פֿאָרווערטס-אַרטיקל וועגן דעם נסתּרס קבֿר געווינט צוויי „ראַקאָווער‟־פּרעמיעס

Forverts Article on The Nister's Grave Wins Two Rockower Awards

Alexandra Poljan

פֿון „פֿאָרווערטס‟־רעדאַקציע

Published June 20, 2018.

איינער פֿון די פּאָפּולערסטע אַרטיקלען אויף אונדזער וועבזײַט פֿאַראַיאָרן איז געווען דער רעפּאָרטאַזש פֿון ד׳׳ר בער קאָטלערמאַן און ד׳׳ר אַלכּסנדרה פּאָליאַן פֿון זײער רײַזע צו געפֿינען דעם קבֿר פֿונעם גרויסן ייִדישן שרײַבער „דער נסתּר‟. 60 יאָר לאַנג איז דער קבֿר געלעגן אָן אַ מצבֿה, אויף אַ גאָר אומדרך־ארצדיקן אופֿן.

דער אַרטיקל האָט אַרויסגערופֿן אַ סך אינטערעס סײַ בײַ אונדזערע לייענער אויף ייִדיש, סײַ בײַ די לייענער פֿון דער ענגלישער איבערזעצונג.

לעצטנס האָט מען געלאָזט דעם פֿאָרווערטס וויסן, אַז דער אַרטיקל איז באַלוינט געוואָרן מיט נישט אײנער, נאָר צוויי פּרעמיעס, אויף דער יערלעכער אויסטיילונג פֿון די „ראַקאָווער‟־פּרעמיעס פֿאַר די בעסטע ווערק פֿונעם אַמעריקאַנער ייִדישן זשורנאַליזם. הײַיאָר איז די אונטערנעמונג פֿאָרגעקומען אין קליווילאַנד, אָהײַאָ.

ד׳׳ר קאָטלערמאַן און ד׳׳ר פּאָליאַן האָבן געוווּנען אויפֿן ערשטן אָרט אין דער קאַטעגאָריע Feature Stories (מענטשן און געשעענישן) און אויך געוווּנען אויפֿן צווייטן אָרט אין אַ באַזונדערער קאַטעגאָריע, „אַרטיקלען וואָס באַשרײַבן אַספּעקטן פֿון דער אייראָפּעיִשער ייִדישער קולטור־ירושה‟.

אַחוץ די צוויי אויסצייכענונגען פֿאַרן „פֿאָרווערטס‟ האָט דער Forward באַקומען נאָך 10 פּרעמיעס. צווישן זיי: עטלעכע אין דער סעריע וועגן פּרעזידענט טראָמפּס געוועזענעם עצה־געבער סעבאַסטיען גאָרקאַ; אַן אַרטיקל פֿון דוד צבֿי קאַלמאַן וועגן דער טעמע ליכט אום חנוכּה און אַ וועגווײַזער צום ייִדישן לעבן אויף די אַמעריקאַנער קאַמפּוסן.