נײַעס פֿון בוענאָס־אײַרעס

News from Buenos Aires

דער מחבר מיט מאַלענאַ טשינסקי, וועלכע האָט געהאַלטן אַ רעפֿעראַט וועגן דער „אויפֿלעבונג‟ פֿון ייִדישן לעבן און קולטור אין פּוילן
דער מחבר מיט מאַלענאַ טשינסקי, וועלכע האָט געהאַלטן אַ רעפֿעראַט וועגן דער „אויפֿלעבונג‟ פֿון ייִדישן לעבן און קולטור אין פּוילן

פֿון אַבֿרהם ליכטענבוים

Published August 06, 2015, issue of September 04, 2015.

(די 2 טע זײַט פֿון 3)

דאָקטאָראַנט מאַלענאַ טשינסקי גיט לעקציע און וואַרשטאַט וועגן „אויפֿלעבונג‟ פֿון ייִדישן לעבן און קולטור אין פּוילן

אין דעם „אוניװערזיטאַרן צענטער פֿאַר ייִדישע שטודיעס‟ האָט מאַלענאַ טשינסקי געהאַלטן אַ לעקציע און אַ װאַרשטאַט װעגן איר באַזוך אין פּוילן. די טעמע איז געװען „זכּרון און ייִדיש לעבן אין פּוילן 70 יאָר נאָך אוישװיץ‟, און זי האָט זיך געטיילט מיט אירע איבערלעבונגען אינעם קאָנגרעס, װאָס איז פֿאָרגעקומען מיט אַ פּאָר װאָכן צוריק אין װאַרשע, װוּ זי איז פֿאַרבעטן געװאָרן דורכן „אוישװיץ ייִדישן צענטער‟. זי האָט אויך אַנאַליזירט װאָס מיינט די אַזוי גערופֿענע „אויפֿלעבונג‟ פֿון ייִדישן לעבן און די ייִדישע קולטור אין פּוילן. מאַלענאַ שרײַבט איר דאָקטאָראַט אויף ייִדישער טעמאַטיק און איז אַן אַװאַנסירטע סטודענטע פֿון ייִדיש אין אַרגענטינער ייִװאָ.

ייִדישע אינסטיטוציעס גרייטן זיך צום נאַציאָנאַלן צוזאַמענקום פֿון מינדערהייטן און געמיינדעס

אינטענסיװ גייען אָן די צוגרייטונגען צום נאַציאָנאַלן צוזאַמענקום פֿון מינדערהייטן און געמיינדעס, װאָס די בוענאָס־אײַרעסער מוניציפּאַליטעט אָרגאַניזירט סוף אויגוסט. די קהילה, צוזאַמען מיט אַנדערע ייִדישע אינסטיטוציעס, האָבן מאָנטיק, דעם 3טן אויגוסט, זיך געטראָפֿן אין קהילה־בנין צו קאָאָרדינירן די טעטיקייטן פֿאַר אַן אָרגאַניזירטער צוזאַמענאַרבעט, װאָס זאָל אָפּשפּיגלען די בײַטראָגן פֿונעם ייִשובֿ פֿאַר דער שטאָט.