פֿון די אַרכיוון: אָבליגאַציעס אונטערצושטיצן דעם סאָוועטן־פֿאַרבאַנד

From the Archives: USSR Bonds

פֿון יונה לובין

Published July 29, 2018.

[איינער פֿון אַ סעריע טשיקאַווע רעקלאַמעס פֿון די פֿאָרווערטס־אַרכיוון, צוזאַמען מיט זייער היסטאָרישן קאָנטעקסט.]

לכתּחילה געדרוקט דעם 28סטן יאַנואַר 1928

דאָס איז אַ רעקלאַמע פֿון 1928 פֿאַר סאָוועטישע אָבליגאַציעס (׳באָנדס׳ בלע׳׳ז). די פֿאַראייניקטע שטאַטן האָט ניט אָנערקענט דעם סאָווענטן־פֿאַרבאַנד ביז 1933. כאָטש מע האָט צו יענער צײַט שוין געקענט לײַען רוסלאַנד קרעדיט און באַקומען פֿון איר הלוואָות, איז עס געווען שטאַרק באַגרענעצט. די אַמעריקאַנער רעגירונג איז געווען שטאַרק קעגן דעם, אַז אַמעריקאַנער זאָלן נעמען הלוואָות פֿונעם ראַטן־פֿאַרבאַנד און האָט בעסער געוואָלט העלפֿן פֿינאַנצירן די נאָך־יונגע מלוכה דורכן דערמעגלעכן זי צו קויפֿן אַמעריקאַנער פּראָדוקטן. אינעם דאָזיקן אַנאָנס רעקלאַמירט מען ווי „טשייס־נאַטשיאָנעל־באַנק‟ פּרובירט צו פֿינאַנצירן דעם אויפֿבוי פֿון די סאָוועטישע אײַזנבאַן־ליניעס אויף 9%. צוליב דעם וואָס דער פֿאָרווערטס איז צו יענער צײַט געווען אַ פֿאַרברענטע סאָציאַליסטישע צײַטונג, לייגט זיך אויפֿן שׂכל, אַז אירע לייענער וואָלטן געווען מעגלעכע קונים פֿון די דאָזיקע אָבליגאַציעס. ווי מע קען זען אין דער רעקלאַמע, האָט מען געקענט פֿאַרקויפֿן די אָבליגאַציעס אויף דער מאָסקווער בערזע אַפֿילו איידער זיי האָבן אָנגעהויבן צו באַצאָלן דערפֿאַר. אינטערעסאַנט איז דער פֿאַקט, וואָס פֿונעם גאַנצן ענין האָט זיך אויסגעלאָזט אַ בוידעם: באַלד נאָך דעם וואָס „טשייס‟ האָט אַנאָנסירט די קאַמפּאַניע צו פֿינאַנצירן די אײַזנבאַן־ליניעס, האָט דער אַמעריקאַנער אויסערן־מיניסטעריום אין גאַנצן אָפּגעוואָרפֿן דעם פּלאַן. וואָס איז ווײַטער געשען מיט די פֿאָרווערטס־לייענער וואָס האָבן שוין געהאַט אַרײַנגעשיקט זייערע געלטער ווייסט מען ניט.

קוואַל:

Siegel, Katherine Amelia Siobhan. Loans and Legitimacy: The Evolution of Soviet-American Relations 1919-1933. Lexington (Ky.): University Press of Kentucky, 1996.