„דער רבי אלימלך“ אויף דער מאָנגאָלישער טעלעוויזיע

“The Rebbe Elimelech” on Mongolian TV

פֿון „פֿאָרווערטס‟־רעדאַקציע

Published April 21, 2017, issue of April 27, 2017.

אַחוץ אין מעקסיקע, וווּ עס קומט פֿאָר יעדעס יאָר דער זינג־פֿאַרמעסט „דער ייִדישער אײַדאָל“ קען מען זעלטן ווען דערוואַרטן, אַז מע זאָל זינגען אַ ייִדיש ליד אויף אַזאַ מין זינג־קאָנקורס, שוין אָפּגערעדט פֿון דעם, אַז מע זאָל עס זען אויף דער טעלעוויזיע. לעצטנס, אָבער, איז אַמאַליע רובין, אַ יונגע אַמעריקאַנער ייִדישע טאָכטער, אויפֿגעטראָטן מיט משה נאַדירס באַליבט ליד „דער רבי אלימלך“ אין אַ טעלעוויזירטן זינג־קאָנקורס אין מאָנגאָליע.

מאָנגאָליע? יאָ, אין מאָנגאָליע. די זינגערין, וואָס וווינט טאַקע אין דער מאָנגאָלישער הויפּטשטאָט אולאַאַנבאַאַטאַר, ספּעציאַליזירט זיך אין דער מוזיק פֿון מאָנגאָליע און טיבעט. ווי מע קען זען אין די ווידעאָס, וואָס זי האָט אַרויפֿגעשטעלט אויף איר „פֿייסבוק“־זײַטל, קען זי רעדן מאָנגאָליש און טיבעטיש. זי איז דווקא באַקאַנט אין טיבעט און צווישן די טיבעטער אין אויסלאַנד ווי איינע פֿון די איינציקע מערבֿדיקע פֿרויען, וואָס זינגט אויף אַ פֿליסיקן טיבעטיש. אַחוץ טיבעטיש און מאָנגאָליש, טרעט זי אָפֿט אויף אויף אַנדערע שפּראַכן, אַרײַנגערעכנט הינדיש, טײַלענדיש, דזשודעזמע, העברעיִש און כינעזיש.

אינעם ווידעאָ אויבן, וואָס עס האָבן שוין געזען מער ווי 37,000 מענטשן, זינגט זי אויף דער טעלעוויזיע־פּראָגראַם Universe Best Songs, וואָס איז אַ מאָנגאָלישער נוסח פֿונעם באַרימטן אַמעריקאַנער זינג־פֿאַרמעסט American Idol. כאָטש זי איז אַ פֿעיִקע זינגערין באַמערקט איינע פֿון די ריכטערינס (די וואָס רעדט צו איר אויף ענגליש) אַז זי האָט ניט גענוג פּראַקטיצירט מיט דער קאַפּעליע פֿון טראַדיציאָנעלע מאָנגאָלישע מוזיקער, וואָס האָט זי באַגלייט. ניט געקוקט אויף דעם, איז קלאָר פֿונעם ווידעאָ אַז דער עולם האָט שטאַרק הנאה געהאַט פֿון איר אויפֿטריט, כאָטש זיי האָבן מסתּמא אַ סך ווייניקער פֿאַרשטאַנען דאָס ליד ווי דאָס ליד פֿון איר ערשטן אויפֿטריט, אויף מאָנגאָליש.