ידיעות פֿון מעלבורן

News from Melbourne

פֿון שׂרה זילבערמאַן

Published June 27, 2016, issue of June 25, 2016.

די ידיעות פֿון מעלבורן, ווי אויך ייִדישע נײַעס פֿון אַנדערע לענדער איבער דער וועלט, קאָן מען הערן יעדן טאָג אין אונדזער ראַדיאָ־פּראָגראַם „דער פֿאָרווערטס־קול‟.

געשטאָרבן די כּלל־טוערין מאַשע זשעלעזניקאָװ

די לאַנג־יאָריקע כּלל־טוערין מאַשע זשעלעזניקאָװ איז געשטאָרבן אין מעלבורן אין עלטער פֿון 89 יאָר. אַ געבױרענע אין פֿאַר־מלחמהדיקן פּױלן, האָט מאַשע איבערגעלעבט די מלחמה-יאָרן אין סיביר און אין קאַזאַקסטאַן אין אײנעם מיט אירע עלטערן. שפּעטער האָט זי זיך באַזעצט אין מעלבורן צוזאַמען מיט איר מאַן, דעם פּאַרטיזאַנער, ייִדישן לערער און כּלל־טוער אַבֿרהמל זשעלעזניקאָװ.

בײדע זשעלעזניקאָװס זײַנען געװען באַקאַנט אין מעלבורן, דער עיקר נאָך דעם װי זײ האָבן געעפֿנט די „קאַפֿע שעהערעזאַדע‟ אױף אַקלענד סטריט אין 1958. דאָס איז די הױפּט־גאַס פֿון דער געגנט סט. קילדאַ, װאָס איז דעמאָלט געװען אָנגעפֿילט מיט די שארית־הפּליטה און זײערע קינדער.

מאַשע איז במשך פֿון יאָר־צענדליקער געװען טעטיק אינעם ייִדישן הילפֿס־פֿאָנד פֿון װיקטאָריע און אינעם „בני־ברית‟. זי איז אױך געװען די גרינדערין פֿונעם דינסטיק־קלוב, װאָס באַדינט רוסיש־רעדנדיקע ייִדישע אימיגראַנטן.

דער מעלבורנער שרײַבער אַרנאָלד (אַהרן) זײבל האָט אָנגעשריבן אַ בוך און אַ פּיעסע, בײדע באַזירט אױף די איבערלעבונגען פֿון די זשעלעזניקאָװס און זײערע מיטצײַטלער, בײדע אױפֿן נאָמען „קאַפֿע שעהערעזאַדע“.

מאַשע זשעלעזניקאָװ האָט איבערגעלאָזט אַ זון און אױך אײניקלעך (בײדע טעכטער אירע זײַנען געשטאָרבן יונגערהײט). זי איז געװען באַערט פֿון דער אױסטראַלישער רעגירונג מיטן מעדאַל פֿונעם אָרדן פֿון אױסטראַליע לכּבֿוד אירע פֿאַרדינסטן לטובֿת דער ייִדישער באַפֿעלקערונג פֿון מעלבורן.

ייִדן, מוסולמענער און קריסטן אױף „איפֿטאַר“ פֿײַערונגען אין מעלבורן

בעת זײער הײליקן חודש ראַמאַדאַן פֿאַסטן מוסולמענער בײַ טאָג און זײ פֿאַרברענגען אױף גרױסע שׂמחות בײַ נאַכט. פֿאָרשטײער פֿון דער ייִדישער קהילה פֿון װיקטאָריע האָבן אָנטײלגענומען אין אַזאַ „איפֿטאַר“ שׂמחה אין מעלבורן, צוזאַמען מיט פֿאָרשטײערס פֿון װיקטאָריעס מוסולמענישע און קריסטלעכע באַפֿעלקערונגען.

דער אָװנט איז געװען פֿינאַנציעל אונטערגעשריבן פֿון דער רעגירונג פֿונעם שטאַט װיקטאָריע. אָנטײלנעמערס האָבן אַרומגערעדט, צװישן אַנדערן, אַ געמײנזאַמע רײַזע קײן מדינת־ישׂראל פֿון 11 לאָקאַלע גײַסטלעכע.

די פֿאַרװאַלטערין פֿון דער ייִדישער קהילה, דזשעניפֿער הופּערט, האָט אױסגעדריקט די האָפֿענונג אַז די אָנטײלנעמערס אינעם „איפֿטאַר“ אָװנט װעלן זיך צונױפֿקומען איבער אַ יאָר אױף אַן ענלעכן אָװנט געװידמעט אַ ייִדישן יום־טובֿ.

פּױליש־ייִדישער קאַבאַרעט בײַ דער „קדימה‟

לאָקאַלע טאַלענטן האָבן פֿאָרגעשטעלט אַ נאָך־געמאַכטן פּױליש־ייִדישן קאַבאַרעט־אָװנט בײַ דער „קדימה‟, אַזױ װי עס פֿלעגט פֿאָרקומען אין פֿאַר־מלחמהדיקן פּױלן, אונטערן רעזשי פֿון דער זינגערין גלית קלאַס. דער שרײַבער אַרנאָלד זײבל האָט צוגעשטעלט די טעקסטן און די מוזיקערין טאָמי (אירקע) קאַלינסקי איז געװען בײַם קלאַװיר. עס האָבן אָנטײלגענומען קינסטלער פֿון די ייִדישע און די אױסטראַלישע בינעס. צװישן זײ זײַנען געװען פֿרײדי מראָצקי, גראַזינע קרײַעװסקאַ, עליסאַ גרײ, עװעלין קרײפּ, גלית קלאַס, קערען פֿעלדמאַן, מישעל לאַלום, טאָבי גלעזער, דודי רינגעלבלום, יאָסל טיגעל און אַנדערע. דער קאַבאַרעט האָט געשפּילט אין ייִדיש און אין פּױליש צװײ אָװנטן בײַ דער קדימה מיט גרױס דערפֿאָלג.