אינטערוויו מיטן ייִדישן אַקטיאָר יעקבֿ לעווין

Interview with Yiddish Actor Jacob Levin

פֿון „פֿאָרווערטס‟־רעדאַקציע

Published July 09, 2017, issue of July 28, 2017.

מירי קאָראַל, די דירעקטאָרשע פֿונעם „קאַליפֿאָרניער ייִדישן אינסטיטוט‟ אין לאָס־אַנדזשעלעס, האָט במשך פֿון די לעצטע 20 יאָר געמאַכט אַ סעריע פֿילמירטע אינטערוויוען אויף ייִדיש מיט עלטערע ייִדן אין דער „שטאָט פֿון די מלאכים‟, וואָס זענען געווען טעטיק אין די אָרטיקע ייִדיש־קרײַזן. במשך פֿון די לעצטע פּאָר יאָר האַלט זי אין אַרויפֿשטעלן אויסצוגן פֿון די ווידעאָס אויפֿן „יוטוב‟־קאַנאַל פֿונעם אינסטיטוט מיט ענגלישע אונטערקעפּלעך.

לעצטנס האָט קאָראַל צוגעשטעלט אויסצוגן פֿון אַן אינטערוויו מיטן אַקטיאָר יעקבֿ לעווין, וואָס זי האָט געמאַכט אין 2004. אַ געבוירענער אין לאָדזש, האָט לעווין זיך געלערנט אין די ייִדישע שולן אָנגעפֿירט פֿון בונדיסטן. ער דערמאָנט די וויכטיקע ראָלע וואָס ייִדיש האָט געשפּילט אין לאָדזשער געטאָ, וווּ מע האָט פֿאָרגעשטעלט ייִדיש טעאַטער און גאַסן־זינגער זענען אויפֿגעטראָטן מיט פֿריש־געשאַפֿענע לידער וועגן די לעצטע געשעענישן אין געטאָ. ער גיט איבער ווי אַזוי די קולטורעלע פֿירער, פּאָעטן און לערער אין דער געטאָ האָבן זיך באַמיט, מע זאָל „אײַנהאַלטן אַ שטיקל מענטשלעכן קולטורעלן ניוואָ, מע זאָל ניט אין גאַנצן אַראָפּפֿאַלן.‟

נאָכן באַפֿרײַט ווערן פֿון אוישוויץ, איז לעווין צוריקגעפֿאָרן קיין לאָדזש, וווּ ער האָט זיך געטראָפֿן מיט בונדישע חבֿרים. צוזאַמען מיט זיי איז ער צו 23 יאָר אַוועקגעפֿאָרן קיין מעלבורן, וווּ ער האָט אָנגעהויבן שפּילן אינעם אָרטיקן ייִדישן טעאַטער און איז געוואָרן אַקטיוו אין די אָרטיקע ייִדיש־קרײַזן.

אַחוצ דעם אינטערוויו מיט יעקבֿ לעווין קען מען אויף „יוטוב‟ זען אַנדערע אינטערוויוען אין דער סעריע מיט טעאָדאָר ביקעל ז׳׳ל, לילקע מײַזנער, משה שקלאַר און נאָך.