ידיעות פֿון מאָסקווע

News from Moscow

דער ישׂראלדיקער זשורנאַליסט וולאַדימיר ביידער באַקומט די „פֿידלער אויפֿן דאַך‟־פּרעמיע
דער ישׂראלדיקער זשורנאַליסט וולאַדימיר ביידער באַקומט די „פֿידלער אויפֿן דאַך‟־פּרעמיע

פֿון אלכּסנדרה פּאָליאַן

Published December 24, 2014, issue of January 23, 2015.

(די 2 טע זײַט פֿון 2)

רעפֿעראַטן וועגן בערלין ווי דער צענטער פֿון ייִדישער קולטור אין די 1920ער יאָרן

צו די אַנדערע נײַעס: זונטיק דעם 21סטן דעצעמבער איז פֿאָרגעקומען די לעצטע באַגעגעניש פֿונעם פּראָיעקט „אשכּולות‟ אין 2014. דאָס איז די צווייטע טרעפֿונג, וואָס „אשכּולות‟ פֿירט דורך בשותּפֿות מיטן דײַטשן „געטע־אינסטיטוט‟ (די ערשטע איז פֿאָרגעקומען מיט אַנדערטהאַלבן חדשים צוריק און איז געווען געווידמעט די צוויי שפּראַכן — ייִדיש און דײַטש, די אונטערשיידן און דער ענלעכקייט צווישן זיי).

דאָס מאָל איז די טעמע געווען „בערלין ווי די הויפּטשטאָט פֿון דער ייִדישער קולטור אין די 1920ער‟. אָנהייב 1920ער יאָרן איז דײַטשלאַנד, ווי געוווּסט, געוואָרן די הויפּטשטאָט פֿון רוסישער עמיגראַציע. אַ דריטל פֿון די דעמאָלטדיקע רוסישע עמיגראַנטן זענען געווען ייִדן. אַחוץ דעם, הִאָט דײַטשלאַנד אויך אויפֿגענומען אַ צושטראָם פֿון ייִדישע פּליטים פֿון עסטרײַך־אונגערן — גאַליציע און בוקאָווינע. וועגן דער קולטור פֿון ייִדישן בערלין — אויף דײַטש, רוסיש, ייִדיש און העברעיש — האָט געהאַלטן אַ רעפֿעראַט פּראָפֿעסאָר מיכאל קרוטיקאָוו. נאָך דעם רעפֿעראַט האָט דער עולם גענאָסן פֿון אַ קאָנצערט — דער בענד „גאָוטס נאָוטס‟ האָט אויסגעפֿילט עטלעכע לידער פֿון בערלינער קאַבאַרעט.

רעפֿעראַט געווידמעט די ערשטע פּאָעטן אויף ייִדיש

די טעג ווערט אינעם נײַעם מאָסקווער ייִדישן מוזיי אָרגאַניזירט אַ בילדונג־פּראָגראַם — אַ ציקל לעקציעס אין ייִדישער דיכטונג. דער ערשטער רעפֿעראַט איז געווידמעט געווען די ערשטע פּאָעטן וואָס האָבן געשריבן אויף ייִדיש – ש. עטינגער, א.ב. גאָטלאָבער, מיכל גאָרדאָן און י.ל. גאָרדאָן, דער צווייטער - אַמעריקאַנער קאָמוניסטישער פּאָעזיע און דער דריטער – דער קיעווער גרופּע און קולטור־ליגע.

„באַלטיק‟־ביר איז איצט כּשר

און די לעצטע ידיעה פֿאַר הײַנט: די וואָך האָט די ביר־פֿאַבריק „באַלטיק‟ באַקומען אַ כּשרות־צערטיפֿיקאַט פֿונעם הויפּט־רבנות פֿון רוסלאַנד. כּשר זענען עטלעכע סאָרטן ביר (העל, ניט־פֿילטרירט און פּאָרטער) און קוואַס.

די ידיעות פֿון מאָסקווע, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.