דרײַ נײַע ייִדישע קינדערביכלעך אַרויסגעלאָזט אין שוועדן

Three New Yiddish Children's Books Published in Sweden


פֿון פֿאָרווערטס־רעדאַקציע

Published January 07, 2018.

זעלטן ווען דערשינען הײַנט ייִדיש־שפּראַכיקע קינדערביכער מחוץ דער חסידישער וועלט, שוין אָפּגערעדט פֿון דעם, אַז דרײַ זאָלן געדרוקט ווערן מיט איין מאָל.

לעצטנס האָט אָבער דער ייִדישיסטישער פֿאַרלאַג „אָלניאַנסקי־טעקסט‟, בראָש מיטן שעפֿערישן ייִדיש־רעדנדיקן פּאָרפֿאָלק ניקאָלײַ און אידאַ אָלניאַנסקי, געלאָזט וויסן, אַז מע גיט אַרויס דרײַ נײַע ייִדישע ביכלעך פֿאַר קינדער.

צוויי פֿון זיי זענען אינפֿאָרמאַטיווע. איינס פֿאַר ייִנגערע קינדער לערנט די נעמען פֿון פֿאַרשידענע פֿרוכטן און אַ צווייטס פֿאַר עלטערע גיט פּרטימדיקע אינפֿאָרמאַציע וועגן דער מענטשלעכער אַנאַטאָמיע. דאָס דריטע ביכל, „דער קראָליק דער קאָסמאָנויט‟ איז אַ מעשׂה־ביכל, וואָס דערציילט וועגן די אַווענטורעס פֿון אַ קראָליק, וואָס חלומט, אַז ער פֿאָרט צו דער לבֿנה. די ביכער האָבן אָנגעשריבן ניקאָלײַ אָלניאַנסקי און אילוסטרירט עמאַ עולאַוסאָן.

להיפּוך צום פֿאָריקן קינדערביכל „באַהאַלטערלעך מיט אַלף און בית פֿון פֿאַרלאַג „אָלניאַנסקי־טעקסט‟ וואָס איז דערשינען סײַ אויף שוועדיש, סײַ אויף ייִדיש, זענען די דרײַ ביכלעך געדרוקט געוואָרן אויסשליסלעך אויף ייִדיש. כּדי צו קריגן נאָך אינפֿאָרמאַציע וועגן די ביכער באַזוכט //olniansky.com.

פֿאַרלאַג „אָלניאַנסקי־טעקסט‟ גיט איבער אויף זײַן וועבזײַט, אַז ער האָפֿט אַרויסצוגעבן נאָך זעקס ייִדישע קינדערביכער במשך פֿונעם יאָר 2018. דאָס ערשטע וועט זײַן די מעשׂה „דער גליקלעכער מענטש‟ פֿון קאָבי ווײַצנער. אַן אַנאַמירטן נוסח פֿון דער דערציילונג, געלייענט פֿונעם מחבר, קען מען זען דאָ.