דער קלוב „מאַמע־לשון‟ אין נהריה

"Club Mame Loshen" in Nahariya


פֿון סערגאָ בענגעלסדאָרף

Published August 04, 2015, issue of August 21, 2015.

(די 2 טע זײַט פֿון 2)

במשך פֿון די פֿאַרגאַנגענע חדשים האָט זיך אין אונדזער קלוב געשאַפֿן אַ יאָדער פֿון די אַקטיווסטע שעפֿערישע מענטשן, וואָס קענען ייִדיש צום בעסטן, אַרײַנגערעכנט פֿרידע פֿרענקעל און יעקבֿ פּוסטילניק פֿון אוקראַיִנע, שׂרה פֿעלדמאַן פֿון אַרגענטינע און אַנאַ גיימאַן פֿון ביראָבידזשאַן. פֿרענקעל פֿאַרנעמט זיך מיט די אָרגאַניזאַציאָנעלע ענינים פֿונעם קלוב, און פּוסטילניק שרײַבט אייגענע דערציילונגען אויף ייִדיש און פֿאַרווײַלט דעם עולם מיט הומאָריסטישע אויפֿטריטן.

פֿאַרן זומער־איבעררײַס האָבן מיר דורכגעפֿירט אַן אָוונט, בעת וועלכן די דירעקטאָרין פֿונעם האָסטעל „גלעד‟, מאַרינאַ איידעלמאַן, האָט געלויבט די טעטיקייט פֿונעם קלוב און איבערגעגעבן, אַז מע האָט שוין דערציילט וועגן אונדזער אונטערנעמונג אויף דער ראַדיאָ. אַ סך צוהערער, וואָס וווינען אין נהריה און די אַנדערע שטעט אין דער געגנט, האָבן זיך פֿאַראינטערעסירט און ווילן זיך באַטייליקן אין אונדזערע באַגעגענישן. דער מחבר פֿון די שורות איז אויפֿגעטראָטן אויף דער פֿאָרטעפּיאַנע, פֿאָרלייענענדיק די לידער פֿון מײַן מאַמען, ליובע וואַסערמאַן, אַ באַקאַנטע ייִדישע פּאָעטעסע.

ליודמילאַ ראָזענטאַל, די קאָאָרדינאַטאָרין פֿונעם אַבסאָרבציע־מיניסטעריום אין נהריה, וועלכע האָט אַקטיוו געהאָלפֿן צו שאַפֿן אונדזער קלוב, האָט איבערגעזעצט אַ צאָל פֿון מײַן מאַמעס ווערק אויף רוסיש און איז אויפֿגעטראָטן מיט אַ לעקציע וועגן ליובע וואַסערמאַנס שווערן לעבנס־וועג אין סטאַלינס תּקופֿה און אין דער מאַנדאַט־פּאַלעסטינע, וווּ זי האָט אַרויסגעגעבן איר ערשטער זאַמלונג לידער „פֿאַרנאַכט‟.

די מוזיקאַליש־ליטעראַרישע קאָמפּאָזיציע האָט געהייסן „וואָרט און ניגון‟. דערנאָך איז יעקבֿ פּוסטילניק אויפֿגעטראָטן מיט איינער פֿון זײַנע קאָמישע דערציילונגען. נאָכן דאָזיקן שעפֿערישן אָוונט, האָבן מיר זיך געקליבן איבערצורײַסן די טעטיקייט פֿון אונדזער קלוב ביזן האַרבסט. פּלוצעם, אין עטלעכע טעג אַרום, האָט זיך אָבער מיט מיר פֿאַרבונדן מײַן תּלמיד סלאַוואַ פֿאַרבער און דערקלערט, אַז ער וואָלט געוואָלט אויפֿטרעטן אין אונדזער קלוב מיט אַ קאָנצערט פֿון ייִדישע לידער. נישט לאַנג צוריק, איז פֿאַרבער באַלוינט געוואָרן מיטן טיטל פֿונעם באַערטן קונסט־טוער פֿון מאָלדאָווע. זײַן קאָנצערט אין אונזדער קלוב איז געווען זײַן ערשטער אויפֿטריט ווי אַ טרעגער פֿון אַזאַ חשובֿן טיטל.

דער זאַל איז געווען געפּאַקט, און פֿאַרבערס אויפֿטריט איז טאַקע געלונגען. דער עולם, בפֿרט אונדזערע לאַנדס־לײַט פֿון מאָלדאָווע, האָבן געבעטן אים זינגען נאָך און נאָך. צווישן די געסט האָבן זיך אויפֿן קאָנצערט באַוויזן אַ צאָל באַקאַנטע געזעלשאַפֿטלעכע טוער און דער פּראָפֿעסיאָנעלער מוזיקער פּאַוועל ליטוואַק. אַזוי, מיט אַ גאַנץ אומדערוואַרטן געראָטענעם שלוס־קאָנצערט, האָט זיך פֿאַרענדיקט דער ערשטער סעזאָן פֿון אונדזער קלוב.