נאָך מחלוקת וועגן הויז פֿאַר עלטערע לײַט, ווערט ניו־יאָרק אָנגעקלאָגט

After Assisted Living Controversy, NY is Sued Over Eviction Laws


פֿון דזשאַש/יהושע נייטען־קאַזיס (Forward)

Published June 06, 2017, issue of June 29, 2017.

אין 2014 האָט דער בעל־הבית פֿון דער ברוקלינער וווינונג פֿאַר עלטערע לײַט „פּראָספּעקט פּאַרק־רעזידענס“ באַשלאָסן אַרויסצוזעצן די ס׳רובֿ ייִדישע אײַנוווינערס פֿון זייערע דירות. דאָס האָט דערפֿירט צו אַ שטיקל פּאַניק, און אַדוואָקאַטן האָבן גענומען קעמפֿן קעגן דעם באַשלוס. זיי האָבן באַוויזן אָפּצולייגן די גזירה אויף דרײַ יאָר און דערצו נאָך אַרויסבאַקומען פֿאַר די אײַנוווינערס מזומענע אויסצאָלונגען.

איצט, מיט דרײַ יאָר שפּעטער, נעמט די געזעלשאַפֿט פֿאַר אומזיסטער יורידישער הילף (Legal Aid Society) אין געריכט דעם געזונט־אָפּטייל בײַם שטאַט ניו־יאָרק, לויט אַ באַריכט אין דער טאָגצײַטונג „דיילי ניוס“, כּדי אַזאַ סקאַנדאַל זאָל מער נישט צו שטאַנד קומען. דער אָנקלאָג פֿאָדערט אַז דער געזונט־אָפּטייל זאָל אָננעמען נײַע כּללים כּדי צו העלפֿן עלטערע לײַט געפֿינען אַן אַנדער וווינונג ווען דער בעל־הבית וויל זיי אַרויסזעצן פֿון וווינונגען וואָס ווערן רעגולירט פֿונעם שטאַט ניו־יאָרק.

דער געזונט־אָפּטייל האָט אין אַ דעקלעראַציע פֿעסטגעשטעלט אַז ער האָט זיך ריכטיק געפֿירט וואָס שייך די אַרויסגעוואָרפֿענע עלטערע לײַט. „ווי אַ טייל פֿונעם אויפֿזיכט איבערן ׳פּראָספּעקט פּאַרק־רעזידענס׳ האָט דער געזונט־אָפּטייל געהיט אַלע פֿעדעראַלע און שטאַטישע געזעצן סײַ וואָס שייך דעם אָנפֿירונג פֿון דער אינסטיטוציע סײַ וואָס שייך די אײַנוווינער־רעכט“, האָט דער אָפּטייל געזאָגט.