אַ געיעג נאָך משיחן

A Rush to Bring the Messiah


פֿון מיכאל פֿעלזענבאַום

Published September 11, 2014, issue of September 26, 2014.

(די 3 טע זײַט פֿון 3)

כּמעט אין דער זעלבער צײַט, װען ר’ נחמן בראַסלעװער האָט געשריבן זײַנע תּורות, איז געבױרן געװאָרן דאָס ליטװאַקישע פֿאָלקס־מעשׂהלע װעגן משיחס קומען. אַ שײן מעשׂהלע, אַ קלוגס און ממש אַלצײַטיקס. בקיצור…

דער װילנער גאָון איז אַ מאָל געפֿאָרן קײן לידע מיט אַן אָרעם װעגעלע. אונטער װעגנס איז אַראָפּגעקראָכן דער בעל־עגלה אין אַ שענקל און צוריקגעקומען שױן גוט אונטערגעשאָסן. דעריבער האָט ער געבעטן דעם װילנער גאָון, אַז יענער זאָל בײַ אים איבערנעמען די לײצעס און טרײַבן די פֿערד. דער גאָון האָט אים געפֿאָלגט, און דער בעל־עגלה האָט זיך דערװײַל אַװעקגעלײגט אינעװײניק אין װעגעלע, צו כאַפּן אַ דרימל. און אַזױ קומען זײ, מיט גאָטס הילף, קײן לידע און דאָ, עפּעס אַ פֿאַרבײַגײענדיקער ייִד דערזעט פּלוצעם דאָס מלאכס פּנים פֿונעם אָנטרײַבער און אַ פֿאַרצאַפּלטער לױפֿט ער אַרײַן אין שיל מיט אַ געשרײ: „ייִדן, קומט, משיח איז געקומען!‟

— אױ־װײ! װוּ? װי אַזױ? — פֿרעגן אים די ייִדן מיט אַ קורצן אָטעם.

— אָט דאָ, לעבן דער שיל. כ’האָב דערזען די ליכטיקײט פֿון דער שכינה אױפֿן בעל־עגלהס פּנים. טאָ װער זשע זאָל שױן אינעװײניק זיצן אױב ניט משיח אַלײן? — האָט דערקלערט דער בשׂורה־אָנזאָגער.

לױפֿן אַלע ייִדן אַרױס פֿון שיל, מקבל־פּנים זײַן משיחן. און דערזעען זײ גאָר, אַז אין אַ װעגעלע ליגט אַ ייִד אַ שיכּור און כראָפּעט.

דאָס הומאָריסטישע מעשׂהלע ברענגט מיך צו ישעיהו הנבֿיאס זעונג: „והיה צדק אזור מתניו והאמונה אזור חלציו‟, און גערעכטיקײט װעט זײַן דער אָנגורט פֿון זײַנע לענדן, און אמונה — דער גאַרטל פֿון זײַנע דיכן. און דאַן װעט אײַנגעשטעלט װערן די מאַכט פֿון צדק און שלום אױף דער װעלט. אַזױ אַרום, טײַערע ייִדן, קודם־כּל, שטעלט אײַן צדק־און־שלום אױף דער װעלט, און שױן נאָך דעם הײבט אָן אַרױסקוקן אױף משיחס קומען, אַז ער, דער אמתער אױסלײזער, זאָל אױסלײזן אונדזערע קינדסקינדער פֿון דער נודנעקײט פֿונעם אײביקן לעבן. דערװײַל זשע, לײגט אַרײַן, און טאַקע װאָס מער, אין דער דערציִונג און בילדונג פֿון אונדזערע קינדער, װײַל „אַז משיח װעט קומען, װעלן אַלע קראַנקע געהײלט װערן, נאָר דער נאַר װעט אַ קאַליקע בלײַבן‟.