הויפּט־רבנים צו ירושלימער האָטעל־אייגנטימער: שטעלט ניט אַרויס קיין ניטלביימער

Chief Rabbis to Jerusalem Hoteliers: Don't Display Christmas Trees

Wikimedia Commons

פֿון נעמי זעוועלאָף

Published December 22, 2016, issue of December 28, 2016.

צוויי פֿון די הויפּט־רבנים פֿון ירושלים האָבן געבעטן די אייגנטימער פֿון די האָטעלן אינעם עיר־הקודש, זיי זאָלן ניט אַרויסשטעלן קיין ניטלביימער אין זייערע פֿאָיעען אָדער פּראַווען קיין שׂימחות לכּבֿוד סילוועסטער־נאַכט.

„אין דער צײַט אין וועלכער עס ענדיקט זיך דאָס גוייִשע יאָר ווילן מיר אײַך דערמאָנען, אַז דאָס אויפֿשטעלן אַ ניטלבוים אין אַ האָטעל איז עובֿר אויף דער הלכה און ס׳איז דערפֿאַר קלאָר, אַז מע טאָר ניט אויפֿשטעלן קיין בוים אין קיין שום האָטעל“, האָבן די רבנים געשריבן אין אַן עפֿנטלעכן בריוו. „ס׳איז אויך פּאַסיק אויסצומײַדן דאָס פּראַווען שׂימחות אָפּצומערקן דעם סוף פֿונעם גוייִשן יאָר“, האָבן זיי ווײַטער געשריבן.

אַ וואָרטזאָגער פֿאַרן ישׂראלדיקן רבנות־ראָט האָט דערקלערט דער ישׂראלדיקער וועבזײַט „כיפה‟, אַז דער בריוו איז געווען אַ „פּריוואַטע איניציאַטיוו‟ וואָס האָט ניט קיין שײַכות צום פּראָצעס פֿון באַשטעטיקן, אַז אַ האָטעל איז כּשר. פֿאַר אַ יאָרן האָט דער הויפּט־רבנות־ראָט פֿון ישׂראל קאָנסטאַטירט, אַז מע קען ניט צוריקציִען דעם הכשר פֿון אַ האָטעל בלויז צוליב דעם, וואָס ער שטעלט אויף אַ ניטלבוים.

אין אַן אַנדער אינצידענט האָט אַ רבֿ בײַם „טכניון‟ אין חיפֿה געראָטן זײַנע סטודענטן ניט אַרײַנצוטרעטן אינעם אָרטיקן בנין פֿונעם סטודענטן־פֿאַראיין דערפֿאַר וואָס דאָרטן געפֿינט זיך אַ ניטלבוים. „ס׳איז ניט קיין קריסטלעכער סימבאָל, נאָר עפּעס ערגערס: אַ פּאַגאַנישער סימבאָל“, האָט הרבֿ אלעד דוקוב געשריבן אויף דער ישׂראלדיקער וועבזײַט „סרוגים‟.