100־יאָריקע ייִדישע פֿרוי ווערט אַ בירגער כּדי צו שטימען אין נאָוועמבער

100-Year Old Jewish Woman Becomes US Citizen in Order to Vote in November

CBS Miami

פֿון ייִט״אַ

Published September 27, 2016, issue of September 30, 2016.

ס׳רובֿ לייענערס פֿון דעם אַרטיקל זענען מסתּמא אַמעריקאַנער בירגערס און האָבן זיך שוין פֿון לאַנג (אָדער גאָר ערשט לעצטנס) רעגיסטרירט צו שטימען אין די הײַיאָריקע שטאַרק קאָנטראָווערסיעלע פּרעזידענטן־וואַלן. אַנדערע האָבן זיך נאָך נישט רעגיסטרירט, ווער ווייסט פֿאַר וואָס נישט…

אָט האָבן מיר אָבער אַ בת־מאה, אַ 100־יאָריקע חורבן־געליטענע, מעניאַ פּערעלמאַן, וואָס וווינט שוין אין אַמעריקע זינט 1993, אָבער האָט נאָך נישט געהאַט באַוויזן צו ווערן אַן אַמעריקאַנער בירגער. אַ געבוירענע אין רומעניע האָט זי נאָך דער צווייטער וועלט־מלחמה געוואָלט אימיגרירן קיין אַמעריקע, האָט זי נישט געקענט צוליב אַ באַגרענעצונג אין דער צאָל פּליטים וואָס מ׳האָט דעמאָלט אַרײַנגעלאָזט. האָט זי שטאָטס דעם אימיגרירט קיין פּאַנאַמע, דערנאָך פּערו, דערנאָך ווענעזועלע, און ערשט נאָך דער פּטירה פֿון איר מאַן איז זי — צו 84 יאָר — געקומען קיין אַמעריקע, צו וווינען לעבן דער טאָכטער אין פֿלאָרידע.

זי האָט זיך אָבער קיין מאָל נישט פֿאַרשריבן צו ווערן אַן אַמעריקאַנער בירגער.

לעצטנס האָט זי זיך אָבער געכאַפּט ווי וויכטיק סע זענען די הײַיאָריקע פּרעזידענטן־וואַלן, האָט זי באַשלאָסן אַז זי ווערט סוף־כּל־סוף אַ בירגער. וכּך־הווה: אין סעפּטעמבער, אַרומגערינגלט מיט אירע פֿיר דורות קינדער, קינדסקינדער און קינדסקינדסקינדער, האָט מען זי אײַנגעשוווירן ווי אַ בירגער פֿון די פֿאַראייניקטע שטאַטן.

אַז די אָרטיקע נײַעס־סטאַנציע האָט זי געפֿרעגט פֿאַר וועמען וועט זי שטימען, האָט זי געענטפֿערט: „נו, די דעמאָקראַטן זענען מיר טאַקע ליבער, און — כאָטש ס׳איז באמת אַ סוד — וועל איך סײַ ווי אויסזאָגן: הילאַרי קלינטאָן.‟