פֿאָר־אַגענטן קערן זיך צו איראַן

Travel Agents Turn to Iran

Steve Kutay

פֿון נתן גאָטמאַן (Forward)

Published October 01, 2015, issue of October 16, 2015.

(די 2 טע זײַט פֿון 3)

הגם די מעגלעכע פּראָפֿיטן פֿון אָרגאַניזירן איראַן־טורן זענען זיכער אַ מאָטיוו פֿאַר די אָרגאַניזירער, איז עס פֿאַר געוויסע מענטשן אויך אַ שליחות. „איך האָב שוין באַזוכט בערך 80 לענדער, און קיין לאַנד לײַדט נישט פֿון אַזוי פֿיל מיספֿאַרשטענדענישן מצד די אַמעריקאַנער ווי איראַן,‟ האָט קוטיי באַמערקט.

קוטיי זעט אויך די איראָניע פֿון זײַן אַרבעט — ער, אַ ייִד, וויל ברענגען טוריסטן אין אַ לאַנד, וואָס אַ סך ייִדן באַטראַכטן ווי אַ ביטערער שׂונא פֿון אַמעריקע און ישׂראל. זײַן טאַטע איז געווען אַ ייִדישער אימיגראַנט פֿון ליטע, און די מאַמע איז געבוירן געוואָרן אין ברוקלין. די משפּחה פֿלעגט גיין אין שיל אויף די ימים־נוראים, אָבער ברוקלין, וווּ ער איז דערצויגן געוואָרן, איז דעמאָלט געווען אַזוי ייִדישלעך, אַז מע האָט נישט געדאַרפֿט זײַן פֿרום צו האָבן אַ טיפֿע ייִדישע פֿאַרבינדונג.

איראַנישער טור־אָפּעראַטאָר סטיוו קוטיי פֿון אַשוויל, צפֿון־קאַראָלײַנע (צווייטער פֿון לינקס) און אַן איראַנישער וועגווײַזער טרעפֿן זיך מיט צוויי איראַנישע גײַסטיקע פֿירער אינעם „גרויסן מעטשעט‟ אין איספֿאַכאַן, פֿרילינג 2014
Courtesy of Steve Kutay
איראַנישער טור־אָפּעראַטאָר סטיוו קוטיי פֿון אַשוויל, צפֿון־קאַראָלײַנע (צווייטער פֿון לינקס) און אַן איראַנישער וועגווײַזער טרעפֿן זיך מיט צוויי איראַנישע גײַסטיקע פֿירער אינעם „גרויסן מעטשעט‟ אין איספֿאַכאַן, פֿרילינג 2014

שפּעטער האָט קוטיי זיך אַריבערגעצויגן קיין סאַנטאַ־פֿע, ניו־מעקסיקע, און דערנאָך — קיין צפֿון־קאַראָלײַנע, וווּ ער האָט אימפּאָרטירט האַנטווערק פֿון אינדאָנעזיע און נײַ־גווינעע. נאָכן דינען אויפֿן „סאַנטאַ־פֿע ראָט וועגן אינטערנאַציאָנאַלע באַציִונגען‟ האָט ער אָנגעהויבן אָרגאַניזירן אינפֿאָרמאַטיווע טורן אין לענדער איבער דער וועלט, אַרײַנגערעכנט איראַן, און מיט אַ יאָר צוריק האָט ער געגרינדעט אַ נײַ געשעפֿט, Iran Luxury Travel, וווּ ער האָט געבראַכט אַמעריקאַנער טוריסטן קיין איראַן.

„די איראַנער בירגער האָבן ליב די אַמעריקאַנער,‟ האָט קוטיי געזאָגט. „ווען זיי הערן, אַז דו ביסט אַן אַמעריקאַנער, ווילן זיי זיך פֿאָטאָגראַפֿירן מיט דיר, שמועסן מיט דיר, פֿאַרבעטן דיך אויף אַ פּיקניק.‟

קוטיי וואַרפֿט אָפּ די זאָרג, אַז זײַן איניציאַטיוו העלפֿט אַרײַנצוברענגען געלט פֿאַר אַ רעזשים, וואָס פּריידיקט, אַז ישׂראל זאָל פֿאַרטיליקט ווערן. „דאָס געלט, וואָס די אַמעריקאַנער גיבן דאָרט אויס, איז זייער ווייניק, און ס׳רובֿ דערפֿון גייט פֿאַר די פּריוואַטע געשעפֿטסלײַט,‟ האָט ער דערקלערט. „בלויז אַ קליינער טייל דערפֿון גייט פֿאַר שטײַערן צו דער איראַנער רעגירונג.‟