מע בעט פֿאָרש־אַרטיקלען וועגן ייִדיש אין שטעט

Academic Articles On Yiddish in Cities Sought

אַ גאַס אינעם ייִדישן קוואַרטאַל פֿון ווילנע
אַ גאַס אינעם ייִדישן קוואַרטאַל פֿון ווילנע

פֿון „פֿאָרווערטס‟־רעדאַקציע

Published August 27, 2018.

במשך פֿון די לעצטע 30 יאָר באַטראַכט מען אויף אַ מער ערנסטן אופֿן דעם באַגריף „ייִדישלאַנד‟; דאָס הייסט, די ערטער וווּ די מיזרח־אייראָפּעיִשע ייִדן האָבן געלעבט אויף ייִדיש און די אופֿנים, ווי אַזוי די דאָזיקע ייִשובֿים זענען געווען פֿאַרבונדן איינער מיטן צווייטן דורך צײַטונגען, טעאַטער, פּאָליטישע באַוועגונגען, שולן און קולטורעלע פֿאַראיינען.

כאָטש מע קען זאָגן אַז דאָס וויגעלע פֿון דער ייִדישער קולטור איז זיכער געווען דאָס שטעטל, איז די מאָדערנע ייִדישע קולטור אויפֿגעקומען דווקא אין די שטעט, וווּ עס האָבן זיך בײַם ראַנד פֿונעם 20סטן יאָרהונדערט אָנגעזאַמלט הונדערטער טויזנטער ייִדן. ביז אַהער האָבן אַ ריי היסטאָריקער שוין אויסגעפֿאָרשט די ייִדישע קהילות פֿון געוויסע שטעט, איבערהויפּט מינסק, ביאַליסטאָק, וואַרשע און ווילנע. מע האָט אָבער ניט אַזוי פֿיל פֿאַרגלײַכט די ענלעכקייטן און אונטערשיידן צווישן די אַמאָליקע גרויסע מיזרח־אייראָפּעיִשע ייִדישע ייִשובֿים און די פֿאַרבינדונגען צווישן זיי.

כּדי צו מאַכן אַזאַ פֿאַרגלײַך אויפֿן סמך פֿונעם „טראַנסנאַציאָנאַלן מוסטער‟ וואָס איז לעצטנס אין דער מאָדע בײַ די היסטאָריקער, שטעלט דער זשורנאַל „מיזרח־אייראָפּעיִשע ייִדישע ענינים‟ צונויף אַ ספּעציעלן נומער געווידמעט ייִדיש אין די שטעט. די רעדאַקטאָרן פֿונעם זשורנאַל אהן אַלגעמײן זענען ד׳׳ר אַנאַ שטערנשיס און ד׳׳ר דוד שניר אָבער פֿאַר דעם ספּעציעלן נומער װעלן אויך רעדאַקטירן ד׳׳ר קאַרען אַוערבאַך (צפֿון־קאַראָלײַנער אוניווערסיטעט) און ד׳׳ר ניק אָנדערוווּד (קאַליפֿאָרניער אוניווערסיטעט אין בערקלי). זיי זוכן איצט אַרטיקלען, וואָס באַטראַכטן דעם אופֿן ווי אַזוי די שטעט האָבן געשפּילט אַ ראָלע אינעם איבערגעבן קולטור אין אַ טראַנסנאַציאָנאַלער לינגוויסטישער קהילה, אין דעם פֿאַל — „ייִדישלאַנד‟.

מע בעט אַז מע זאָל אַרײַנשיקן אַ קורצע באַשרײַבונג (ביז 250 ווערטער) פֿאַרן 30סטן אָקטאָבער אויף eeja@colorado.edu.

נאָך אינפֿאָרמאַציע באַזוכט: https://networks.h-net.org/node/73374/announcements/2241931/call-proposals-%E2%80%9Cyiddish-city%E2%80%9D-special-edition-%C2%A0east-european.