„ייִדישלאַנד‟ — אַ נײַער זשורנאַל אויף מאַמע־לשון

Yiddishland - A New Literary Journal in Yiddish

פֿון „פֿאָרווערטס‟־רעדאַקציע

Published November 27, 2018.
Yiddishland

די ישׂראלדיקע פּאָעטן מיכאל פֿעלזענבאַום און וועלוול טשערנין האָבן לעצטנס געלאָזט וויסן אויף „פֿייסבוק‟, אַז ס׳וועט קומענדיקע וואָך אַרויס דער ערשטער נומער פֿון אַ נײַעם „אומאָפּהענגיקן‟ זשורנאַל אויף מאַמע־לשון „ייִדישלאַנד‟.

די צוויי, וואָס רעדאַקטירן דעם זשורנאַל און גיבן אים אַרויס אין ירושלים, אַרבעטן צוזאַמען מיטן פֿאַרלעגער ניקאָלײַ אָלניאַנסקי, וואָס פּובליקירט ייִדיש־שפּראַכיקע קינדערביכלעך אין שוועדן. דער זשורנאַל ווערט אויסשליסלעך געשטיצט דורך פּריוואַטע פֿאָנדן, דאָס הייסט, ניט דורך דער „ישׂראלדיקער אינטסאַנץ פֿאַר ייִדישער קולטור‟ אָדער דורך דער שוועדישער רעגירונג, און ניט דורך אַן אָרגאַניזאַציע געווידמעט דער ייִדישער שפּראַך. מע פּלאַנירט אַרויסצוגעבן פֿיר נומערן אַ יאָר.

דער ערשטער נומער „ייִדישלאַנד‟ נעמט אַרײַן נײַע לידער פֿון רבֿקה באַסמאַן בן־חיים, באָריס קאַרלאָוו, משה לעמסטער, מעליטע דעפֿנער, ישׂראל נעקראַסאָוו, פֿעליקס היימאָוויטש, חיקע ברוריה וויגאַנד, אורציון ברתנא און נײַע דערציילונגען פֿון עמיל קאַלין און מיכאל פֿעלזענבאַום. אינעם נומער געפֿינען זיך אויך פֿאָרשערישע אַרטיקלען פֿון יעל לוי און וועלוול טשערנין וועגן שלום־עליכמען און אַן אַרטיקל פֿון אַנאַ ווערשיק וועגן ייִדיש אין עסטלאַנד.

דעם ערשטן נומער קען מען שוין באַשטעלן דורך בעלאַ בריקס־קלײַן אין תּל־אָבֿיבֿ: yidish.bikher@gmail.com אָדער POB 29109, Tel Aviv, 61290 Israel. ער קאָסט 30 שקלים אין ישׂראל, 7.50 אייראָס אין אייראָפּע און 8.5 אַמעריקאַנער דאָלאַר: פּלוס פּאָסטגעלט.