פֿרום און פֿרײַ: „ייִדיש־פֿאַרם‟ 2016

Frum and Secular Melting Pot: Yiddish Farm 2016

די סטודענטן און לערער פֿון ייִדיש־פֿאַרם, זומער 2016
מירע־רבֿקה קאַן
די סטודענטן און לערער פֿון ייִדיש־פֿאַרם, זומער 2016

פֿון מירע־רבֿקה קאַן

Published August 14, 2016, issue of August 29, 2016.

(די 2 טע זײַט פֿון 3)

װי אַ מיטאַרבעטערין אױף דער פֿאַרם דעם זומער, האָב איך געפֿרעגט ישׂראל באַס, דער איצטיקער אָנפֿירער, װי אַזױ האַלט ער אָן דעם דעליקאַטן באַלאַנס צװישן דעם פֿרומען און פֿרײַען עולם. האָט ער געענפֿערט ערלעך אַז ס׳איז אַ „מוראדיק שװערע אַרבעט‟ ווײַל ס׳איז קיין מאָל נישט גענוג שטרענג אָדער גענוג בײגעװדיק צו באַפֿרידיקן ביידע אידעאָלאָגישע עקסטרעמען. בלויז מענטשן װאָס פֿילן זיך באַקװעם „ערגעץ אין מיטן‟ קענען זײַן צופֿרידן. פֿון דעסט װעגן, איז דאָס פֿילן זיך שטענדיק באַקװעם אפֿשר נישט די בעסטע זאַך אין אַזאַ פֿאַל. דערפֿאַר זאָגט ישׂראל ווײַטער: „אַבי יעדער גלײַך איז אומבאַקװעם — סײַ די פֿרײַע, סײַ די פֿרומע — האָבן מיר עפּעס אויפֿגעטאָן װאָס אַנדערע פּלעצער קענען נישט. אין אַ געװיסן זינען, איז דאָס דער איינציקער פּלאַץ אױף דער װעלט װאָס אַזוי פֿיל טיפּן מענטשן קומען זיך צונויף.‟

פּערל כּץ
אַ סטודענטקע, ישי שטײַן, פּרוּווט כאַפּן אַ הינדל
פּערל כּץ
אַ סטודענטקע, ישי שטײַן, פּרוּווט כאַפּן אַ הינדל

דער רעליגיעזער אַספּעקט פֿון ייִדישקייט איז אַ װיכטיקער טײל פונעם טאָגטעגלעכן לעבן אױף דער פֿאַרם, און דאָס זעט זיך ספּעציעל אָן יעדן שבת. כּמעט אַלע סטודענטן האָבן באַמערקט, אַז זייערע באַליבטסטע זכרונות פֿון דעם זומער האָבן זיי טאַקע פֿון די שבתים דאָ.

אסתּר דימענט, כאָטש זי װױנט אין אן אָרט אין אױסטראַליע מיט זייער װייניק ייִדן, און האָט װייניק מעגלעכקייטן צו פּראַװען שבת, זאָגט אַז עס געפֿעלט איר שטאַרק צו פּראַווען שבת אױף דער פֿאַרם ווײַל „מיר אַלע אַרבעטן אַזױ שװער די גאַנצע װאָך, און פּלוצלינג װערן מיר אױסגעפּוצט אין עסיק און אין האָניק, און מיר אַלע זעען אויס אַזױ שיין, אַז עס דאַכט זיך מיר, אַז די ליכט איז דעמאָלט עפּעס אַנדערש אױף דער פֿאַרם.‟

פּערל כּץ

חנה מאַזאָר, איינע פֿון אונזערע לערערס אױף דער פֿאַרם, זאָגט אויך, אַז שבת איז פֿון אירע באַליבטסטע מאָמענטן אױף דער פֿאַרם. „די סעודות זײַנען געווען געשמאַק. מיר האָבן געזונגען אַזױ האַרציק, און מיר זײַנען געבליבן אױף אַזױ שפּעט בײַ נאַכט.‟ אַ מאָל האָט מען געטרונקען און געזונגען ביז צוויי אָדער דרײַ אַ זייגער פֿאַרטאָג, און אַפֿילו די פֿרײַע מענטשן, װאָס האָבן אפֿשר אין אָנהייב זיך געפֿילט עפּעס אומבאַקװעם מיטן שבת, האָבן צום סוף גוט פֿאַרבראַכט.