קאַפּעליע „ראָדזשערס־פּאַרק‟ גיט אַרויס נײַעם אַלבאָם פֿון ייִדישע לידער

Rogers Park Band Releases New Album of Yiddish Music

Rogers Park

פֿון דזשאָרדין קוציק

Published August 28, 2018.

די פּאָפּולערע קאַפּעליע „ראָדזשערס־פּאַרק‟, וואָס איז באַקאַנט פֿאַר איר אוניקאַל געמיש פֿון אַמעריקאַנער פֿאָלקראָק־מוזיק און ייִדישע ניגונים, האָט לעצטנס אַרויסגעלאָזט אַ נײַעם אַלבאָם פֿון ייִדישע לידער.

די קאַפּעליע באַשטייט פֿון צוויי חב׳׳ד־חסידים, מאָרדי קורץ און יוסף פּייסין, וואָס האָבן אַ בפֿירוש־היפּסטערישן מוזיקאַלישן סטיל און אויסזען. אין זייער פּרעסע־קאָמוניקאַט גיבן קורץ און פּייסין צו פֿאַרשטיין, אַז זינט זיי האָבן אָנגעהויבן אַרײַנצונעמען לידער אויף ייִדיש אין זייער רעפּערטואַר, האַלט מען אין איין בעטן, מע זאָל רעקאָרדירן וואָס מער ייִדישע לידער מיט אַ מאָדערנעם קלאַנג.

אַזוי אַרום האָבן זיי געשאַפֿן דעם אַלבאָם „פּעטערסבורג‟, וואָס בינדט צונויף אַ ריי פּאָפּולערע ייִדישע פֿאָלקסלידער מיט חב׳׳ד־ניגונים, באַפֿעפֿערט מיטן אַמעריקאַנער היפּסטער־קלאַנג. דער הויפּט־סינגל פֿונעם נײַעם אַלבאָם איז אַ פֿאָלקראָק נוסח פֿון שמערקע קאַטשערגינסקיס ליד „זאָל שוין קומען די גאולה‟. דער מוזיק־ווידעאָ פֿונעם ליד, וואָס ווײַזט ווי ייִדן טאַנצן אויף דער גאַס לעבן לאָזונגען וואָס רופֿן צו ברענגען „משיח איצט‟, איז געוואָרן זייער פּאָפּולער — מע האָט אים שוין געזען מער ווי 343,804 מאָל. כאָטש קאַטשערגינסקי, אַ פֿאַרברענטער אַטעיִסט, וואָלט אַליין זיכער ניט געווען צופֿרידן מיט דעם, וואָס חב׳׳דניקעס מאַכן פֿון זײַן „זאָל שוין קומען די גאולה‟ אַ קירובֿ־ליד, איז די קוואַליטעט פֿון דער מוזיק זייער אַ הויכער.

די קאַפּעליע שטרעבט צו „ברענגען ייִדיש צוריק‟ און נוצט די דאָזיקע לאָזונג ווי אַ „העשטעג‟ צו צעפּויקן דעם אַלבאָם אויף „פֿייסבוק‟ און „טוויטער‟. אַ פּנים רופֿט עס זיך אָפּ אויפֿן פֿאַקט, אַז אין די חב׳׳ד־קהילות באַטראַכט מען ניט ייִדיש פֿאַר „קיל‟ און אַחוץ „ראָדזשערס־פּאַרק‟ הערט מען זעלטן ווען אויף אַ חב׳׳ד־שׂימחה, אַז אַ יונגער מוזיקער זאָל זינגען אַ ייִדיש־ליד.

נאָך אינפֿאָרמאַציע וועגן דעם אַלבאָם: //www.rogersparkband.com/.