע באַגעגענישן — מיט געזאַ רויריג, וואָס האָט געשפּילט די הויפּט־ראָלע אינעם פֿילם „שאולס זון‟, מיט דער באַרימטער רוסיש־ייִדישער שרײַבערין ליודמילאַ אוליצקאַיאַ און מיטן אייניקל פֿון דעם סאָוועטישן שרײַבער באַבעל.

אויסשטעלונג פֿון קינסטלער און דיזײַנער לעאָן באַקסט

צו די אַנדערע נײַעס: דער מוזיי אויפֿן נאָמען פֿון פּושקין, דער בעסטער און דער באַרימטסטער קונסט־מוזיי אין מאָסקווע, האָט געעפֿנט אַן אויסשטעלונג פֿונעם ייִדישן קינסטלער, דיזײַנער און קוטוריע לעאָן (לעוו) באַקסט. עס ווערן אויסגעשטעלט זײַנע עסקיזן פֿון טעאַטער־קאָסטיומען און דעקאָראַציעס, וואָס זענען געזאַמלט געוואָרן אין 30 מוזייען און פּריוואַטע קאָלעקציעס. די אויסשטעלונג איז געווידמעט דעם יוביליי פֿונעם קינסטלער — 150 יאָר זינט זײַן געבוירן ווערן.

„בראָדסקי־פּרעמיעס‟ ווערן אויסגעטיילט דיכטערין לינאָר גאָראַליק און קינסטלערין אָליאַ קרויטאָר

די מעמאָריאַלע פֿונדאַציע פֿונעם באַרימטן פּאָעט יוסף בראָדסקי האָט צוגעטיילט איר יערלעכע פּרעמיע אין צוויי נאָמינאַציעס — „פּאָעזיע‟ און „וויזועלע קונסט‟. די פּאָעטישע פּרעמיע האָט באַקומען לינאָר גאָראַליק — די דיכטערין, פּראָזאַיקערין, איבערזעצערין און היסטאָריקערין פֿון מאָדע, וואָס וווינט און אַרבעט אין מאָסקווע און תּל־אָבֿיבֿ. אין דער צווייטער נאָמינאַציע האָט געוווּנען די קינסטלערין אָליאַ קרויטאָר, לאַאורעאַטין פֿון דער „קאַנדינסקי־פּרעמיע‟. גאָראַליק און קרויטאָר וועלן פֿאַרברענגען דעם קומעדיקן האַרבסט אין דער רעזידענץ פֿון דער אַמעריקאַנער אַקאַדעמיע אין רוים. גאָראַליק וועט אויך קענען פֿאַרברענגען אַ חודש אין ווענעציע.

אין אשכּולות — אַ פּראָיעקט אַרויסצוגעבן פֿאַרגעסענע מיטל־מיזרחדיקע אַלבומען פֿון די 1970ער

און די לעצטע ידיעה אויף הײַנט: דעם 16טן יוני פֿירט דער פּראָיעקט „אשכּולות‟ דורך אַן אָוונט, געווידמעט אַן אינטערעסאַנטן ישׂראלדיקן מוזיקאַלישן פּראָיעקט —„פֿאָרטונאַ רעקאָרדס‟. דאָס איז אַ תּל־אָבֿיבֿער מוזיקאַלישער פֿאַרלאַג וואָס קאָנצענטרירט זיך אויפֿן אַרויסגעבן אויפֿסנײַ פֿאַרגעסענע מיטל־מיזרחדיקע אַלבומען פֿון די 1970ער. די „די־דזשייען‟ פֿונעם פּראָיעקט אַרבעטן אויך אויף ראַדיאָ און אין פֿאַרשיידענע קלובען אין ישׂראל און אייראָפּע, וווּ זיי לאָזן קלינגען זייער באַליבטע מוזיק — די כּמעט פֿאַרגעסענע מעלאָדיעס פֿון עגיפּטן און אַנדערע אַראַבישע לענדער, ישׂראל, פּאַלעסטינע און טערקײַ אין גאָר פֿאַרשיידענע מוזיקאַלישע ריכטונגען: ראָק, פֿאָנק, פֿאָלק, פּאָפּ און אַזוי ווײַטער. קיין מאָסקווע זענען געקומען די צוויי גרינדער און „די־דזשייען‟ פֿון „פֿאָרטונאַ רעקאָרדס‟ — אריאל תּגר און מאור ענווה — וואָס האָבן צוגעגרייט אַ רעפֿעראַט וועגן זייער טעטיקייט און דער מוזיק וואָס זיי ברענגען ווידער צום לעבן, און אַ קאָנצערט.