אַ בשׂורה־טובֿה — „שטיסל‟ קומט צוריק

Good News - "Shtisel" is Returning

אַ סצענע פֿון דער פּראָגראַם “שטיסל”
אַ סצענע פֿון דער פּראָגראַם “שטיסל”

פֿון „פֿאָרווערטס‟־רעדאַקציע

Published May 09, 2019.

אַ בשׂורה־טובֿה פֿאַר די אָנהענגער פֿון דער ישׂראלדיקער טעלעוויזיע בכלל, און די ייִדיש־שפּראַכיקע טעלעוויזיע בפֿרט: נאָך אַן איבעררײַס פֿון פֿיר יאָר פֿילמירט מען איצט אַ דריטן סעזאָן פֿון „שטיסל‟.

די פּראָגראַם, וואָס שילדערט דאָס לעבן און אינערלעכע קאָנפֿליקטן פֿון אַ חסידישן אַלמן אין ירושלים און זײַנע קרובֿים, איז לכתּחילה געווען אַ גרויסער שלאַגער בלויז אין ישׂראל, און איז דערנאָך פּאָפּולער געוואָרן בײַ די אַמעריקאַנער ייִדן, נאָך דעם וואָס מע האָט אים אַרויסגעלאָזט מיט ענגלישע אונטערקעפּלעך. „שטיסל‟ איז אָבער ניט באמת געוואָרן אַ שלאַגער מחוץ־לארץ בײַם ברייטן עולם ביז מע האָט אים הײַיאָר אַרויסגעלאָזט אויף „נעטפֿליקס‟. טאַקע צוליב איר ריזיקן דערפֿאָלג אויף „נעטפֿליקס‟ האָבן די פּראָדוצירער פֿון דער פּראָגראַם באַקומען די פֿינאַנציעלע שטיצע צו שאַפֿן אַ נײַעם סעזאָן.

„שטיסל‟ האָט געמאַכט אַ רעוואָלוציע אין דער ישׂראלדיקער טעלעוויזיע ניט נאָר צוליב דעם, וואָס זי שילדערט פֿרומע ייִדן ווי אַלע מענטשן מיט טאָגטעגלעכע פּראָבלעמען, נאָר אויך ווײַל די פּראָגראַם איז די ערשטע אין ישׂראל, וואָס נעמט אַרײַן גאַנצע סצענעס אויף ייִדיש. צווישן די אַקטיאָרן אינעם צווייטן סעזאָן איז געווען די באַרימטע ייִדישע אַקטריסע לאה קיניג, וואָס האָט צוגעגעבן אַ סך צו דער פּראָגראַם מיט איר טאַלאַנט ווי אַ קאָמיקערין.