80 ישׂראלים הערן לעקציע אויף ייִדיש וועגן אַשכּנזישע מאכלים

80 Israelis Attend Yiddish Lecture About Ashkenazi Dishes

פֿון לאה סקיבא

Published April 09, 2019.
שׂרה־רחל שעכטער רעדט צום עולם אין „בית־יהודית‟.
Leah Skiba
שׂרה־רחל שעכטער רעדט צום עולם אין „בית־יהודית‟.

„בית־יהודית‟ איז אַ קהילה־צענטער אין ירושלים, וווּ עס קומען פֿאָר פֿאַרשיידענע טעטיקייטן פֿאַר קינד און קייט: פֿון אַ קינדער־גאָרטן און פֿיל אַקטיוויטעטן פֿאַר קינדער און יוגנט — ביז אַ גאַנצער ריי אַקטיוויטעטן פֿאַר פּענסיאָנירטע לײַט וואָס ווערט גערופֿן „אַל־גיל‟ (אָן אַן עלטער).

אין דער אָפּטיילונג „אַל־גיל‟ פֿירט מען אויך דורך לעקציעס פֿון ייִדישער שפּראַך און ליטעראַטור אויף זעקס ניוואָען, געלערנט דורך דער שרײַבערין פֿון די שורות, און אויך אַ ייִדיש־קלוב וואָס טרעפֿט זיך איין מאָל אַ חודש מיט אַ מוזיקאַלישער אָדער ליטעראַרישער פּראָגראַם.

אַחוץ דעם קומט זיך צונויף אין בית־יהודית דער „קאַפֿע אייראָפּע‟, אַ צוזאַמעטרעף פֿאַר ענגליש־רעדנדיקע ניצולי־שואה; דער מנין „שירה חדשה‟ און אַנדערע גרופּעס.

דעם 31סטן מאַרץ האָבן די חבֿרים ליבהאָבערס פֿון ייִדיש אין איינעם מיט „קאַפֿע אייראָפּע‟ זיך צונויפֿגעזאַמלט כּדי מקבל־פּנים זײַן די נײַע רעדאַקטאָרין פֿונעם ייִדישן פֿאָרווערטס, שׂרה־רחל שעכטער, וועלכע האָט געגעבן אַ לעקציע, „די געשיכטע פֿון געפֿילטע פֿיש און אַנדערע אַשכּנזישע מאכלים‟.

דער גרויסער עולם — בערך 80 מענטשן — האָט זיך צוגעהערט מיט אַ סך אינטערעס צו רחל שעכטערס רייד און גענאָסן פֿון די ייִדיש־ישׂראלדיקע מטעמים וואָס זענען אָנגעלייגט געוואָרן אויף דעם געגרייטן טיש.

אַ פּאָר ייִדישע לידער וואָס האָבן אַ שייכות מיט מאכלים און אַ רעטעניש וועגן ייִדישע עסנס האָבן צוגעגעבן נאָך אַ ספּעציעלן טעם צו שׂרה־רחלס ווערטער.

דער עולם האָט גרויס הנאה געהאַט, האָט זיך געזעגנט צופֿרידן און זאַט, און אַ טייל פֿון זיי האָבן אַפֿילו דאָס געגעבן צו וויסן אינעם ביוראָ. אַ ביסל שפּעטער ווען איך בין געזעסן מיט שׂרה־רחלען און געשמועסט וועגן ייִדיש אין ישׂראל בכלל און אין ירושלים בפֿרט, איז צוגעקומען צו אונדז די סעקרעטאַרין פֿונעם קהילה־צענטער און אַליין געזאָגט: „די חבֿרים וואָס זענען געווען אויף דער טרעפֿונג האָבן אונדז דערציילט אַז ס׳איז געווען אויסגעצייכנט!‟