חסיד פֿאַרקויפֿט זײַן פֿירמע צו „מײַקראָסאָפֿט‟

Hasidic Jew Sells Company to Microsoft

שלמה באַום, דער גרינדער פֿון FieldOne, רעדט אין אַ שיל.
שלמה באַום, דער גרינדער פֿון FieldOne, רעדט אין אַ שיל.

פֿון דזשאָרדין קוציק

Published July 24, 2015, issue of August 21, 2015.

דער טעכנאָלאָגיע־ריז „מײַקראָסאָפֿט‟ האָט לעצטנס אַנאָנסירט, אַז ער וועט קויפֿן די פֿירמע FieldOne Systems, געגרינדעט דורך שלמה בוים, אַ סאַטמאַרער חסיד פֿון קרית־יואל, פֿאַר $39 מיליאָן דאָלאַר.

די פֿירמע, וואָס בוים האָט גע­גרינדעט אין 2001, און וווּ ער דינט הײַנט ווי דער „הויפּט פֿון טעכ­נאָ­לאָגיע‟, אַרבעט אויפֿן געביט פֿון CRM, ד׳׳ה דאָס באַהאַנדלען די באַ­ציִונגען צווישן אַ פֿירמע און אירע קונים. דאָס קאָמפּיוטער־פּראָגראַמוואַרג FieldOne העלפֿט די פֿירמעס צו בלײַבן אין פֿאַרבינדונג מיט אירע אַרבעטער, וואָס האַלטן אין פֿאָרן. דאָס פּראָגראַמוואַרג (software) העלפֿט די פֿירמעס בעסער צו אָרגאַניזירן די אינפֿאָרמאַציע, וואָס זיי דאַרפֿן „אינעם פֿעלד‟; דאָס הייסט, עס האַלט אַן אויג אויף די מכּשרים וואָס די אַרבעטער האָבן, ווען זיי האָבן פֿריִער געאַרבעט מיטן קליענט, ווי דרינגלעך איז די אַרבעט, וויפֿל צײַט וועט נעמען בײַ די אַרבעטער דאָס פֿאָרן און עסן מיטאָג, און נאָך צענדליקער אַזעלכע פּרטים.

„די CRM איז אַ ריזיקע אינדוסטריע, וואָס באַשטייט ניט בלויז פֿון באַדינונג־אָנגעשטעלטע (service industry employees), נאָר אויך פֿון אַ סך טעכניקער, אינסטאַלאַטאָרן און אַנדערע מענטשן, וואָס אַרבעטן מחוץ די ביוראָען און נייטיקן זיך אין אַן אופֿן, ווי אַזוי אויטאָמאַטיש צו וויסן, וואָס עס קומט פֿאָר מיט די פּראָיעקטן, אויף וועלכע זיי אַרבעטן‟, האָט דערקלערט איען דזשייקאָבס, אַן עקספּערט אינעם פֿעלד פֿון CRM, וואָס אַרבעט ווי אַן אַנאַליסט פֿאַר דער פֿירמע Forrester, בעת אַן אינטערוויו מיטן „פֿאָרווערטס‟. „איין פֿאַקטאָר וואָס האָט געהאָלפֿן FieldOne איז, אַז זיי זענען אַרויפֿגעקומען אויף דער סצענע אין אַ גוטער צײַט. די פֿירמע ‘אָראַקל’ האָט לעצטנס געקויפֿט אַן ענלעכע פֿירמע, און די אַנדערע גרויסע פֿירמעס אין דער CRM־אינדוסטריע האָבן אויך געקויפֿט קלענערע פֿירמעס צו אַרבעטן מיט זייערע פּראָדוקטן. האָט ׳מײַקראָסאָפֿט׳ אויך געדאַרפֿט קויפֿן אַן ענלעכע פֿירמע, כּדי צו קענען ווײַטער קאָנקורירן אינעם פֿעלד.”

לויט אַ באַריכט אין Information Week, האָט FieldOne שוין צוזאַמענגעאַרבעט מיט „מײַקראָסאָפֿט‟ זינט מאַרץ הײַיאָר ווי די איינציקע פֿירמע פֿון איר מין אָנטיילצונעמען אין „מײַקראָסאָפֿטס‟ עקסלוסיווער פּראָגראַם פֿאַר אומאָפּהענגיקע פֿירמעס, וואָס פֿאַרקויפֿן „מײַקראָסאָפֿטס‟ פּראָגראַמוואַרג. צוליב אַזאַ נאָענטע קאָאָפּעראַציע און דעם פֿאַקט, וואָס די צוויי פֿירמעס האָבן זייער גוט צוזאַמענגעאַרבעט, קען „מײַקראָסאָפֿט‟ איצט אינטעגרירן די פּראָדוקטן פֿון FieldOne Systems אין איר קאַטאַלאָג, אַז זיי זאָלן קענען עפֿעקטיוו און פֿליסיק צוזאַמענאַרבעטן מיט „מײַקראָסאָפֿטס‟ אַנדערע פּראָגראַמוואַרגן.

ביידע פֿירמעס זענען, לויט זייערע דערקלערונגען פֿאַר דער פּרעסע, גאַנץ צופֿרידן מיטן אָפּמאַך. באָב סטוץ, אַ וויצע־פּרעזידענט פֿון „מײַקראָסאָפֿט‟, האָט דערקלערט, אַז „דאָס קענען באַהאַנדלען פֿאַרשידענע עלעמעטן ׳אינעם פֿעלד׳, איז אַ ספּעציפֿישער, אָבער קריטיש־וויכטיקער שטח פֿון דינען די קליענטן, וואָס גיט די פֿירמעס אַ מעגלעכקייט צו דינען זייערע קליענטן פֿון אָנהייב אָן ביזן סוף פֿון זייער אַרבעט… די פֿירמעס האַלטן אין איין זוכן נײַע אופֿנים, ווי אַזוי זיי קענען בעסער רעאַגירן אויף די באַדערפֿענישן פֿון זייערע קליענטן, ווען זייערע אַרבעטער זענען ׳אינעם פֿעלד׳, דאָס הייסט, דינען דירעקט זייערע קונים, ווען זיי קענען זיך ניט פֿאַרבינדן מיט זייערע אַרבעטער דורכן טעלעפֿאָן אָדער אינטערנעץ. אין דעם גאָר וויכטיקן שטח שטייט FieldOne העכער פֿון אירע קאָנקורענטן‟ — האָט באַטאָנט באָב סטוץ.

בײַם אַנאָנסירן אויפֿן וועבזײַטל פֿון זײַן פֿירמע, אַז „מײַקראָסאָפֿט‟ האָט געקויפֿט FieldOne, האָט שלמה בוים איבערגעגעבן: „איך בין דאַנקבאַר און דערשטוינט פֿון דער נסיעה, וואָס מיר הייבן אָן ווי אַ פֿירמע. דאָס וואָס האָט זיך אָנגעהויבן ווי אַ פּשוטער געדאַנק מיט יאָרן צוריק, איז געוואָרן אַ מעכטיקע לייזונג, וואָס וועט צוהעלפֿן מיליאָנען מענטשן איבער דער וועלט‟.

אילן סלאַסקי, דער הויפּט־פֿאַרוואַלטער פֿון FieldOne האָט דערקלערט אין אַן אָנאָנס אויף זײַן פֿירמעס וועבזײַטל, אַז די פֿירמע וועט נאָך אַלץ אַרבעטן מיטן זעלביקן פּערסאָנאַל, אָבער צוליב דער אָפּמאַך מיט „מײַקראָסאָפֿט‟, וועט זי האָבן צוטריט צו מער רעסורסן און מער ראַפֿינירטער פּראָגראַמוואַרג. „׳מײַקראָסאָפֿט׳ האָט אָנערקענט די אוניקאַלע טויגעוודיקייטן פֿון FieldOne און אונדזער פֿעיִקייט צו לייזן אַן עכטע באַדאַרפֿעניש פֿונעם מאַרק: דעם מאַנגל אין פּראָגראַמען, וואָס העלפֿן די פֿירמעס צו באַדינען זייערע קליענטן ׳פֿונעם פֿעלד׳‟.

די ידיעה, אַז אַ קרית־יואלער חסיד האָט פֿאַרקויפֿט זײַן „הײַטעק‟־פֿירמע צו אַזאַ מעכטיקן און אָנגעזעענעם פֿינאַנציעלן ריז ווי „מײַקראָסאָפֿט‟, וועט אפֿשר דערשטוינען אַ סך אַמעריקאַנער ייִדן, ווײַל עס שטימט אין גאַנצן ניט מיטן סטעראָטיפּ פֿון אַ חסיד, ווי איינער, וואָס האָט ניט צו טאָן מיט דער מאָדערנער וועלט. פֿאַר די, אָבער, וואָס קענען בעסער די חסידישע קרײַזן, איז די נײַעס ניט אַזוי אויסטערליש. „איך בין ניט געווען ספּעציעל פֿאַרחידושט דאָס צו הערן‟, האָט דערקלערט שלום דין, אַ געוועזענער חסיד, וואָס האָט געאַרבעט ווי אַ קאָמפּיוטער־פּראָגראַמירער, ווען ער האָט נאָך אַלץ געוווינט אינעם סקווערער שטעטל „ניו־סקווער‟. „סײַ די טעכנאָלאָגיע און סײַ די אונטערנעמערײַ (entrepreneurship), און די קאָמבינאַציע פֿון די צוויי זענען שוין פֿון לאַנג זייער פֿרײַנדלעך צו אויטאָדידאַקטן. מענטשן, וואָס הייבן אַליין אָן עפּעס צו טאָן און מענטשן וואָס טוען עפּעס ווי אַ ׳האָבי׳. די טראַדיציע, למשל, פֿון מענטשן וואָס פֿאַרלאָזן דעם אוניווערסיטעט און ווערן ׳הײַטעק׳־מאַגנאַטן גייט צוריק צו ביל גייטס. די חסידים, ניט געקוקט אויף זייער אָרעמער וועלטלעכער דערציִונג, זענען אָפֿט גאַנץ המצאהדיק אין די געביטן, וואָס זענען אָפֿן פֿאַר זיי‟. דין האָט ווײַטער דערקלערט אין זײַן בליצבריוו צום „פֿאָרווערטס‟, אַז אַזעלכע, וואָס זענען אַזוי דערפֿאָלגרײַך ווי שלמה בוים, זענען אָבער דווקא אַ יוצא-מן-הכּלל.