ידיעות פֿון מעלבורן

News From Melbourne

פֿון שרה זילבערמאַן

Published March 02, 2015, issue of March 20, 2015.

הר הצופֿים גראַדואַנטן טרעפֿן זיך

די „הר-הצופֿים טאָגשול‟ אין מעלבורן רופֿט אירע גראַדואַנטן פֿון די יאָרן 1965, 1975, 1985, 1995, 2005 און 2010 צו העלפֿן אָרגאָניזירן צוזאַמענטרעפֿן מיט חבֿרים און פֿרײַנד פֿון דער שול. „הר הצפֿים‟ איז די גרעסטע ייִדישע טאָגשול אין אױסטראַליע.

געליטענער לױבט הרבֿ גליק פֿאַר רעזיגנירן אַלע זײַנע אַמטן

אײנער פֿון די געליטענע אינעם אױסטראַלישן „סעקסועלע מיסברױכן קעגן קינדער‟־סקאַנדאַל, דער װאָס האָט פֿאַרלױרן זײַן סטיפּענדיע און האָט װײַטער ניט געקענט זיך לערנען אין דער טאָגשול בײַ דער מעלבורנער ישיבֿה נאָך דעם װי זײַן מאַמע האָט זיך באַקלאָגט פֿאַר הרבֿ גליק װעגן די מיסברױכן װעלכע זײַנען באַגאַנגען געװאָרן קעגן אים אין דער ישיבֿה, האָט געלױבט הרבֿ אבֿרהם גליק, װאָס האָט געזאָגט אַז ער רעזיגנירט אַלע זײַנע אַמטן, כּדי די געליטענע זאָלן קענען אָנהײבן הײלן זיך עמאָציאָנעל װאָס גיכער.

דער זעלבער געליטענער האָט געשריבן אַ בריװ צו הרבֿ צבֿי־הירש טעלזנער, דעם הױפּט־רבֿ בײַ דער מעלבורנער ישיבֿה. אינעם בריװ פֿאָדערט ער, אַז הרבֿ טעלזנער זאָל אױך רעזיגנירן פֿון אַלע זײַנע אַמטן. ער שטרײַכט אונטער, אַז הרבֿ טעלזנער פֿאַרשטײט ניט אױף װיפֿל זײַנע רײד און אױפֿפֿירונג מצד די געליטענע װעלכע האָבן זיך באַקלאָגט פֿאַר דער פּאָליצײ און זײערע משפּחות פּײַניקט זײ נאָך אַלץ. דער נאָמען פֿון דעם געליטענעם איז ניט פֿאַרעפֿנטלעכט געװאָרן.

ייִדישע פֿרוי ווערט באַשטימט צו זיצן אינעם מולטי־קולורעלן ראַט

שאַרלאָט װידאָר
שאַרלאָט װידאָר

פֿרױ שאַרלאָט װידאָר איז באַשטימט געװאָרן צו זיצן דרײַ יאָר אױפֿן נײַעם אױסטראַלישן מולטי־קולטורעלן ראַט צוזאַמען מיט נאָך פֿינף עטנישע אױסטראַליער פֿון אַנדערע עטנישע גרופּעס. דער ראַט װעט געבן עצות צו דער שטאַטישער רעגירונג װעגן מולטי־קולטורעלע פּראָגראַמען און פּאָליטיק. װידאָר איז געקומען קײן אױסטראַליע פֿון פּױלן װי אַ יונג קינד אין אײנעם מיט אירע עלטערן.

פּראָפֿ׳ דוד ענגעל פֿון ניו־יאָרקער אוניװערסיטעט האַלט אָפּ 3 רעפֿעראַטן

דוד ענגעל װעט זײַן צו גאַסט אין מעלבורן במשך פֿון חודש מאַרץ און װעט האַלטן דרײַ רעפֿעראַטן בײַם אױסטראַלישן צענטער פֿאַר ייִדישער ציװיליזאַציע בײַ מאָנאַש־אוניװערסיטעט.

דער ערשטער רעפֿעראַט פֿאַרנעמט זיך מיטן פּרוּװ פֿון אָטאָ פֿראַנק, דעם פֿאָטער פֿון אַנאַ פֿראַנק, צו באַקומען אַן אַמעריקאַנער װיזע פֿאַר זײַן משפּחה און צו פֿאַרלאָזן אײראָפּע אין 1941. דער צװײטער רעפֿעראַט פֿאַרנעמט זיך מיטן טאָגבוך פֿון אַ ייִדישן פּאָליציאַנט אין אַ געטאָ אין פּױלן במשך פֿונעם דריטן חורבן. דער דריטער רעפֿעראַט פֿאַרנעמט זיך מיט דעם, װי אַזױ מע האָט באַטראַכט דעם װאַרשעװער געטאָ־אױפֿשטאַנד במשך פֿון די פֿאָריקע 70 יאָר.

אַנטװיקלונגס־דירעקטאָר ווערט געזוכט

דער ייִדישער מוזעום פֿון אױסטראַליע, װאָס געפֿינט זיך אין מעלבורן, זוכט אַ נײַעם אַנטװיקלונגס־דירעקטאָר פֿאַרן מוזעום. דער מענטש דאַרף האָבן דערפֿאָלג בײַ זאַמלען געלט און דאַרף אױך קענען מיטאַרבעטן סײַ מיטן מוזעומס אַלגעמײנעם דירעקטאָר, סײַ מיט דער אַנטװיקלונגס־גרופּע װאָס עקזיסטירט שױן בײַם מוזעום.

8 כאָרן װעלן אָנטײלנעמען אינעם „אין אײן קול‟־קאָנצערט און פֿעסטיװאַל

די אָרגאָניזאַטאָרן פֿונעם „אין אײן קול‟־פֿעסטיװאַל און קאָנצערט אין מעלבורן האָבן געמאָלדן, אַז אַכט ייִדישע כאָרן װעלן אָנטײלנעמען אינעם הײַ־יאָריקן קאָנצערט בײַם פֿעסטיװאַל.

די „לירון‟ (העברעיִש) און „מיר קומען אָן‟ (ייִדיש) געזעלשאַפֿטלעכע כאָרן װעלן זינגען. פֿון צװישן די היגע ייִדישע יוגנט־גרופּעס װעט זינגען דער „סקיף‟־כאָר, װאָס װעט פֿאָרשטעלן ייִדישע לידער. פֿון צװישן די טאָגשולן װעלן פֿאָרשטעלן די כאָרן פֿון דער „שלום עליכם פֿאָלקשול‟, פֿונעם ביאַליק־קאָלעדזש, פֿון דער „דוד המלך שול‟, פֿונעם הר הצופֿים־קאָלעדזש און פֿונעם יבֿנה־קאָלעדזש.

די „מכּבי‟־קלובן װעלן אָנפֿירן מיט ספּאָרט־װאַרשטאַטן און די יוגנט־גרופּעס „סקיף‟, „הבנים דרור‟ און „השומר הצעיר‟ װעלן אָנפֿירן מיט ספּעציעלע אַקטיװיטעטן פֿאַר קינדער במשך פֿונעם טאָג. עס װעלן אױך זײַן האַנט־אַרבעט און קונסט אַקטיװיטעטן פֿאַר קינדער און דערװאַקסענע.

דער „אין אײן קול‟ קאָנצערט און פֿעסטיװאַל װערט דורכגעפֿירט פֿונעם „סקיף‟ (די יוגנט־גרופּע פֿונעם יִידישן אַרבעטער־בונד) און דעם „קדימה‟ קולטור־צענטער און פֿאָלקס־ביבליאָטעק.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.