קערמעשל לכּבֿוד סטודענטישער אויפֿלאַגע פֿון „מאָטל פּייסע דעם חזנס‟

Celebration of Student Edition of "Motl Peyse The Cantor's Son"

League for Yiddish/Forverts Montage

פֿון „פֿאָרווערטס‟־רעדאַקציע

Published May 15, 2018.

די סטודענטישע אויפֿלאַגע פֿון „מאָטל פּייסע דעם חזנס,‟ וואָס די „ייִדיש־ליגע‟ האָט פֿאַראַיאָרן אַרויסגעגעבן בשותּפֿות מיט דער מעלבורנער ייִדישער טאָגשול „שלום־עליכם קאַלעדזש‟ איז במשך פֿונעם יאָר געוואָרן שטאַרק פּאָפּולער בײַ אַוואַנסירטע ייִדיש־סטודענטן איבער דער וועלט.

לעצטנס האָט די „ייִדיש־ליגע‟ אַנאָנסירט, אַז זי אָרדנט אײַן אַ צוויישפּראַכיקע פּראָגראַם בײַם „אַרבעטער־רינג‟ אין מאַנהעטן לכּבֿוד דער פּובליקאַציע פֿונעם בוך. אין דער פּראָגראַם וועט ד׳׳ר שבֿע צוקער, וואָס האָט רעדאַקטירט די נײַע אויפֿלאַגע, רעדן אויף ייִדיש (מיט ענגלישע אונטערקעפּלעך) וועגן „מאָטל פּייסע דעם חזנס‟ ווי אַ קלאַסיש ווערק פֿון דער ייִדישער ליטעראַטור.

נאָך דעם וועט זי, צוזאַמען מיט דער אַקטריסע מירע קעסלער, פֿאָרלייענען אויסצוגן פֿונעם בוך אויף ייִדיש און ענגליש. אינעם קינסטלערישן טייל פֿון דער פּראָגראַם וועט דער זינגער דזשאַש וואַלעציק פֿאָרשטעלן אַ קראַנץ לידער געווידמעט שלום־עליכמען. בײַ דער געלעגנהייט וועט מען סערווירן קוואַס, אַ מיזרח־אייראָפּעיִשער געטראַנק וואָס שפּילט אַ וויכטיקע ראָלע אין „מאָטל פּייסע דעם חזנס.‟

די פּראָגראַם וועט פֿאָרקומען מיטוואָך, דעם 6טן יוני, 7 אַ זייגער אין אָוונט בײַם „אַרבעטער־רינג‟ אין מאַנהעטן (247 וועסט 37סטע גאַס, 5טער גאָרן).